مىنە، سول كۇن دە كەلدى: 2012 جىلعى 6 قاراشادا قازاقستاندا «حالىقتىق IPO» باعدارلاماسى ىسكە قوسىلدى. ءدال قازىر جۇرتتىڭ ءبارىنىڭ اۋزىندا تۇرعان ءسوزدىڭ ءبىرى - ءىرو. «نە ىستەدىڭ؟ اقشاڭدى سالدىڭ با؟ سودان نە تۇسەدى ەكەن ءوزى؟» دەيدى ءبىر-بىرىنە. بۇعان دەيىن، ءبىر جىل بويى، ۇكىمەت پەن «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىنىڭ تاراپىنان اتالعان باعدارلامانى حالىقتىڭ اراسىندا كەڭىنەن ناسيحاتتاپ، ءتۇسىندىرۋ جۇمىستارى جۇرگىزىلگەن بولاتىن. ساراپشىلاردىڭ ايتۋىنشا، بۇگىنگى تاڭدا «حالىقتىق IPO» باعدارلاماسى تۋرالى جۇرتشىلىق تولىقتاي حاباردار جانە شامامەن 500 مىڭ ادام وسى باعدارلاماعا قاتىسۋعا نيەت ءبىلدىرىپ وتىر. دەگەنمەن، مۇنداي ماڭىزدى ءىستىڭ ءمانىسىن تاعى دا تۇسىندىرە تۇسكەننىڭ ەش ارتىقتىعى جوق دەپ ويلايمىز. «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىنىڭ باسقارما توراعاسى ومىرزاق شوكەەۆپەن اڭگىمە نەگىزىنەن وسى ماڭىزدى ماسەلە توڭىرەگىندە ءوربىدى.

مىنە، سول كۇن دە كەلدى: 2012 جىلعى 6 قاراشادا قازاقستاندا «حالىقتىق IPO» باعدارلاماسى ىسكە قوسىلدى. ءدال قازىر جۇرتتىڭ ءبارىنىڭ اۋزىندا تۇرعان ءسوزدىڭ ءبىرى - ءىرو. «نە ىستەدىڭ؟ اقشاڭدى سالدىڭ با؟ سودان نە تۇسەدى ەكەن ءوزى؟» دەيدى ءبىر-بىرىنە. بۇعان دەيىن، ءبىر جىل بويى، ۇكىمەت پەن «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىنىڭ تاراپىنان اتالعان باعدارلامانى حالىقتىڭ اراسىندا كەڭىنەن ناسيحاتتاپ، ءتۇسىندىرۋ جۇمىستارى جۇرگىزىلگەن بولاتىن. ساراپشىلاردىڭ ايتۋىنشا، بۇگىنگى تاڭدا «حالىقتىق IPO» باعدارلاماسى تۋرالى جۇرتشىلىق تولىقتاي حاباردار جانە شامامەن 500 مىڭ ادام وسى باعدارلاماعا قاتىسۋعا نيەت ءبىلدىرىپ وتىر. دەگەنمەن، مۇنداي ماڭىزدى ءىستىڭ ءمانىسىن تاعى دا تۇسىندىرە تۇسكەننىڭ ەش ارتىقتىعى جوق دەپ ويلايمىز. «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىنىڭ باسقارما توراعاسى ومىرزاق شوكەەۆپەن اڭگىمە نەگىزىنەن وسى ماڭىزدى ماسەلە توڭىرەگىندە ءوربىدى.

- ومىرزاق ەستايۇلى، اسا ماڭىزدى وقيعانىڭ تۇسىندا ول جايىنداعى ماقالانىڭ نە سۇحباتتىڭ تاقىرىبىن «باس-تال-دى!» دەپ ايقايلاتىپ قو­يىپ جاتاتىن ادەتىمىز بولۋشى ەدى. بۇگىن دە سولاي ايتقان ار­تىق ەمەس سياقتى. 6 قاراشادا «حالىقتىق IPO» باعدار­لاما­سى باستالدى. بۇل باعدارلاما قالىڭ جۇرتشىلىق اراسىندا بيىلعى جىلى ەڭ كوپ تال­قى­لانعان، كوپ كۇتىلگەن جوبا دەسە دە بولادى. سۇحباتىمىزدى وسى ماڭىزدى ماسەلەدەن باستاساق...
- راسىندا دا، «حالىقتىق IPO» باعدارلاماسى سوڭعى ءبىر جىل ىشىندە اقپارات قۇ­رالدا­رىن­دا، الەۋمەتتىك جەلىلەردە ەڭ كوپ تالقىلانعان تاقىرىپتاردىڭ ءبى­رى. بۇل باعدارلاما ەلباسىنىڭ ءتى­كەلەي باستاماسىمەن ومىرگە جولداما العان. وزدەرىڭىز بىلەسىزدەر، 2011 جىلعى اقپان ايىندا، «نۇر وتان» پارتياسىنىڭ 13-سەزىندە نۇرسۇلتان نازارباەۆ ۇكىمەت پەن «سامۇرىق-قازىنا» قورىنا «حا­لىقتىق IPO» باعدارلاماسىن جاساپ، جۇزەگە اسىرۋ تۋرالى تاپ­سىر­ما بەرگەن بولاتىن. وسى ۋا­قىت ىشىندە مەملەكەت باسشىسى­نىڭ تاپسىرماسىن لايىقتى ورى­ن­داۋ ماقساتىندا بىرقاتار اۋقىم­دى، كەشەندى جۇمىستار اتقارىل­دى.
ەلباسى اتالعان باستامانىڭ حالقىمىزعا جاسالىپ وتىرعان جاقسىلىق ەكەنىن، بۇل جوبانى جۇزەگە اسىرۋدا اتۇستىلىككە جول بەرىلمەۋى كەرەكتىگىن ۇنەمى ايتىپ كەلەدى. سوندىقتان، جاۋاپ­كەر­شىلىگى وراسان باعدارلامانى جاساپ، جۇزەگە اسىرۋ ءۇشىن ءبىز بار­لىق تاجىريبە مەن كۇش-ءجى­گە­رىمىزدى، مۇمكىندىكتەرىمىزدى سارقا پايدالاندىق.
وسى ۋاقىت ىشىندە «حالىقتىق IPO» تۋرالى وتاندىق، حالىق­ارا­لىق ساراپشىلاردان باستاپ، رەسمي ورگان وكىلدەرى، ەكونوميكا، قار­جى ماماندارى اقپارات قۇرال­دارىندا سان الۋان پىكىرتالاس بول­دى. باعدارلامانى جاساۋ بارىسىندا ءبىز وسى تالقىلاۋلاردا اي­تىل­عان بارلىق ەسكەرتپە، ۇسى­نىس­تار­دى نازارعا الدىق.
«سامۇرىق-قازىنا» ۇلتتىق قو­رى باعدارلاما تۋرالى جان-جاقتى ناسيحاتتاپ قانا قويماي، جۇرتشى­لىق­تان كەلىپ تۇسكەن بارلىق ساۋال­دارعا مۇمكىندىگىنشە ەگجەي-تەگجەي­لى جاۋاپ بەرۋگە تىرىستى. ءوز باسىم وسى جالپىحالىقتىق جوباعا قا­تىستى اقپارات، تۇسىنىكتەمە قان­شا ايتىلىپ، جازىلسا دا ارتىقتىق ەتپەيدى دەپ ويلايمىن.
- ونىڭ ۇستىنە «حالىقتىق IPO» تەرمينى ءبىزدىڭ ومىرىمىزگە جا­ڭادان ەنىپ جاتقان ۇعىم عوي...
- جالپى، «IPO» ۇعىمى قازاق­ستاندىقتاردىڭ قۇلاعىنا تاڭسىق ءسوز بولىپ ەستىلگەنىمەن، الەم ەل­دە­رىنىڭ كوبىندە اينالىمعا ەنگەن ۇعى­­نىقتى تەرمين، ادال تابىس تا­بۋدىڭ ءبىر ءتاسىلى بولىپ تابىلادى. بۇل ءۇردىس وتكەن عاسىردىڭ 80-جىلدارى بريتانيادا باستاۋ السا، قا­زىر­گى كەزدە بۇكىل الەمگە كەڭىنەن قا­نات جايعان. حالىقارالىق ساراپ­شى­لاردىڭ مالىمەتىنە سۇيەنسەك، الەمدە ءتۇرلى كومپانيالاردىڭ ۇلە­سىنە يەلىك ەتەتىن ادامداردىڭ سانى 500 ميلليوننان اسادى.
- بىزدە ولارداعى باعدارلاما­لاردان وزگەرىس بار ما؟
- بار. قازاقستاندا «حالىقتىق IPO-عا» 100 پايىز مەملەكەت مەن­شى­گىندەگى نەمەسە اكتسيالارىن مەملەكەت يەمدەنىپ وتىرعان كومپانيالار شىعارىلادى. جانە ول كوم­پانيالاردىڭ اكتسيالارى ءبىرىنشى كەزەكتە قازاقستاننىڭ ازاماتتارىنا، سودان كەيىن قازاقستاندىق زەي­نەت­اقى جيناقتاۋ قورلارىنا عانا ساتىلادى.
ءوزىڭىز ويلاڭىزشى، بىزدە وسى­عان دەيىن قالاي بولىپ كەلدى؟ بۇعان دەيىن قازاقستاندا قور نارى­عىن­داعى قۇندى قاعازدارمەن جۇمىس ىستەۋگە قالىڭ جۇرتشىلىق تارتىلمادى نەمەسە ولاردىڭ بۇل تۋرالى ازدى-كوپتى مالىمەتى دە بولمادى. ءبىز ارى كەتسە ءۇي، كولىك ساتىپ الىپ، ارتىق اقشانى بانكتەرگە دەپوزيتكە سالۋمەن شەكتەلەتىنبىز. جاسىراتىنى جوق، تالايدىڭ اقشاسى ءالى دە جاتىن بولمەدەگى توسەكتىڭ استىندا نەمەسە سەيفتىڭ ىشىندە جاتىر عوي.
- باعدارلاما حالىقتىڭ پاي­دا­عا اسپاي، تەككە جاتقان سول قار­جىسىن تابىستى ورنالاستىرۋىنا سەپتىگىن تيگىزە مە؟
- «حالىقتىق IPO» باعدار­لا­ما­سىنا ۇركە قاراۋدىڭ قاجەتى جوق. ءبىزدىڭ حالقىمىز جاپپاي ساۋاتتى. سوندىقتان، اتالعان شارا تۋرالى مالىمەتتەر مەن قۇجاتتارعا ءبىر-ەكى كۇنىن ارناپ، مۇقيات تانىسىپ شىق­سا جەتكىلىكتى دەر ەدىم.
باعدارلاماعا قاتىسۋ، ياعني ءۇز­دىك­سىز تابىس تاۋىپ وتىرعان كاسىپ­ورىن­داردىڭ اكتسيالارىن يەلەنۋ ارقىلى قاراپايىم ازاماتتار تازا تابىس تابۋ مۇمكىندىگىنە، ءال-اۋقا­تى­نىڭ كوتەرىلۋىنە قول جەتكىزەدى. بۇل ءىس-شارا «حالىقتىق IPO» باع­دارلاماسىن جۇزەگە اسىرۋدىڭ تۇپكى ماقساتىمەن ۇندەسىپ جاتىر. ءبىزدىڭ ماقساتىمىز - قازاقستاننىڭ ءاربىر ازاماتىنا وتاندىق ءىرى كومپانيا­لار­دىڭ اكتسيالارىنا يەلىك ەتۋ مۇمكىندىگىن اشۋ. بۇل، ءوز كەزەگىندە، ازاماتتاردىڭ ەلدەگى ەكونوميكالىق ۇردىستەرگە تىكەلەي قاتىسۋىن قام­تاماسىز ەتەدى. حالىق ءوزىنىڭ جيعان قارجىسىن قۇندى قاعازدار نارى­عىنا ينۆەستيتسيالاۋ ارقىلى تابىسىن مولايتادى.
ەكىنشىدەن، ءار ازامات اتالعان باع­دارلاماعا قاتىسىپ، قور نارى­عىن دامىتۋعا جاناما ىقپال جاسايدى. IPO-عا شىعارىلعان كومپانيالار مەن اكتسيالارعا سۇرا­نىس­تىڭ ءوسۋى ينۆەستورلاردىڭ قاتارىن مەيلىنشە كوبەيتەدى.
ۇشىنشىدەن، كاسىپورىندار جاڭ­عىرتىلادى، ءوندىرىس كەڭەيىپ، جاڭا جۇمىس ورىندارىنىڭ اشىلۋىنا ءمۇم­كىندىك تۋادى. قازاقستانداعى ءىرى كومپانيالاردىڭ جۇمىس ىستەۋ ءتيىم­دىلىگىنە، اشىقتىعىنا قول جەت­كىزەتىن بولامىز.
مۇنىڭ ءبارى ەل ەكونوميكاسى­نىڭ دامۋىنا، ەل داۋلەتىنىڭ ۇل­عايۋىنا كەپىلدىك دەگەن ءسوز.
- «حالىقتىق IPO» باعدارلا­ما­سىنا قاتىسۋدىڭ ءتارتىبى، تالاپتارى تۋرالى اقپارات قۇ­رال­دارىندا بارلىعى دا ايتىلعان سياقتى. «ەگەمەن قازاقستان» گا­زە­تى دە بۇل باعدارلاما تۋرالى كەڭىنەن ناسيحات جۇمىسىن ءجۇر­گىزدى. ءسوز رەتىن پايدالانىپ، كە­زىندە ءبىزدىڭ ءوتىنىشىمىز بويىنشا «ەگەمەن قازاقستاننىڭ» وبلىس­تار­داعى مەنشىكتى تىلشىلەرىنىڭ جيىنىندا «سامۇرىق-قازىنا» وكىلىنىڭ رەداكتسياعا ارنايى كە­لىپ، مازمۇندى اڭگىمە وتكىزىپ بەر­گەنىن رازىلىقپەن ايتا كەتكىم بار. الايدا، وقىرماندارى­مىز­دان ءالى دە ءتۇرلى ساۋالدار ءتۇسىپ جاتادى. مىسالى، IPO باع­دار­لا­ماسىن جۇزەگە اسىرۋ ءۇشىن ال­عاش­قى بولىپ «قازترانسويل» كوم­پانياسىنىڭ تاڭدالۋ سەبەبى نەدە؟
- ءبىز وسى باعدارلامانى ازىرلەۋ بارىسىندا ۇزاق ۋاقىت بويى تەرەڭ تالداۋ، زەرتتەۋ جۇمىستارىن ءجۇر­گىزدىك. ءبىر عانا «سامۇرىق-قازىنا» قورىنىڭ 400 كومپانياسى ساراپتان وتكىزىلدى. ال ولاردىڭ ىشىنەن «حا­لىق­تىق IPO-عا» شىعارۋعا قارجى­لىق كورسەتكىشتەرى، تەحنيكالىق دايىندىعى ساي كەلەتىن كومپانيالاردى ىرىكتەۋ ءبىر كۇننىڭ شارۋاسى ەمەس. وسى جاۋاپتى شاراعا ۇكىمەت پەن «سامۇرىق-قازىنا» قورى، وزگە دە وتاندىق ماماندار، كومپانيالارمەن قاتار، الەمدىك دەڭگەيدەگى ساراپتامالىق ورتالىقتار تارتىلدى. UBS ينۆەستيتسيالىق بانكى، Ernest and Young, White and Case, Price Waterhouse Coopers سەكىلدى حالىقارالىق دەڭگەيدەگى اتاقتى كومپانيالار جۇمىس ىستەدى. ولار دا وزدەرىنىڭ قورىتىندىسى مەن كە­پىل­دەمەسىن بەرىپ وتىر. ناتيجەسىندە IPO-عا شىعارۋعا لايىقتى 9 كومپانيا ىرىكتەلىپ الىندى. وسى ساراپ­تاۋ­لار نەگىزىندە، العاشقى بولىپ «قازترانسويل» اكتسيونەرلىك قو­عا­مىن «حالىقتىق IPO-عا» شىعارۋ تۋ­رالى وتە ماڭىزدى شەشىم قابىل­دانعان. سوندىقتان، «قازترانس­ويل» كومپانياسىن IPO باعدار­لا­ما­سىنىڭ پيونەرى دەپ قانا ەمەس، ازىرگە لايىقتىسى دەپ قابىلداسا دا بولادى.
سونىمەن، وتكەن جەتىدە ءبىز «قاز­ترانسويل» اق-تىڭ اكتسيالار باعاسىن، سانىن، قۇرىلىمىن بەكى­تىپ، ساتۋعا شىعاردىق. «سامۇرىق-قازىنا» اكتسيونەرلىك قوعامى ديرەكتورلار كەڭەسى ماقۇلداعان اك­تسيا­لاردىڭ سانى مەن باعاسىن ەسكەرە وتىرىپ، «قازترانسويل» اق-تىڭ ورنالاستىرىلاتىن اكتسيالارى 28 ملرد. تەڭگەنى (186 ملن. دوللار) قۇرايتىن بولادى. ساتۋعا شى­عا­رىل­عان اكتسيالار سانى - 38 463 559 بولسا، ۇكىمەت بەكىتكەن ءبىر اكتسيا قۇنى - 725 تەڭگە. باعدارلاما ايا­سىن­دا ءوز ازاماتتارىمىزعا بەرىلگەن ارتىقشىلىقتاردى، ءتيىمدى ينۆەستيتسيا مەن ودان تۇسەتىن تابىستى ەسكەرسەك، اكتسيا قۇنى ءبىزدىڭ ازاماتتار ءۇشىن قولجەتىمدى باعا دەپ ويلايمىن.
ورايى كەلگەندە سۇراعىڭىزدى تولىقتىرا كەتەيىن، «حالىقتىق IPO» باعدارلاماسى مۇنىمەن شەك­تە­لىپ قالمايدى. 2013 جىلدان باس­تاپ «KEGOC» اق، «Air Astana» اق، «نمسك «كازمورترانسفلوت» اق، «سامرۋك-ەنەرگو» اق جانە «قازترانسگاز» اق كومپانيالارىن IPO-عا شىعارۋدى كوزدەپ وتىرمىز.
2014-2015 جىلدارى «كازاقستان تەمiر جولىن»، «كازتەمىرترانستى»، «قازاتومپرومدى»، «قازمۇناي­گاز­دى» IPO-عا شىعارۋ جوسپارلانعان.
- باعدارلاما 6 قاراشا كۇنى باستالدى. ول كۇنى اقتاۋدا ءىسس­ا­پاردا ەدىم. جۋرناليستىك اۋەس­تىك­پەن اكتسيالارعا جازىلۋ ءجۇرىپ جات­قان جەرگە از عانا ۋاقىتقا سوعا كەتكەنبىز. شىنى كەرەك، مە­نى IPO-عا قاتىسۋشىلاردىڭ بەل­سەندىلىگى تاڭ قالدىردى. استانا قالاسىندا ادامدار تاڭ اتپاستان كەزەكتە تۇرعانىن جۇرت ايتىپ جاتىر. العاشقى كۇندەردەگى ءنا­تي­جەگە كوڭىلىڭىز تولا ما؟
- ناتيجە تۋرالى ايتۋ ءالى ەرتەرەك شىعار. جاڭا باستاپ جاتىرمىز عوي. بىراق، ءسىز ايتقانداي، «حا­لىق­تىق IPO» باعدارلاماسىنىڭ العاش­قى كۇندەرىندەگى ازاماتتارىمىز­دىڭ بەلسەندىلىگى كوڭىل قۋانتادى. بۇل، مەنىڭشە، باعدارلاماعا دەگەن سەنىمنىڭ نەمەسە ناسيحات، ءتۇسىندىرۋ جۇمىستارىنىڭ ارقاسى عانا ەمەس، ءبىزدىڭ حالقىمىزدىڭ ەكونوميكالىق ساۋاتىنىڭ، مادەنيەتىنىڭ كوتەرىل­گەنىن دە كورسەتەدى.
ءبىر عانا مىسال. «حالىقتىق IPO»-عا سۇرانىس كىتابى اشىل­عان­نان كەيىن-اق، ءبىر كۇننىڭ ىشىندە، 184,4 ملن. تەڭگەگە وتىنىشتەر ءتۇس­كەن. اكتسيالار ساتىلىمى 5 جەل­توق­سانعا دەيىن جالعاساتىنىن ەسكەرسەك، بۇل - وتە جاقسى كورسەتكىش.
ارينە، كەز كەلگەن ازامات وسى اكتسياعا قاتىسۋ، قاتىسپاۋ تۋرالى شەشىمدى ءوزى قابىلداۋى كەرەك. بۇل، قانشا ايتقانمەن، بيزنەس. ال بيزنەس دەگەن - تاۋەكەل. سوندىقتان، ءار ادام نەگە، نە ءۇشىن قاتىساتىنىن، قانشا قارجى قۇيىپ، قانشا اكتسيا ساتىپ الاتىنىن، ودان كەلەتىن تابىس پەن تاۋەكەلدىڭ ارا سالماعىن ەكشەپ، جەتى ولشەپ، ءبىر كەسىپ الۋى كەرەك.
- سوندا بۇل تاۋەكەل نەدەن تانىلادى؟
- ماسەلەن، اكتسيا ساتىپ الۋعا جۇمسالاتىن قارجى ساتىپ الۋ­شى­نىڭ، ونىڭ وتباسىنىڭ جاعدايىنا كەرى اسەرىن مەيلىنشە تيگىزبەۋى كەرەك. ءسىزدىڭ 725 تەڭگە سالىپ، ءبىر اكتسيا الۋىڭىزعا بولادى. بىراق ودان بالەندەي پايدا تابام دەۋگە بولمايدى. 725 تەڭگە سالىپ، ءبىر جىلدا 200 تەڭگە پايدا تاپساڭىز، ول قان­داي بيزنەس؟ مەنىڭشە، كەم دەگەندە 20-50 اكتسيا بولعانى دۇرىس.
- سونىڭ وزىندە تىم از سوما سياقتى. اكتسيونەر اتانۋ ءۇشىن شامامەن وتىز مىڭ تەڭگەدەي سالۋدىڭ ءوزى جەتكىلىكتى مە؟
- كەم دەگەندە دەپ تۇرمىن عوي. ارينە، كوبىرەك سالىنعانى جاقسى. بىراق، تىم شەكتەۋ قويا بەرسەك، بۇل حالىقتىق باعدارلاما بولا ما؟
ەكىنشى جاعىنان، اكتسيا دۇكەنگە بارىپ ساتىپ الا سالاتىن زات ەمەس. اكتسيانى كومپانيا ارقىلى، بروكەر ارقىلى الاسىز. ول ءۇشىن IPO تۋرالى جان-جاقتى مالىمەت بەرەتىن halyk-ipo.kz جانە kase.kz ءتارىزدى ارنايى سايتتارعا كىرىپ، بروكەرلەردىڭ تىزىمىمەن تانىسقان ءجون. ارينە، ولاردىڭ كوبى الماتى مەن استانا قالالارىندا. جەر-جەردە وكىل­دىك­تەرى بولماۋى مۇمكىن. سوندىقتان، ءبىز بارلىق وڭىردە وكىلدىكتەرى بار «قازپوشتا» كومپانياسىن وسى برو­كەرلىك قىزمەتكە تارتىپ وتىرمىز. ولاردىڭ 3 مىڭ 49 بولىمشەسى بار جانە ءبارى دە تولىق جابدىقتالعان. سونداي-اق، جەرگىلىكتى جەردەگى تۇر­عىندار حالىقتىق بانكتىڭ كەز كەلگەن بولىمشەسى ارقىلى دا IPO-عا قاتىسا الادى. ءبىر سوزبەن ايتقاندا، باعدارلاماعا قاتىسۋعا نيەت ءبىل­دىر­گەن ادامدار ءۇشىن بارلىق جاعداي جاسالعان، بارلىق مالىمەتتەر كوز الدىندا.
- دەگەنمەن، مەنىڭشە، جۇرت­تىڭ ءبارى باعدارلامانىڭ ءمانىسىن تولىق تۇسىنە قويدى دەۋ قيىن شىعار?
- ءتۇسىندىرۋ جۇمىستارىن ءبىز توق­تاتپايمىز. باعدارلاما وپەراتورى رەتىندە «سامۇرىق-قازىنا» وكىل­دەرى بارلىق ايماقتارعا بارىپ، حالىقپەن، ناقتى ينۆەستورلارمەن كەزدەسۋلەر وتكىزۋدى جالعاستىراتىن بولادى. وسى سۇحباتتى پايدالانىپ، مەن بارشا قازاق­ستاندىق­تار­دى «حالىقتىق IPO» باعدارلا­ما­سى­نا بەلسەنە قاتىسۋعا شاقىرا­مىن. باعدارلاماعا قاتىستى بار­لىق سۇراقتارعا جاۋاپتى ارنايى اشىلعان halyk-ipo.kz سايتىنان الۋعا بولادى. نەمەسە 8 800 080 5070 ءنومىرى ارقىلى تەگىن تەلەفون سوعىپ، بىلۋگە بولادى. سونداي-اق، «سامۇرىق-قازىنانىڭ» كەز كەلگەن قىزمەتكەرى وسى باعدارلامعا قاتىس­تى سۇراقتارعا جاۋاپ بەرىپ، كومەك قولىن سوزۋعا ءاردايىم ءازىر.

ساۋىتبەك ابدراحمانوۆ