قىرعىزستاندا دەنساۋلىق ساقتاۋ سالاسىن دامىتۋ جونىندەگى بۇيرىقتى بۇزىپ، بيۋدجەت قارجىسىن زاڭسىز شىعاردى دەگەن ايىپپەن بىرنەشە شەنەۋنىك ۇستالدى. بۇل تۋرالى ەلدىڭ باس پروكۋراتۋراسى حابارلادى.

باقىلاۋشى ورگاننىڭ مالىمەتىنشە، 2020 جىلدىڭ جەلتوقسانىنان 2021 جىلدىڭ قىركۇيەك ايىنا دەيىن قىرعىزستان حالىقارالىق ۇيىمداردان، رەسەي، قىتاي جانە ازەربايجان ەلدەرىنەن 452 مىڭ دانا كوروناۆيرۋسقا قارسى ەكپەنى تەگىن العان. كەيىن قىتاي مەن رەسەي تاعى دا كومەك رەتىندە 6 ملن دانا ەكپەنى تەگىن بەرگەن.

بىراق سوعان قاراماستان دەنساۋلىق ساقتاۋ ءمينيسترى الىمكادىر بەيشەناليەۆ 460 مىڭ دانا ۆاكتسينا ساتىپ الۋ ءۇشىن، بيۋدجەتتەن 1 ملرد 581 ملن 474 مىڭ سوم (20 ملن دوللار شاماسىندا) بولدىرگەن. بۇل قارجى وفشورلىق زونا ارقىلى شەتەلگە شىعارىلعان.

مامىر ايىندا دەنساۋلىق ساقتاۋ ءمينيسترى ىستىقكولدە ساپاردا جۇرگەن كەزىندە ارنايى قىزمەت تاراپىنان تەرگەلگەنىن حابارلاعان. وسى ايدا ىستىقكول وبلىسىنىڭ دەنساۋلىق ساقتاۋ سالاسىنىڭ شەنەۋنىگى پارا الدى دەگەن كۇدىكپەن ۇستالعان.

الىمكادىر بەيشەناليەۆ 2020 جىلدىڭ قازان ايىنداعى توڭكەرىستەن كەيىن دەنساۋلىق ساقتاۋ ءمينيسترى قىزمەتىنە كەلگەن.

Abai.kz