قىتاي تۇرمەسىندە جازاسىن وتەپ جاتقان قازاقستاندىق اقجارقىن تۇرلىباي ەلگە قايتارىلمايتىن بولدى. بۇل تۋرالى قر باس پروكۋراتۋراسى مالىمدەدى.

«2020 جىلدىڭ 19 قازانىندا باس پروكۋراتۋراعا سوتتى بولعان اقجارقىن تۇرلىبايدىڭ ءوزىن قازاقستانعا اۋىستىرۋ تۋرالى جازباشا ءوتىنىمى تۇسكەن بولاتىن. سول كۇنى-اق قىتاي تارابىنا ءتيىستى ساۋال جولداندى. قحر ادىلەت مينيسترلىگىنىڭ 2021 جىلعى 3 ناۋرىزداعى جاۋابىنا سايكەس، اقجارقىن تۇرلىبايدى قازاقستانعا اۋىستىرۋدان باس تارتىلعان. ونىڭ شارتتى تۇردە مەرزىمىنەن بۇرىن بوساتۋ قۇقىعىنسىز ءومىر بويىنا باس بوستاندىعىنان ايىرۋ جازاسىنا كەسىلگەنىن ەسكەرىپ، وسىنداي شەشىم قابىلدانعانى ايتىلعان»، - دەپ جازىلعان باس پروكۋراتۋرانىڭ مالىمەتىندە.

دەگەنمەن باس پروكۋراتۋرا وكىلدەرى ءالى دە بولسا ءۇمىت ۇزۋگە بولمايتىنىن ەسكەرتەدى.

«الايدا قازاقستان تارابى تۇرلىبايدىڭ ەلگە قايتارىلۋىنان ءۇمىتىن ۇزبەيدى. قىتاي سوتى ونىڭ جازا مەرزىمىن قىسقارتىپ، ناقتى جىلداردى اتاپ بەلگىلەسە ەلگە قايتارۋ مۇمكىن بولادى»، - دەپ جازدى باس پروكۋراتۋرا.

ايتا كەتەيىك، بيىل اقجارقىن تۇرلىبايدىڭ ادۆوكاتى سۇڭقار نۇرماعامبەتوۆ ونىڭ قازاقستانعا قايتارىلۋى مۇمكىن ەكەنىن ايتقان ەدى.

Abai.kz