ءومىردىڭ اعىنىمەن بىرنەشە جىلدان بەرى باسقا سالاعا قىزمەتكە اۋىسىپ كەتسەم دە ءوزىم تاڭداعان ماماندىعىم جۋرناليستيكاعا دەگەن قۇرمەتىم، وعان دەگەن رۋحاني سۇرانىسىم ارتا تۇسپەسە ەش باسەڭدەگەن ەمەس. بەس جىل بويى كازگۋ-ءدىڭ تابالدىرىعىن توزدىرىپ، ستۋدەنتتىك شاقتىڭ ەڭ قىزىقتى كۇندەرىن قالام ۇستاعان قاۋىمنىڭ بۇگىنگى وكىلدەرىمەن ايگىلى بەسىنشى جاتاقحانادا بىرگە وتكىزگەندىكتەن بولار جۇمىس باعىتى باسقا بولسا دا قازاق جۋرناليستيكاسىنىڭ جانە ادەبيەتىنىڭ قازانىندا قايناپ جۇرگەن الدىڭعى بۋىن اعالاردىڭ، دوستارىمنىڭ بىزدەن كەيىنگى جاستاردىڭ جازعان-سىزعاندارىن ۇزبەي وقىپ، شاما-شارقىمشا تالداپ-تارازىلاپ وتىرۋدى ادەتكە اينالدىرعانمىن. «جۋرفاكقا العاش كەلگەن 50 ستۋدەنتتىڭ ءبارى اقىن» دەگەن ءسوزدى مەنىڭ ارىپتەستەرىم جاقسى ءبىلۋى كەرەك. سول سياقتى ءبىز دە جۋرناليستيكانىڭ قالىڭ ورمانىنا ەنبەس بۇرىن «ولەڭگە تالاسىمىز» بار ەكەنىن ءبىلدىرىپ، ءبارىمىز جارىسا ولەڭ وقىدىق، اقىنداردىڭ جاڭا جىرلارىن جاتقا سوعاتىنبىز.

ءومىردىڭ اعىنىمەن بىرنەشە جىلدان بەرى باسقا سالاعا قىزمەتكە اۋىسىپ كەتسەم دە ءوزىم تاڭداعان ماماندىعىم جۋرناليستيكاعا دەگەن قۇرمەتىم، وعان دەگەن رۋحاني سۇرانىسىم ارتا تۇسپەسە ەش باسەڭدەگەن ەمەس. بەس جىل بويى كازگۋ-ءدىڭ تابالدىرىعىن توزدىرىپ، ستۋدەنتتىك شاقتىڭ ەڭ قىزىقتى كۇندەرىن قالام ۇستاعان قاۋىمنىڭ بۇگىنگى وكىلدەرىمەن ايگىلى بەسىنشى جاتاقحانادا بىرگە وتكىزگەندىكتەن بولار جۇمىس باعىتى باسقا بولسا دا قازاق جۋرناليستيكاسىنىڭ جانە ادەبيەتىنىڭ قازانىندا قايناپ جۇرگەن الدىڭعى بۋىن اعالاردىڭ، دوستارىمنىڭ بىزدەن كەيىنگى جاستاردىڭ جازعان-سىزعاندارىن ۇزبەي وقىپ، شاما-شارقىمشا تالداپ-تارازىلاپ وتىرۋدى ادەتكە اينالدىرعانمىن. «جۋرفاكقا العاش كەلگەن 50 ستۋدەنتتىڭ ءبارى اقىن» دەگەن ءسوزدى مەنىڭ ارىپتەستەرىم جاقسى ءبىلۋى كەرەك. سول سياقتى ءبىز دە جۋرناليستيكانىڭ قالىڭ ورمانىنا ەنبەس بۇرىن «ولەڭگە تالاسىمىز» بار ەكەنىن ءبىلدىرىپ، ءبارىمىز جارىسا ولەڭ وقىدىق، اقىنداردىڭ جاڭا جىرلارىن جاتقا سوعاتىنبىز.

وسى ەسكى ادەتىمە باسىپ، جاقىندا استاناداعى ۇلتتىق كىتاپحاناعا بارىپ، بيىلعى جىلى مادەنيەت جانە اقپارات مينيسترلىگىنىڭ مەملەكەتتىك تاپسىرىسى ارقىلى شىققان كوركەم شىعارمالارمەن تانىسىپ شىقتىم. شىنىن ايتۋ كەرەك، اۋىزدى قۋ شوپپەن سۇرتە بەرۋدىڭ قاجەتى جوق ەكەن. وقيمىن دەگەن ادامعا كىتاپ جەتكىلىكتى. كىتاپحاناشىلاردان سۇراپ-بىلگەنىمدە بيىلعى جىلدىڭ وزىندە 400 اتالىمداي كىتاپ شىعۋدا ەكەن. سونىڭ ءبىرازى كىتاپحاناعا ءتۇسىپ ۇلگەرىپتى. ىشىندە زاڭعار جازۋشىلارىمىز مۇحتار مەن عابيتتەن باستاپ ادەبيەت الەمىنە جاڭا كەلگەن جاستاردىڭ «جانارتاۋ» اتتى توپتاماسىنا   دەيىنگى ءار بۋىنداعى اقىن-جازۋشىلاردىڭ شىعارمالارى بارشىلىق.

ەڭ باستىسى، بيىل شىققان كىتاپتاردىڭ اراسىندا كوزىن كورىپ، ءبىرشاما ۋاقىت رۋحاني اعا-ءىنى بولعان باۋىرجان ۇسەنوۆ، نۇرلان ماۋكەنۇلى، بەيبىت قۇسانبەك سياقتى ومىردەن ەرتە وزعان اقىن، جۋرناليستەردىڭ شىعارمالارى جارىققا شىعىپتى. ومىردەن ەرتە وزعان تالانتتاردىڭ كىتاپتارىن اقتارىپ وتىرىپ مارقۇمداردىڭ بەينەلەرى كوز الدىما كەلدى. وزدەرى دۇنيەدەن وتسە دە ىزدەر-سۇرار حالقى بار ەكەنىنە، سوڭدارىندا قالىڭ وقىرمانى قالعانىنا، كىتاپتارىن شىعارۋعا ۇيىتقى بوپ جۇرگەن سوزۇعار ازاماتتاردىڭ بولعانىنا تاۋبەشىلىك ەتتىم.

مارقۇم باۋىرجان ۇسەنوۆتىڭ «مەنىڭ بۇلتىم» اتتى كىتابىنداعى «اقىن ءولدى» دەگەن ولەڭىنە كوزىم ءتۇستى.

جۇرت اقىندى جونەلتتى قۇرمەتپەنەن،

الگىلەر دە شاۋىپ ءجۇر دۇرمەكپەنەن.

ال اقىنعا ءبارىبىر ءولىپ قالعان...

ول تىس قالدى ومىرلىك جورىقتاردان، - دەپ جازىپتى باۋىرجان اقىن. تاتار تالقانى تاۋسىلىپ، اقىننىڭ ءوزى ايتقانداي «ءومىر جورىقتاردان تىس قالسا» دا رۋحاني مۇرالارىنىڭ وقىرمانمەن قايتا قاۋىشىپ جاتقانىنا قۋاندىم.

مارقۇم نۇرلان ماۋكەنۇلىمەن 90 جىلداردىڭ اياعىندا ءبىر باسىلىمدا بىرگە قىزمەت ەتىپ، رۋحاني اعا-ءىنى بوپ كەتكەن ەدىك. قولىما باسپاحانادان جاڭا شىققان «بويتۇمار» كىتابىن الىپ، اقتارىپ شىقتىم.

ولگەننەن سۇرا ولەڭدى،

ءتىرىنىڭ كوزى - تىرلىكتە.

ءبىر ءدىرىل جايلاپ دەنەمدى،

قويىلماي قويدى ءبىر نۇكتە.، دەگەن ولەڭ جولدارىن وقىپ، سەلكە ەتە قالعانداي بولدىم. مارقۇم نۇرلان اعامىز ارعى دۇنيەدە جاتىپ اپ ولەڭ جازىپ جاتقانداي ەلەستەدى.

كەلەسى كىتاپ دارىندى تەلەجۋرناليست بەيبىت قۇسانبەكتىڭ «ءبىر ءسات جانە بۇكىل عۇمىر» دەگەن تەلەجوباسىنىڭ جازباشا نۇسقاسى رەتىندە دايىندالىپتى. ەكراننان كورگەن بولەك تە سىر سۇحباتتاردى اسىقپاي وقىعاندا باسقاشا بولادى ەكەن. مارقۇم بەكەڭ دە تەلەجوباسىنىڭ اتىن نەگە وسىلاي قويدى ەكەن دەپ تاڭقالدىم.

قاراپ وتىرسام، قازاقتىڭ ءۇش دارىندى ۇلى ومىردەن ەرتە كەتسە دە ايتارلارىن ايتىپ  كەتكەن ەكەن. ەندى ولاردى وقۋ، وقىتۋ، ەلگە تاراتۋ ءبىزدىڭ پارىز. وسىنداي ساۋاپتى ءىستى قولعا الىپ، مارقۇمداردىڭ ارۋاعىن تەربەگەن مادەنيەت جانە اقپارات مينيسترلىگىنە العىستان باسقا ايتار ءسوزىم جوق.

«Abai.kz»