پۋتين مەن لۋكاشەنكو تاعى دا كەزدەستى. بەيرەسمي كەزدەسۋ بەس ساعاتقا سوزىلدى. سوڭعى ايلاردا ەكى ەل باسشىلارىنىڭ كەزدەسۋى ارتتى. 

لۋكاشەنكو ءوزىن ۋكراينا سوعىسىندا ەكى تاراپتى تاتۋلاستىرۋشى سيپاتتا كورسەتۋگە تىرىسسا دا، ول اگرەسسوردىڭ ءبىرى ەكەنىن باتىس ەلدەرى دە، كيەۆ تە جاقسى بىلەدى. بەلارۋس اۋماعى ۋكراينا جەرىنە شابۋىل جاساۋ ماقساتىندا قولدانىلۋدا. رەسەي ۇشاقتارى بەلارۋس اۋەجايلارى ارقىلى ۇشىپ، بەلارۋس جەرىندەگى رەسەيدىڭ زىمىران كەشەندەرى ۋكراينا قالالارىن اتقىلاۋمەن كەلەدى. ۋكراينا جەرىنە جاسالعان زىمىران سوققىسىنىڭ 40 پايىزى بەلارۋس اۋماعىنان جاسالعان.

الايدا لۋكاشەنكو بۇل اقپاراتتىڭ بارلىعىن ىسىرىپ تاستاپ، مينسك كيەۆ پەن ماسكەۋدى تاتۋلاستىرا الادى دەگەندى ايتۋدا. ءتىپتى رەسەي مەن ۋكراينا اراسىنداعى العاشقى كەلىسسوزدەر بەلارۋس جەرىندە ءوتتى جانە ونى لۋكاشەنكو بيلىگى ءوزىنىڭ ءبىر جەتىستىگى رەتىندە سيپاتتاۋعا تىرىستى. دەي-تۇرا باتىس اگرەسسورعا جەرىن شابۋىل جاساۋعا تابىستاي وتىرىپ، كەلىسسوز جۇرگىزۋدەمىن دەگەنگە سەنبەسى انىق. سەنبەدى دە. ءسويتىپ لۋكاشەنكو بيلىگىنە دە جويقىن سانكتسيالاردى سالا باستادى.

ساراپشىلار ءپۋتيننىڭ بەلارۋس باسشىسىن كەزدەسۋلەرگە ءجيى شاقىرۋى، بەلارۋستى سوعىسقا اشىق ارالاستىرۋعا ۇگىتتەۋ ماقساتىندا دەپ ەسەپتەيدى. باتىستىق تاۋەلسىز تىلشىلەردىڭ اقپاراتىنا سەنەتىن بولساق، بەلارۋس سوعىسقا اقپان ايىندا ارالاسۋعا ءتيىس ەدى. الايدا لۋكاشەنكو ول قادامعا بارمادى. رەسەي اسكەرىنىڭ كيەۆ، سۋم باعىتىنداعى جەڭىلىسىنىڭ ءبىر سەبەبى دە وسى دەيدى ولار. ەندىگى تاڭدا رەسەي اسكەرى ۋكراينا شىعىسىندا شابۋىلدى ۇدەتىپ، لۋگانسك جانە دونەتسك وبلىستارىن تولىق باسىپ الۋعا تالپىنۋدا. ال ۋكراينا اسكەرى جويقىن قارسىلىق تانىتۋدا. ۋكراينا اسكەرىن باسقا باعىتقا ءبولۋ ماقساتىندا بەلارۋستىڭ سوعىسقا اشىق ارالاسۋى ماسكەۋ ءۇشىن اسا ماڭىزدى ماسەلەلەردىڭ ءبىرى.

سوڭعى اپتادا بەلارۋس اسكەرىنىڭ ۋكراينا شەكاراسىنا توپتاسۋى ىسكە استى. ۋكراينا بۇل باعىتتان شابۋىل بولۋ ىقتيمالدىعىن جوعارى باعالاپ، ىسكە اسۋى مۇمكىن شابۋىلدى تويتارۋ ءۇشىن 20 مىڭ اسكەر توپتاستىردى. ال مينسك "ۋكراينا تاراپىنان شابۋىل بولۋى مۇمكىن" دەگەن اقىلعا قونبايتىن اقپاراتتى اۋديتورياسىنا تاراتىپ الەك.

23 مامىر كۇنى پۋتين مەن لۋكاشەنكو سوچيدە جابىق ەسىك فورماتىندا ۋكراينا سوعىسىن تالقىلاعانى انىق. ال اشىق فورماتتا "وداقتاس مەملەكەت" اياسىنداعى جوسپارلارىن ءبىر پىسىقتادى. اڭگىمەنىڭ القيسساسى ەكى ەلدىڭ دە قۇلدىراپ بارا جاتقان ەكونوميكاسىنا ارنالدى.

"رەسەي ەكونوميكاسىنىڭ دامىعانى وتە ماڭىزدى. ءبىزدىڭ وداعىمىزدا ەكونوميكامىز قۋاتتى بولۋ ۇستىندە. جۇمىسسىزدىق پەن  ينفلياتسيانى قاراڭىزشى. ول وتە از. جۇمىسسىزدىق ازايىپ كەلەدى. بۇل ءبىز ءۇشىن وتە جاقسى. رۋبل ءتىپتى عارىشتىق جىلدامدىقپەن نىعايۋ ۇستىندە. كۇتپەگەن جاعدايلار بولىپ جاتىر. باتىس كۇتپەگەن جاعدايلاردى ايتامىن. ءبىز وسىلاي بولارىن بىلدىك قوي. ءبىز ءۇشىن بۇل مۇمكىندىكتەر كەزەڭى. ولار ءبىزدى ەكونوميكامىزدى قۋاتتى ەتۋگە يتەرمەلەگەنىن وزدەرى دە تۇسىنبەيدى", - دەيدى لۋكاشەنكو.

ول ءتىپتى ۋكراينانىڭ باتىسىن پولشا تارتىپ الۋى مۇمكىن دەگەندى دە ايتتى.

"ۋكراينادا كۇتپەگەن قىزىق جاعدايلار بولىپ جاتىر. ءسىز ونى جاقسى بىلەسىز عوي. مەنى جانە ءسىزدى، ياعني ساياساتكەرلەردى الاڭداتۋى ءتيىس جايتتاردى ايتامىن. ولار ۋكراينانى بولشەكتەۋ ارەكەتتەرىن باستاعان سىڭايلى. ناتولىقتار مەن پولياكتار 1939 جىلعىداي ۋكراينانىڭ باتىسىن ءبولىپ الۋى مۇمكىن. بۇل ءبىزدى قاۋىپسىزدىك تۇرعىسىنان الاڭداتىپ وتىر. ويتكەنى بۇل ولاردىڭ باتىس بەلارۋسقا قاتىستى دا ستراتەگياسى عوي. سوندىقتان ءبىز ساق وتىرمىز. وسىعان دەيىن ايتقانىمداي، ۋكرايندىقتار بىزگە ءالى باتىس ايماعىن ساقتاپ قالۋ بويىنشا ءوتىنىش ايتاتىن بولادى", - دەيدى ول. بەلارۋس باسشىسى پۋتين ۋكراينانى بولشەكتەۋدى 24 اقپاندا باستاپ كەتكەنىن ۇمىتىپ كەتكەن سىڭايلى.

Abai.kz