رف پرەزيدەنتى پۋتين مەن كيريلل اكەيگە حات

shyn.kz سايتى باتىس قازاقستان وبلىسىندا تۇرىپ، ءومىر ءسۇرىپ جاتقان، وزدەرىن «كازاكتار» دەپ بىلەتىن ءبىر توپ قاۋىمنىڭ رەسەي پرەزيدەنتى پۋتينگە، ماسكەۋدىڭ جانە جالپى رەسەيدىڭ پاتريارحى كيريللگە جازعان حاتىن جاريالادى. حاتقا قول قويعان سولوديلوۆ دەگەن ازامات ەكەن. ول ءوزىن «اتامان» اتايتىن كورىنەدى. ەلىمىزدىڭ زاڭى بويىنشا ۇيىمدار مەن قوزعالىستاردىڭ، قوعامدىق قورلاردىڭ جەتەكشىلەرى «توراعا»، «ءتورايىم»، «باس ديرەكتور»، ءتىپتى «پرەزيدەنت» اتالادى. بىراق، «اتامان» دەگەن اتىمەن جوق. سوندا بۇل قايدان شىققان لاۋازىم؟ ونى ونداي لاۋازىمعا تاعايىنداپ، تالتاڭداتىپ قويعان كىم؟ الدە اتامان دەگەن ەرتەكشى اتايدىڭ ءبىر نىسپىسى ما؟ بۇلاي دەۋىمىزگە سەبەپ، سولوديلوۆتىڭ سورعالاتىپ جازعان حاتىن شولىپ شىعىپ تاڭ-تاماشا بولدىق. «قازاقستان قازاق ءتىلدى بولىپ كەتتى، - دەپ كۇڭىرەنەدى ول، - ورىس تىلىندە سۇراق قويساڭ قازاقشا جاۋاپ الاسىڭ. كوشەلەردەگى جارناما، اقپاراتتار دا قازاق تىلىنە كوشىپ ۇلگەردى. ۇكىمەت مۇشەلەرى قازاقشا سويلەيدى، تەك پرەزيدەنت قانا تىلدىك تەپە-تەڭدىكتى ساقتاپ وتىر».

رف پرەزيدەنتى پۋتين مەن كيريلل اكەيگە حات

shyn.kz سايتى باتىس قازاقستان وبلىسىندا تۇرىپ، ءومىر ءسۇرىپ جاتقان، وزدەرىن «كازاكتار» دەپ بىلەتىن ءبىر توپ قاۋىمنىڭ رەسەي پرەزيدەنتى پۋتينگە، ماسكەۋدىڭ جانە جالپى رەسەيدىڭ پاتريارحى كيريللگە جازعان حاتىن جاريالادى. حاتقا قول قويعان سولوديلوۆ دەگەن ازامات ەكەن. ول ءوزىن «اتامان» اتايتىن كورىنەدى. ەلىمىزدىڭ زاڭى بويىنشا ۇيىمدار مەن قوزعالىستاردىڭ، قوعامدىق قورلاردىڭ جەتەكشىلەرى «توراعا»، «ءتورايىم»، «باس ديرەكتور»، ءتىپتى «پرەزيدەنت» اتالادى. بىراق، «اتامان» دەگەن اتىمەن جوق. سوندا بۇل قايدان شىققان لاۋازىم؟ ونى ونداي لاۋازىمعا تاعايىنداپ، تالتاڭداتىپ قويعان كىم؟ الدە اتامان دەگەن ەرتەكشى اتايدىڭ ءبىر نىسپىسى ما؟ بۇلاي دەۋىمىزگە سەبەپ، سولوديلوۆتىڭ سورعالاتىپ جازعان حاتىن شولىپ شىعىپ تاڭ-تاماشا بولدىق. «قازاقستان قازاق ءتىلدى بولىپ كەتتى، - دەپ كۇڭىرەنەدى ول، - ورىس تىلىندە سۇراق قويساڭ قازاقشا جاۋاپ الاسىڭ. كوشەلەردەگى جارناما، اقپاراتتار دا قازاق تىلىنە كوشىپ ۇلگەردى. ۇكىمەت مۇشەلەرى قازاقشا سويلەيدى، تەك پرەزيدەنت قانا تىلدىك تەپە-تەڭدىكتى ساقتاپ وتىر».

ءاي، سولوديلوۆ-اي، قاتىراسىڭ سەن. ءبىز بىلەتىن سولوديلوۆتار وسىنداي ەلدە جوق اڭگىمەنى وسىدان 15-20 جىل بۇرىن دا ايتىپ جۇرەتىن. سول سوزدەرىنەن ءالى تانباپتى. جانە سول تانباي تابانداۋلارىنىڭ ارقاسىندا پرەزيدەنتتى دە، اتقارۋشى بيلىك پەن زاڭ شىعارۋشى ورگاندى دا - بارلىعىن ورىس ءتىلىنىڭ باياعى وتارىندا ۇستاپ وتىر. ءبىرىنىڭ الكۇنگە بەتى بۇلك ەتىپ، سيراعى سىلق ەتەر ەمەس. كەرسىنشە كۇلبەتتەنىپ الىپ كۇشەيىپ، جوندانىپ بارادى. ولار وسىلاي ىشقىنعان سايىن رەسمي بيلىك باس كوتەرىپ ءبىردى ەكىلى ءسوز ايتاتىن قازاقتاردىڭ اۋزىن جاۋىپ، مەملەكەت مۇددەسىن تاعى دا اياق استى ەتە سالادى. مىنە، مىنا حاتتان كەيىن دە ءبىزدىڭ استاناداعى اق جاعالى ۇلىقتارىمىز ۇلارداي شۋلاپ «قاي تۇستان قاتەلەستىك» دەپ قاپالانىپ، كازاكتار مەن ۆوجاكتاردىڭ الدىندا بوجەك قاعارى داۋسىز. ويتكەنى، وعان كوزىمىز ابدەن جەتكەن. اتى دارداي قازاقستان حالىقتارىنىڭ اسسامبلەياسى، اسسامبلەيادان ماجىلىسكە تىكەلەي سايلاناتىن دەپۋتاتتار الگى كوزىمىز جەتكەندەردىڭ كوكەسى بولىپ تابىلادى. «سولاي دا سولاي، سولوديلوۆ دەيتىن سويقان باستاپ جۇرگەن كورىنەدى، ءسىز نە دەيسىز؟» دەپ اسسامبلەيا مۇشەلەرىنىڭ بىرىنە حابارلاسىپ كورەيىكشى، سۇراعىڭنان ات تونىن الا قاشادى. اۋ، سوندا اسسامبلەيامىز ۇلت بىرلىگىنە دانەكەر بولىپ، سولوديلوۆ سياقتى سولاقاي سوعىپ جۇرگەندەردى كەلەگە سالىپ، كەڭەسكە شاقىرماسا، نەسىنە اسسامبلەيا بولىپ وتىر. دىم تۇسىنبەدىك.

حاتىمىزعا ورالايىق. اق پاتشاسى مەن قاسيەتتى اكەيىنە جازعان حاتىندا سولوديلوۆ تاعى بىلاي دەيدى:

«قازاقتار ءبىزدى ابدەن باسىنىپ ءبىتتى. تاريحي وتانىمىزدا، اتا-بابامىزدىڭ جەرىندە ءومىر سۇرە تۇرا يت كورمەگەن قورلىقتى باستان كەشىرۋدەمىز. بارلىق جەردە قازاقشا سويلەۋگە ءماجبۇرمىز. بارلىق مەملەكەتتىك مەكەمەلەردە، قوعامدىق، مەديتسينالىق، الەۋمەتتىك، سوت، قۇقىقتىق مەكەمەلەردە اقپاراتتار قازاقشا جازىلادى. بۇل ءبىزدى قورلاۋ ەمەي نەمەنە؟! قازاقتارعا قىرسىققاندا بۇل جەردەن كوشىپ كەتكىمىز-اق كەلەدى. بىراق اتا-بابا مەكەنىن ءبىز كەتسەك كىم قورعايدى؟ وسى جەردى قورعاۋ ءۇشىن 20 جىل بۇرىن قۇرىلعان ۇيىمىمىز تالماي جۇمىس ىستەپ كەلەدى. بىراق ءبىزدى سوڭعى كەزدە قازاقتار مۇلدەم قورلاپ ءبىتىردى. جاۋىنگەرلىك رۋحىمىزدى تاپتاپ بىزدەرگە مەرەكە-تويدا ءان سالدىرىپ، بي بيلەتىپ ءارتىس قىلىپ جىبەردى. ءبىز بي بيلەۋ ءۇشىن ەمەس، قىلىشىمىز جالاڭداپ جەرىمىزدى قورعاۋ ءۇشىن جاراتىلدىق ەمەس پە؟! مۇنداي قورلىقتان ءبىزدى اراشالاپ الىڭىز، ۆلاديمير ۆلاديميرۇلى!»

حاتقا قول قويعان اتامان ۆياچەسلاۆ  سولوديلوۆ (سۋرەتتە) ورال قالاسىن جىلۋمەن قامتاماسىز ەتەتىن «جايىقجىلۋقۋات» اق-دا كوممەرتسيالىق ديرەكتور بولىپ قىزمەت  اتقارادى ەكەن. ول ءوزىنىڭ سالاقۇلاش حاتىنىڭ ءبىر قيىرىندا رەسەي كازاكتاردى كوشىرىپ السا دەگەن ەمەۋرىن بىلدىرەدى. دۇرىس قوي، كوشسە ءوز وتانى. قازاقستان زاڭىندا كوشىپ كەتۋگە دە، كوشىپ كەلۋگە دە بولادى. ارينە، سولوديلوۆتار كوشىپ كەتكەننەن قازاق جەرى قورعانسىز قالمايدى، الايدا اتالعان اكتسيونەرلىك قوعام بار جيعان تەرگەنىنەن ايرىلىپ قالۋى مۇمكىن. بىزدە بايىپ الىپ قاشىپ جاتقاندار از با، سونى ەسكەرتە كەلىپ قۇقىق قورعاۋ ورگاندارىنىڭ قۇلاعىنا التىن سىرعا دەيمىز.

«اbai.kz»