جاپونيا رەسەيگە قارسى سانكتسيالاردى قۇپتاپ، ءوز تاراپىنان ماسكەۋگە جويقىن سانكتسيالار ەنگىزۋ بويىنشا ازيا ەلدەرىنىڭ ىشىندە كوش باسىندا تۇر. رەسەي-جاپونيا اراسىندا ەكىنشى جاھان سوعىسىنان كەيىن بەيبىت كەلىسىم جاسالمادى. جاپونيا كۋريل ارالدارىن قايتارۋدى قالايدى، ال رەسەي ونى ءوز اۋماعى سانايتىنىن ايتۋدا. 

رەسەي 2020 جىلى كونستيتۋتسيانى وزگەرتۋ بويىنشا رەفەرەندۋم جاساپ، "ايماقتار ەشقاشان بولىنبەيدى جانە ول بويىنشا كەلىسسوز جۇرگىزىلمەيدى" پۋنكتىن ەنگىزدى. وسىلايشا جاپونيا مەن رەسەي اراسىنداعى كەلىسسوزدەر ازايىپ، اقىرى تولىققاندى توقتادى. رەسەي بيلىگى باسقىنشىلىق جولمەن العان كۋريل ارالدارىن قايتارۋدى ويلامايتىنىن اشىق ايتۋدا.

كۇنى كەشە عانا رەسەي مەملەكەتتىك دۋماسىنىڭ توراعاسى ۆولودين "ساحالين-2" جوباسىن قايتا قاراپ، رەسەي رەسمي بەكىتكەن "دوس ەمەس ەلدەردىڭ" ۇلەسىن مەملەكەتكە نەمەسە گازپرومعا بەرۋ كەرەكتىگىن ايتتى.

"ساحالين -2" جوباسى جايلى ايتقىم كەلەدى. وندا جاپونيا، انگليا  مەن نيدەرلاندى قاتىسۋدا. ءبىر جاعىنان ولار ءبىزدىڭ ەلگە زيان ارەكەتتەر جاساۋدا، ال ەكىنشى جاعىنان ءۇنسىز عانا پايدا تاۋىپ وتىر. وسىنى ءبىز ساراپتاۋعا ءتيىسپىز. بۇلاردىڭ ورنىنا وزگە، ەلىمىزگە وڭ كوزقاراستاعى كومپانيالار كەلسىن نەمەسە مەملەكەتكە ۇلەستى الايىق تا، بۇلاردى شىعارايىق", - دەدى ول.

وسىلايشا ولار ساحالين ماڭىنان جاپونيانىڭ ينۆەستيتسياسىن دا شىعارۋدى كوزدەۋدە. ال "ادىلەتتى رەسەي - اقيقات ءۇشىن" پارتياسىنىڭ توراعاسى، مەملەكەتتىك دۋماداعى پارتيا فراكتسياسىنىڭ جەتەكشىسى سەرگەي ميرونوۆ ساحالين وبلىسىنىڭ گۋبەرناتورى ۆالەري ليمارەنكو مەن وبلىستىق دۋمانىڭ توراعاسى اندرەي حاپوچكينگە حات جازىپ، بىلاي دەدى: ء"بىز وبلىس باسشىلىعىنا رەسەي فەدەراتسياسىنىڭ سۋبەكتىسىنىڭ "ساحالين وبلىسى" اتاۋىن "ساحالين وبلىسى – رەسەي ارالدارى" اتاۋىنا وزگەرتۋ تۋرالى زاڭ شىعارۋ باستاماسىن مەملەكەتتىك دۋماعا ەنگىزۋ مۇمكىندىگىن قاراستىرۋدى ۇسىنامىز", - دەدى سەرگەي ميرونوۆ.

الەۋمەتتىك جەلىدەگى ساحاليندىكتەر بولسا بۇل باستامانى قولدامادى. ولار تاريحي اتاۋى قالۋى ءتيىس دەپ سانايدى.

كەيىن دەپۋتات ميرونوۆ دۋماTV ارناسىنا سۇحبات بەردى. ول ءوز ماقالاسىنداعى سوزدەردى قايتالاپ شىقتى. ء"بىزدىڭ فراكتسيا ساحالين وبلىسىنىڭ گۋبەرناتورى ۆالەري ليمارەنكو مەن زاڭ شىعارۋشى جينالىس توراعاسىنا كونستيتۋتسياعا تۇزەتۋلەر ەنگىزۋگە باستاماشىلىق ەتۋ تۋرالى ۇسىنىس جولدادى. بۇل فەدەراتسيا سۋبەكتىسىنىڭ قۇقىعى. ساحالين وبلىسىنىڭ اتاۋىن وزگەرتۋ تۋرالى قۇقىققا يەمىز. ءبىز "ساحالين وبلىسى جانە رەسەي ارالدارى" دەپ اتاۋدى ۇسىنامىز. ويتكەنى جاپونيا ۇنەمى تالاپ ەتىپ وتىرعان ءتورت ارال بىزدىكى بولعان، بولىپ قالا بەرەدى دە. ول رەسەي ارالدارى. سوندىقتان بىزگە بۇل اتاۋلاردى وزگەرتۋ ماڭىزدى", - دەيدى ول.

ال جاپونيا بولسا رەسەي كەلىسسوزدەردى توقتاتقان سوڭ، سانكتسيالىق ساياساتتى كۇشەيتە ءتۇستى.

Abai.kz