قازاقستانعا قىزىعۋشىلىق زور
جالپى، حالىقارالىق دەڭگەيدەگى بيزنەس-فورۋمدار كاسىپكەرلەر اراسىندا ناقتى بايلانىستار ورناتىپ، كەلىسىمدەر جاساۋعا جول اشاتىنى انىق. مۇنداي فورۋمدار ەلدەردىڭ ىسكەر توپتارىنىڭ ۇنقاتىسۋ الاڭىنا اينالىپ، ەكىجاقتى ىنتىماقتاستىقتىڭ كوكجيەگىن كەڭەيتە تۇسپەك. ەندەشە، لوندوندا وتكەن قازاقستاندىق ءۇشىنشى بيزنەس-فورۋمنىڭ ماڭىزدىلىعى دا وسىندا بولسا كەرەك.
قازاقستان پرەمەر-مينيسترىنىڭ ورىنباسارى قايرات كەلىمبەتوۆ باستاعان قازاقستاندىق دەلەگاتسيامەن ەرىپ ءبىز دە ايگىلى لوندون شاھارىنا بارىپ كەلدىك. بيىلعى لوندون وليمپياداسىنان كەيىن بۇل قالانىڭ قازاقستاندىقتار ءۇشىن ابىرويى ارتىپ، ەلىمىز ءۇشىن تابىستىڭ تامىرى جاتقانداي تانىمال ورداعا اينالعانى راس. سەبەبى، العاشقى كۇننەن قورجىنعا التىن سالعان لوندون وليمپياداسىنىڭ سوڭى دا سونشالىق ءناتيجەلى بولۋى ءبىزدىڭ بۇل قالاعا دەگەن ىنتىعىمىزدى ودان سايىن ارتتىرا تۇسكەن ەدى. ءتىپتى، سودان بەرى، لوندون ءبىز ءۇشىن تابىستىڭ سيمۆولىنا، بەرەكەنىڭ بەلگىسىنە اينالعانداي.
جالپى، حالىقارالىق دەڭگەيدەگى بيزنەس-فورۋمدار كاسىپكەرلەر اراسىندا ناقتى بايلانىستار ورناتىپ، كەلىسىمدەر جاساۋعا جول اشاتىنى انىق. مۇنداي فورۋمدار ەلدەردىڭ ىسكەر توپتارىنىڭ ۇنقاتىسۋ الاڭىنا اينالىپ، ەكىجاقتى ىنتىماقتاستىقتىڭ كوكجيەگىن كەڭەيتە تۇسپەك. ەندەشە، لوندوندا وتكەن قازاقستاندىق ءۇشىنشى بيزنەس-فورۋمنىڭ ماڭىزدىلىعى دا وسىندا بولسا كەرەك.
قازاقستان پرەمەر-مينيسترىنىڭ ورىنباسارى قايرات كەلىمبەتوۆ باستاعان قازاقستاندىق دەلەگاتسيامەن ەرىپ ءبىز دە ايگىلى لوندون شاھارىنا بارىپ كەلدىك. بيىلعى لوندون وليمپياداسىنان كەيىن بۇل قالانىڭ قازاقستاندىقتار ءۇشىن ابىرويى ارتىپ، ەلىمىز ءۇشىن تابىستىڭ تامىرى جاتقانداي تانىمال ورداعا اينالعانى راس. سەبەبى، العاشقى كۇننەن قورجىنعا التىن سالعان لوندون وليمپياداسىنىڭ سوڭى دا سونشالىق ءناتيجەلى بولۋى ءبىزدىڭ بۇل قالاعا دەگەن ىنتىعىمىزدى ودان سايىن ارتتىرا تۇسكەن ەدى. ءتىپتى، سودان بەرى، لوندون ءبىز ءۇشىن تابىستىڭ سيمۆولىنا، بەرەكەنىڭ بەلگىسىنە اينالعانداي.
وسى سەبەپتى دە بۇل قالاعا باراتىنىمىزدى ءارى ول ساپاردىڭ نەگىزگى ماقساتى قازاق-بريتان بيزنەس-فورۋمىنا قاتىسۋ ەكەندىگىن ەستىگەنىمىزدە، بىردەن ءىشىمىز جىلىپ، شارانىڭ شاراپاتى كوپ بولارىنا سەنگەن دە ەدىك. ۇلىبريتانيا استاناسى - لوندوننىڭ قاق ءتورىندە ۇيىمداستىرىلعان قازاقستاندىق بيزنەس-فورۋم شىنىمەن وسى ۇدەدەن شىعا الدى دەۋگە نەگىز بار.
فورۋمنىڭ قۇرمەتتى قوناقتارىنىڭ ىشىندە قازاقستاننىڭ ۇلىبريتانياداعى توتەنشە جانە وكىلەتتى ەلشىسى قايرات ابۋسەيىتوۆ، اق ءۇيدىڭ ەكونوميكالىق ساياسات بويىنشا ەكس-كەڭەسشىسى تودد بۋححولتس، كورولدىك كونسۋل لورد برەننان، ۇلىبريتانيانىڭ اتوم ەنەرگەتيكاسى بويىنشا كوميتەت توراعاسى لەدي باربارا دجادج، قازاقستان-بريتانيا ساۋدا-ونەركاسىپتىك ەكونوميكالىق پالاتاسى كەڭەسىنىڭ تەڭ توراعاسى دجون ستاتتارد جانە باسقا دا ۇلىبريتانيا جانە ەۋروپا ەلدەرىنەن لاۋازىمدى باسشىلار مەن كاسىپكەرلەردىڭ بولۋى فورۋم دارەجەسىن ودان ءارى سالماقتاي ءتۇستى. ال قازاقستان تاراپىنان بارعان ەلىمىز پرەمەر-ءمينيسترىنىڭ ورىنباسارى قايرات كەلىمبەتوۆ، «سامۇرىق-قازىنا» ۇاق توراعاسىنىڭ ورىنباسارى قۋاندىق بيشىمباەۆ، اۋىل شارۋاشىلىعى ءمينيسترى اسىلجان مامىتبەكوۆ جانە تاعى باسقالار فورۋم الاڭىنا جينالعان ءدۇيىم جۇرتقا قازاقستاننىڭ سوڭعى جىلدارداعى جەتىستىكتەرىن بايانداپ، ەلىمىزدىڭ ينۆەستيتسياعا قولايلى اۋماق بولىپ وتىرعاندىعىن جەتكىزدى. شىنىمەن، قازاق ەلى سوڭعى كەزدە الەمدىك ەكونوميكانىڭ شاتقاياقتاپ تۇرعانىنا قاراماستان، دامۋ جولىندا ءبىرتالاي بەلەستى باعىندىرىپ، ەكونوميكا سالاسىندا ىلگەرىلەۋشىلىك تانىتىپ وتىرعانى راس. قازاقستان قازىرگى تاڭدا تىكەلەي ينۆەستيتسيا تارتۋدا جوعارى كورسەتكىشتەرگە يە. قازاقستاننىڭ سىرتقى ساۋدا اينالىمى اعىمداعى جىلدىڭ 8 ايىنىڭ ىشىندە 13,5 پايىزعا ارتۋى دا وسىنىڭ ايعاعى. جاھان ەكونوميكاسىندا ايتارلىقتاي باياۋلاۋ ورىن العانىمەن، بۇل سەگىز ايدىڭ ىشىندە ەلىمىزدىڭ تاۋار ەكسپورتى - 9,3, يمپورتى 24,1 پايىزعا ءوسىم كورسەتتى. ساۋدا بالانسىنداعى وڭ سالدو 34,2 ملرد. اقش دوللارىن قۇرادى.
سوڭعى 20 جىلدا قازاق ەلىنىڭ ەكونوميكاسىنا سىرتتان كەلگەن تىكەلەي ينۆەستيتسيا كولەمى 159,4 ملرد. اقش دوللارىن قۇراپتى. ونىڭ ىشىندە 11,2 ملرد. دوللار ۇلىبريتانياعا تيەسىلى.
كەدەندىك قىزمەت مالىمەتتەرىنە قاراعاندا، ۇستىمىزدەگى جىلدىڭ 8 ايىندا قازاقستان مەن ۇلىبريتانيا اراسىنداعى تاۋار اينالىمى 1 ملرد. 267,9 ملن. اقش دوللارىنا جەتكەن. قازاقستاننان بريتانياعا نەگىزىنەن مەتالل، مۇناي، التىن مەن كۇمىس، وڭدەلگەن ءجانە وڭدەلمەگەن جارتىلاي ءونىمدەر جونەلتىلەدى. ال سەگىز ايدا ول ەلدەن 379,4 ملن. اقش دوللارىنا تاۋار العان ەكەنبىز. ولار - ءتۇرلى كولىكتەر، ءدارى-دارمەك، مەتالدان جاسالعان، قاعاز جانە كارتون ءونىمدەرى، ءىرى تەحنيكالار. سونداي-اق، قازاق جەرىندە بۇگىندە 500-گە جۋىق قازاق-بريتان كاسىپورىندارى جۇمىس ىستەۋدە. ال وننان استام قازاقستاندىق كومپانيا لوندون قور بيرجاسىنا ءوز اكتسيالارىن سالعان.
بريتاندىق كاسىپكەرلەر قازاقستاننىڭ يندۋستريالىق-يننوۆاتسيالىق الەۋەتىنە ەرەكشە ىقىلاس اۋدارىپ وتىرعاندىعى قازاق-بريتان فورۋمى بارىسىندا دا ايقىن اڭعارىلدى. فورۋمدا قازاقستان مەن ۇلىبريتانيانىڭ ەكىجاقتى ءىسكەرلىك بايلانىستارىن دامىتۋ، قازاقستانداعى ينۆەستيتسيالىق احۋالدى نىعايتۋ، قازاقستاننىڭ ەۋروپالىق كەڭىستىككە ەكونوميكالىق جاعىنان ىقپالداسۋىنىڭ كەلەشەگى، سونداي-اق يندۋستريالىق-يننوۆاتسيالىق باعدارلامانى، اگرارلىق جانە ەلدىڭ ترانزيتتىك الەۋەتىن دامىتۋ ماسەلەلەرى تالقىلاندى. سونىمەن بىرگە، بيزنەس-فورۋم اياسىندا ەكى ەلدىڭ كاسىپكەرلىك قوعامداستىعىنىڭ ءوزارا قارىم-قاتىناسىنىڭ پەرسپەكتيۆالى باعىتتارى، مەملەكەت باسشىسى نۇرسۇلتان نازارباەۆتىڭ قازاقستان حالقىنا جولداۋىندا جاريالانعان جاڭا جوبالار مەن مىندەتتەردى ىلگەرى جىلجىتۋدىڭ جاي-كۇيى ايتىلدى.
بيزنەس-فورۋمنىڭ العاشقى جارتىسىندا قازاقستان ەكونوميكاسىنىڭ بولاشاعى، الەمدەگى قازىرگى تۇراقسىزدىق جاعدايىنا قارسى تۇرۋ، 2014 جىلدارعا دەيىنگى يندۋستريالىق-يننوۆاتسيالىق باعدارلاما جانە حالىقتىق IPO باعدارلاماسى تۋرالى پىكىر الماسۋ بولدى. وعان پرەمەر-مينيستردىڭ ورىنباسارى قايرات كەلىمبەتوۆ، «سامۇرىق-قازىنا» ۇاق» اق باسقارما توراعاسى ق.بيشىمباەۆ، «قازترانسويل» اق باس ديرەكتورىنىڭ ورىنباسارى ب.زاكيروۆ، «KEGOK» اق باسقارما ءتوراعاسى ب.قاجيەۆ، «برك» اق باسقارما توراعاسى ن.قۇسايىنوۆ، مۇناي جانە گاز مينيسترلىگىنىڭ جاۋاپتى حاتشىسى ق.سافينوۆ، يندۋستريا جانە جاڭا تەحنولوگيالار ۆيتسە-ءمينيسترى ك.ءتولەۋشين قاتىستى.
ق.كەلىمبەتوۆ پىكىر الماسۋ بارىسىندا ەلىمىزدە قولعا الىنىپ جاتقان حالىقتىق IPO باعدارلاماسى جايىندا جان-جاقتى باياندادى. بۇل باعدارلاما حالىققا ءىرى ۇلتتىق كومپانيالاردىڭ اكتسيونەرى بولۋعا جول اشۋمەن قاتار، ولاردىڭ ۇكىمەتپەن بىرلەسە وتىرىپ، ەلىمىزدىڭ بۇدان ءارى قارىشتى دامۋىنا وزىندىك ۇلەس قوسۋىنا ىقپال ەتەدى، دەدى ول. بۇل ءۇشىن قازاقستان ۇكىمەتى «قازترانسويل»، «كەگوك، «قازترانسگاز» جانە «سامۇرىق-ەنەرگو» سياقتى اۋقاتتى، دامۋى تۇراقتى كومپانيالاردى تاڭداپ وتىرعانىن ايتىپ ءوتتى. سونداي-اق، الداعى 2014-215 جىلدارى «قازمۇنايگاز»، «قازاتومونەركاسىپ» جانە «قازاقستان تەمىر جولى» سىندى بەلدى كومپانيالاردىڭ اكتسيالارى وسى حالىقتىڭ IPO باعدارلاماسىنا ەنۋى ءمۇمكىن ەكەندىگىن جەتكىزدى. ال باعدارلامانىڭ بۇدان ءارى قالاي داميتىنى قازىرگى ەكونوميكا رىنوگىنداعى جاعدايعا تىكەلەي بايلانىستى بولاتىنىن دا ايتىپ ءوتتى. ياعني، الداعى جىلى الەم ەكونوميكاسىنداعى جاعداي تۇراقتالىپ، قازاقستاننىڭ دا جاعدايى قالىپتى بولاتىن بولسا، بۇل باعدارلامانى جانداندىرۋعا بۇدان ءارى بارىنشا كۇش سالىنباق. بۇل جاعدايدا حالىقتىق IPO باعدارلاماسىنا وتاندىق كومپانيالارمەن قاتار شەتەلدىك كومپانيالاردى دا قوسۋ جوسپاردا بار ەكەن.
حالىقتىق IPO باعدارلاماسىن قولعا الۋ تۋرالى ەلباسىنىڭ تاپسىرماسىنان كەيىن بۇل سالاداعى بارلىق تاجىريبەنى زەرتتەدىك، دەي كەلە ق.كەلىمبەتوۆ، الەمدىك رىنوكتا حالىقتىق IPO-نىڭ كەيبىر ساتسىزدىكتەرى بولعانىن دا ايتىپ ءوتتى. شەتەلدىكتەر تاجىريبەسىنەن بىرنەشە مىسالدار كەلتىرىپ، بۇل اكتسيالاردى ساتىپ الۋشىلار باعدارلامانىڭ بار جاعىنا نازار اۋدارۋى كەرەكتىگىن، ءارى بۇل ساتىپ الۋشىلاردىڭ ءوز ەرىكتەرىمەن ءجۇزەگە اسۋى تيىستىگىن ەسكەرتىپ ءوتتى.
سونداي-اق، ول ءسوز اراسىندا ەلىمىزدە الداعى ءۇش جىل كولەمىندە بۇل باعدارلامانىڭ سوماسى 500 ملن. اقش دوللارى شاماسىندا اكتسياسىن ساتۋ بولجانىپ وتىرعانىن ايتىپ ءوتتى. ونىڭ 200 ملن. اقش دوللارى جەكە تۇلعالاردىڭ سۇرانىسى بولسا، 300 ملن. اقش دوللارى زەينەتاقى قورلارىنىڭ سۇرانىسى بولادى دەپ كۇتىلۋدە. ق.كەلىمبەتوۆ بۇل ارا-قاتىناس ءوزگەرىسكە ۇشىراۋى دا مۇمكىن دەيدى.
ق.كەلىمبەتوۆ بۇدان ءارى ءبىزدىڭ ەلدە شاعىن جانە ورتا بيزنەسكە ەرەكشە جاعداي جاسالىپ، بۇل باعىتتى قولداۋ ماقساتىندا بىرنەشە باعدارلامالار قولعا الىنعانىن اڭگىمەلەدى. ەلىمىزدە بۇگىندە شاعىن جانە ورتا بيزنەستى دامىتۋ باعىتىندا شەتەلدىك ينۆەستورلارعا دا كەڭ مۇمكىندىك اشىلىپ وتىر. ال ۇدەمەلى يندۋستريالىق-يننوۆاتسيالىق باعدارلامانىڭ بۇل باعىتتاعى ۇلەسى قانشالىقتى زور ەكەندىگى ايتپاسا دا تۇسىنىكتى. ق.كەلىمبەتوۆ قازاقستاننىڭ بيىلعى بەف رەيتينگىندە 51-ورىنعا يە بولۋىن شەتەل كاسىپكەرلەرىنىڭ نازارىنا تاعى ءبىر سالىپ ءوتتى. سەبەبى، الەم ەلدەرى اراسىندا مۇنداي بەدەلگە يە بولۋىمىزدىڭ ءوزى شەتەلدىكتەردىڭ قازاقستانعا قىزىعۋشىلىعىن ارتتىرا تۇسەرى ءسوزسىز. 2011-2012 جىلدارى بەف رەيتينگىندە 72-ورىندا بولعان ەلىمىزدىڭ ءبىر جىل ىشىندە ۇلتتىق ەكونوميكانىڭ رەيتينگى 21-ءشى پوزيتسياعا كوتەرىلىپ، 51-ورىنعا تابان تىرەۋى، شىنىمەن ايتارلىقتاي تابىس. بۇل كورسەتكىشتە ەلىمىزدىڭ باستى ارتىقشىلىعى - ماكروەكونوميكالىق تۇراقتىلىعى نەگىز بولعاندىعى دا ايتىپ كەتۋگە تۇرارلىق، ياعني بۇل كورسەتكىش بويىنشا ەل 16-شى ورىندا.
فورۋمدا ەرەكشە مانگە يە بولعان، تارتىمدى پىكىر تۋعىزىپ، ۇتىمدى ويلار ايتىلعان سالا اگرارلىق باعىت بولدى. ەلىمىزدىڭ اۋىل شارۋاشىلىعى ءمينيسترى ءوز بايانداماسىندا اۋىل شارۋاشىلىعى سالاسىندا كەيبىر شەشىلمەي وتىرعان ماسەلەلەرگە توقتالىپ، بۇل ينۆەستورلارعا سۇرانىپ تۇرعان سالا ەكەندىگىن العا تارتتى. شىندىعىندا، وتكەن جىلدارى رەكوردتىق استىق جيناعان كەزدەرىمىزدە تۋىنداعان استىق ساتۋ، استىقتى ۇلگىرتۋ، تاراتۋ، تاسۋ جۇمىستارىندا تۋىنداعان كەيبىر كەلەڭسىزدىكتەر شىنىمەن ءبىزدىڭ بۇل سالادا شەتەلدىك ماماندارمەن ءالى دە تىعىز جۇمىس ىستەۋىمىز كەرەكتىگىن كورسەتىپ قالعان بولاتىن. الەمدىك رىنوكتاعى ورنىمىزدى كەڭەيتۋ ماقساتىندا شەتەلدىك كاسىپكەرلەرمەن بايلانىس ورناتىپ، كەلىسىمدەر جاساۋ بۇل سانانىڭ جاڭا تىنىسىن اشا تۇسەرى انىق. وسىنى باستى نىساناعا العان اۋىل شارۋاشىلىعى ءمينيسترى شەتەلدىك كاسىپكەرلەرمەن قىزۋ پىكىرتالاس جۇرگىزدى. سونىڭ ءناتيجەسىندە فورۋمعا قاتىسۋشىلاردىڭ بۇل سالاعا دەگەن ايرىقشا قىزىعۋشىلىعىن اڭعاردىق.
شارا بارىسىندا ەكى سەسسيا قاتار جۇمىس ىستەگەن بولاتىن. ەكىنشى سەسسيا «كولىكتىك دامۋ ءجانە كوممۋنيكاتسيالىق ينفراقۇرىلىم» تاقىرىبىندا وتكىزىلدى. وندا ازيا مەن ەۋروپا ارالىعىنداعى ترانزيتتىك ءدالىز بويىنداعى ينفراقۇرىلىمدى قالىپتاستىرۋ جايى قارالدى. پىكىرسايىسقا «قازاقستان تەمىر جولى» ۇك» اق ۆيتسە-پرەزيدەنتى ە.ەسقاليەۆ، «قازاقتەلەكوم» اق باسقارما توراعاسى ك.ەسەكەەۆ، «سامۇرىق-قازىنا» ۇاق» اق ديرەكتورلار كەڭەسىنىڭ مۇشەسى، تاۋەلسىز ديرەكتور ر.ەۆانس، «Tele2 Group of Companies» ورتالىق ەۋروپا مەن ەۋرازيا ايماعىنىڭ ۆيتسە-پرەزيدەنتى ن.سونكين قاتىستى.
«قتج» ۇك» اق لوگيستيكا ءجونىندەگى ۆيتسە-پرەزيدەنتى ە.ەسقاليەۆ رەسپۋبليكاداعى كولىكتىك لوگيستيكالىق جۇيەسىنىڭ بولاشاعى «جاڭا جىبەك جولى» جوباسى تۋرالى، 5س - جىلدامدىق، سەرۆيس، ساقتالۋى، باعاسى، تۇراقتىلىعى لوگيستيكاسى تۋرالى اڭگىمەلەدى. تالقىلاۋ كەزىندە «قورعاس-شىعىس قاقپاسى» اەا جوباسى تۋرالى دا ايتىلدى. ەكىنشى سەسسيانىڭ نەگىزگى بولىگى بريتان ىسكەر توپ وكىلدەرىنىڭ قاتىسۋىمەن قازاقستاننىڭ كولىك-لوگيستيكالىق ءجۇيەسىنە ينۆەستيتسيا تارتۋ مەن وعان قولايلى احۋال ورناتۋدىڭ جايىنا ارنالدى.
فورۋم اياقتالعان سوڭ شارانىڭ باس سپيكەرى ق.كەلىمبەتوۆ ادەتتەگىدەي جۋرناليستەرمەن جەكە كەزدەسىپ، ءباسپاسوز ءماسليحاتىن وتكىزدى. وندا ول لوندوندا وسىمەن ءۇشىنشى رەت وتكىزىلىپ وتىرعان بيىلعى فورۋم شەتەلدىك ينۆەستورلاردىڭ قازاقستانعا دەگەن قىزىعۋشىلىعىن ودان ءارى ارتتىرا تۇسكەنىن جەتكىزدى. ونىڭ ايتۋىنشا، بيىلعى فورۋم بارىسىندا اڭعارعانىمىزداي، شەتەلدىك ينۆەستورلاردىڭ قىزىعۋشىلىعى بۇرىنعى مۇناي، گازدان وزگە سالالارعا دا ارتا باستاعان. ءماسەلەن، اۋىل شارۋاشىلىعى سالاسىنا قاتىستى قىزۋ پىكىرسايىس - وسىنىڭ ايعاعى. ەلىمىز بۇگىنگە دەيىن بۇل سالانىڭ الەۋمەتتىك احۋالىنا نازار اۋدارىپ كەلدى، اۋىلدارداعى شاعىن جانە ورتا كاسىپكەرلىكتى دامىتۋعا باسىمدىق بەرىلدى. ال ەندى سول شاعىن بيزنەستەردىڭ تىنىسىن كەڭەيتىپ، اۋقىمىن ۇلعايتۋ ماقساتىندا شەتەلدىك ينۆەستورلاردىڭ بەرەرى مول بولۋى كەرەك. ق.كەلىمبەتوۆ ەلىمىزدە جاقىندا اگرارلىق سالانى دامىتۋدىڭ 2020 جىلعا دەيىنگى باعدارلاماسى قولعا الىنعانىن ايتىپ ءوتتى. ال مۇنداي ستراتەگيالىق باعدارلامالار ءتيىمدى جۇزەگە اسۋى ءۇشىن شەتەلدىك كاسىپكەرلەردىڭ دە ۇلەسىن پايدالانۋعا ءتيىسپىز. ءماسەلەن، بۇگىندە ءبىز 5-6 ملن. توننا استىق ەكسپورتتاپ وتىرمىز، ال شەتەلدەرمەن بايلانىسىمىزدى ارتتىرا وتىرىپ ءبىز مۇنى ءۇش ەسەگە دەيىن وسىرە الامىز، دەيدى ول. ءبىزدىڭ ەلدىڭ استىعى قازىرگى كۇنى الەمدە ساپالىلىعىمەن جاقسى باعالانادى. ەندى سونى كەڭ تاراتۋ جاعىن قولعا الاتىن كەز كەلدى.
قازاق-بريتان بيزنەس-فورۋمى ءبۇگىندە ەلىمىزدىڭ دامۋ داڭعىلىنا تۇرەن سالعان بىرەگەي باعىتتاردىڭ بىرىنە اينالىپ وتىر. سەبەبى، ۇلىبريتانيا الەمدەگى ءىرى حالىقارالىق ۇيىمداردىڭ كوپشىلىگىنە ءمۇشە. ال ونىڭ استاناسى لوندون - قاي سالادا بولماسىن الەم ەلدەرىنىڭ اراسىندا بەدەلى بار، ءبۇگىندە بيزنەستىڭ ۇلكەن ورتالىعىنا اينالعان قالا. سوندىقتان دا مۇنداي بيزنەس-فورۋمداردىڭ ءدال وسى لوندوندا ءوتۋىنىڭ ماڭىزى زور ەكەندىگىن ايتقان ق.كەلىمبەتوۆ، ەڭ باستىسى، بۇل فورۋمداردان ءبىز ۇتپاساق، ۇتىلمايتىنىمىزدى اتاپ ءوتتى.
دينارا بىتىكوۆا،
«ەگەمەن قازاقستان».
استانا - لوندون - استانا.
"ەگەمەن قازاقستان" گازەتى
