"قاندى قاڭتار قۇرباندارى" دەپ اتالاتىن ارنايى جوبادا قازىر 188 ادامنىڭ اتى-ءجونى بار. ونداعى ارنايى كاتەگوريالار ارقىلى قۇربانداردىڭ جاسى، وقيعا ورنى، ءولىمىنىڭ سەبەپتەرى جانە وزگە اقپاراتتى ىرىكتەپ وقۋعا دا بولادى. جوبا قازا بولعانداردىڭ تۋىستارى مەن كۋالاردىڭ بايانداۋلارى ارقىلى قايعىلى وقيعانىڭ اۋقىمىن ۇعىنۋعا مۇمكىندىك بەرەدى.
1 ماۋسىمدا الماتىنىڭ اباي جانە دوستىق كوشەلەرى قيىلىسىنداعى Novotel قوناقۇيىندە وتكەن جوبا تانىستىرىلىمىنا ونداعان ادام جينالدى. ولاردىڭ اراسىندا قازا بولعانداردىڭ تۋىستارى، ازاپتاۋعا ۇشىراعاندار، سونىمەن بىرگە قۇقىق قورعاۋشىلار، جۋرناليستەر مەن بەلسەندىلەر بار.
– جاڭا قازاقستان تاريحىندا قاڭتار قاسىرەتى سياقتى مۇنداي دەڭگەيدەگى اۋىر قىلمىس، اۋىر وقيعا، ۇلكەن سىناق قازاق حالقىنىڭ باسىندا بولعان ەمەس. ازاتتىقتىڭ سىزدەردى وسى شاراعا شاقىرۋىنىڭ باستى سەبەبى – وقيعادان قازا بولعان 238 ادامنىڭ ءتىزىمىن جاساۋعا تالپىندىق. بيلىك مۇنى جاريالاعان جوق. بەس اي بويى ءبىز قازاقستانداعى تاۋەلسىز، ازات مەديانىڭ وكىلى رەتىندە وسى ازاماتتاردى ىزدەدىك، قازا بولعانداردىڭ اتى-ءجونىن تۇگەندەدىك، كوپشىلىگىمەن سويلەستىك. كوپشىلىگىنىڭ ۇيىنە باردىق، ارتىنداعى جەسىرىن، جىلاپ قالعان جەتىمىمەن تىكەلەي تىلدەستىك. بۇل ارەكەتكە جۋرناليستىك پارىزىمىزبەن، ءوزىمىڭزدىڭ مىندەتىمىزبەن باردىق. بۇل جۇمىس ەندى عانا باستالدى دەۋگە بولادى، - دەدى ازاتتىقتىڭ الماتى بيۋروسى جەتەكشىسىنىڭ مىندەتىن ورىنداۋشى قاسىم امانجول.
شاراعا ازات ەۋروپا/ازاتتىق راديوسى مەدياكورپوراتسياسىنىڭ پرەزيدەنتى دجەيمي فلاي، ورتالىق ازيا ايماعى بويىنشا ديرەكتور حاميد يسمايلوۆ، ازاتتىقتىڭ قازاق قىزمەتىنىڭ ديرەكتورى توروكۋل دووروۆ قاتىستى.
- قاڭتاردىڭ باسىندا ەلدە سۇيىتىلعان گاز باعاسىنىڭ قىمباتتاۋىنا بايلانىستى ميتينگ ءوتىپ، نارازىلىقتىڭ سوڭى قانتوگىسكە ۇلاسقان. بيلىك شەتەلدە دايىندىقتان وتكەن "تەرروريستەر شابۋىلى" تۋرالى ايتتى، بىراق وعان دالەل-ايعاق كەلتىرگەن جوق. پرەزيدەنت قاسىم-جومارت توقاەۆ كۇشتىك قۇرىلىمعا ەسكەرتۋسىز وق اتۋعا بۇيرىق بەرگەنىن مالىمدەدى. ول سونىمەن بىرگە ەلدە بيلىكتى كۇشپەن باسىپ الۋ تالپىنىسى بولعانىن ايتىپ، الايدا ونى كىم ۇيىمداستىرعانىن ناقتىلامادى.
- رەسمي دەرەك بويىنشا، قاڭتار وقيعاسىندا 230 ادام قازا بولدى. بۇعان قوسا، وقيعا كەزىندە ۇستالعان تاعى سەگىز ادامنىڭ تەرگەۋ يزولياتورىندا كوز جۇمعانى بەلگىلى بولدى. بيلىك قوعام تالابىنا قاراماستان وپات بولعانداردىڭ ەسىمىن جانە ولاردىڭ قانداي جاعدايدا قازا بولعانى جايلى اقپاراتتى جاريالامادى.
- قاڭتار وقيعاسى كەزىندە جانە ودان كەيىن مىڭداعان ازامات ۇستالىپ، جۇزدەگەن ادامعا "تەرروريزم", "جاپپاي تارتىپسىزدىك ۇيىمداستىرۋ", "زاڭسىز قارۋ-جاراق ساقتاۋ" سەكىلدى ايىپتار تاعىلدى. قاماۋدا بولعانداردىڭ اراسىندا ازاپتالعانىن ايتىپ شاعىمدانعاندار كوپ، بىراق ولاردى ازاپتاۋ فاكتىسى بويىنشا ۇستالعاندار نەكەن-ساياق.
- قاڭتار وقيعاسىنان كەيىن قاماۋدا بولعان جۇزدەگەن ادام وزدەرىنىڭ ازاپتالعانى جايلى ايتىپ، 234 ءىس قوزعالعان. الايدا، ازىرگە كۇشتىك قۇرىلىمنىڭ تەك 11 وكىلى كۇدىكتى دەپ تانىلعان.
Abai.kz
