قازاقستان پرەمەر-ءمينيسترى ءاليحان سمايىلوۆ كتك باس ديرەكتورى نيكولاي گوربانمەن كەزدەسۋدەن سوڭ وسىلاي دەپ مالىمدەدى.
"كتك-نىڭ تەڭىز تەرمينالىنداعى زاقىمدانعان قۇرىلعىلار جوندەلگەنىنە قۋانىشتىمىز. كەدەرگى جويىلىپ، ەندى قازاقستان مۇناي ءوندىرۋ قۋاتىن تولىق قالپىنا كەلتىرەدى", - دەپ مالىمدەدى ءاليحان سمايىلوۆ.
قازاقستاننىڭ تەڭىز، قاراشىعاناق جانە قاشاعان ءىرى كەن ورىندارىندا وندىرىلگەن مۇناي كتك ارقىلى ەكسپورتتالادى. قازاقستان ۇكىمەتىنىڭ مالىمەتىنشە، 2021 جىلى وسى قۇبىرمەن 53,1 ميلليون توننا، ال بيىلعى قاڭتار-ءساۋىر ايلارىندا 18,7 ميلليون توننا قازاق مۇنايى تاسىلدى.
بيىل ناۋرىزدا نوۆوروسسيسك تۇبىندەگى پورتتا كتك-نىڭ جاعالاۋداعى ەكى قۇرىلعىسى ىستەن شىعىپ، مۇناي ايداۋ كورسەتكىشى شەكتەلدى. كتك ارقىلى اعاتىن مۇنايدىڭ شامامەن 90 پايىزى قازاقستاننان كەلەدى.
Abai.kz
