ۋكراينا پرەزيدەنتى ۆلاديمير زەلەنسكي جاپوندىق NRK باسىلىمىنا بەرگەن سۇحباتىندا «قىتاي رەسەيدىڭ كيەۆكە قارسى اگرەسسياسىنا باتىس ەلدەرىندەي جاۋاپ قاتپادى»، - دەدى.

زەلەنسكي رەسەيدى وزگە ەلدىڭ اۋماعىنا ويران سالعانى ءۇشىن جاۋاپقا تارتىلۋى كەرەكتىگىن ايتتى.

«قىتاي وزگەنىڭ جەرىن باسىپ الۋدى قالىپتى جاعداي ساناپ وتىر»،-دەدى ۋكراينا پرەزيدەنتى. سونداي-اق ول قىتاي مەن رەسەي «بىرىگۋىنىڭ» دۇرىس ەمەس ەكەنىن، مۇنىڭ جاپونيا ءۇشىن قاۋىپتى بولارىن اتاپ ءوتتى.

ء"بىز ءۇشىن جاپونيانىڭ ۋكراينانى تولىق قولداعانى كەرەك. قازىر ءتورت جاقتى قاۋىپسىزدىك ديالوگى اياسىندا جاپونيا، اقش، اۆستراليا جانە ءۇندىستاننىڭ ۇيىمداسقانى ماڭىزدى، بۇل باسقا ەلدەرگە بەلگى بەرەر ەدى ",-دەدى زەلەنسكي.

ايتا كەتەيىك، رەسەيلىك جانە قىتايلىق ستراتەگيالىق بومبالاۋشىلار رەسەيدىڭ ۋكرايناعا شابۋىلىنان كەيىنگى بىرلەسكەن رەيسىن وتكىزدى. يادرولىق قارۋدى الىپ جۇرۋگە ارنالعان ۇشاقتار وق بويى كوتەرىلىپ، جاپون جانە شىعىس قىتاي تەڭىزدەرىنىڭ ۇستىنەن ۇشىپ ءوتتى. بۇل اقش پرەزيدەنتى دجو بايدەننىڭ اۆستراليا، جاپونيا جانە ءۇندىستان باسشىلارىمەن ءتورت جاقتى قاۋىپسىزدىك ديالوگىن جۇرگىزۋگە بەت العان ساپارى كەزىندە بولدى.

Abai.kz