"937 ملرد تەڭگەدەن اسا سوماعا دەلدالدىق سحەما مەن قارجىلىق زاڭ بۇزۋشىلىقتار انىقتالدى. ونىڭ 123 ملرد تەڭگەسىن قۇقىق قورعاۋ ورگاندارى انىقتادى" دەدى QazaqGaz كومپانياسىنىڭ قازىرگى توراعاسى سانجار جاركەشوۆ 6 ماۋسىمدا ماجىلىستەگى ۇكىمەت ساعاتىندا.
ونىڭ سوزىنشە، كومپانيا قىزمەتىنە بايلانىستى تولىق اۋديتتىك تەكسەرىس جۇرگىزىلگەن. جاركەشوۆ 123 ملرد تەڭگە بويىنشا قارجىلىق زاڭناما بۇزىلعانىن ايتىپ، QazaqGaz كومپانياسىندا "كوپ ماسەلە جينالىپ قالعان" دەدى.
ول ۇكىمەتتىڭ شەشىمىمەن "قازترانسگاز" اتاۋىن QazaqGaz دەپ وزگەرىپ، ۇلتتىق كومپانيا ستاتۋسىن العانىن، "سامۇرىق قازىنا" قورىنىڭ قۇرامىنا كىرگەنىن دە اتاپ ءوتتى.
جەرگىلىكتى باسىلىمداردىڭ جازۋىنشا، كومپانيا قۇرامى ناۋرىز ورتاسىندا تولىق جاڭارعان. نازارباەۆتىڭ قىزى داريعا نازارباەۆانىڭ بەيرەسمي كۇيەۋى سانالاتىن قايرات شارىپباەۆ بۇل كومپانيانى 2014 جىلدان بەرى باسقارىپ كەلگەن ەدى. قاڭتار وقيعاسىنان كەيىن نۇرسۇلتان نازارباەۆتىڭ كۇيەۋبالالارى، ونىڭ ىشىندە شارىپباەۆ تا بار، قىزمەتتەن كەتكەن ەدى.
شارىپباەۆ توراعالىقتان كەتكەن سوڭ كومپانيانى ۋاقىتشا باسقارعان يبۋللا سەرديگە وتكەن اپتادا ىزدەۋ جاريالاعان ەدى. جەرگىلىكتى باسىلىمداردىڭ جازۋىنشا، سەردي كەيىنگى 20 جىلدا ءبىراز جەردە ماڭىزدى قىزمەتتەردە بولعان.
بيىل قاڭتاردا جاڭاوزەندە سۇيىتىلعان گاز باعاسىنىڭ قىمباتتاۋىنان سوڭ جۇرت نارازىلىققا شىعىپ، سوڭى تارتىپسىزدىككە ۇلاسقان ەدى. 5 قاڭتاردا پرەزيدەنت قاسىم-جومارت توقاەۆ "سۇيىتىلعان گاز باعاسىنىڭ قىمباتتاۋىنا ەنەرگەتيكا مينيسترلىگىن، "قازمۇنايگاز" جانە وسى QazaqGaz كومپانياسىن ايىپتاعان" ەدى.
توقاەۆ كەمى 238 ادام قازا بولعان قاڭتار وقيعاسىنىڭ باستى سەبەبىن "الەۋمەتتىك تەڭسىزدىك" جانە "باي مەن كەدەي اراسىنداعى ايىرماشىلىقتىڭ اراسىنداعى الشاقتىق" دەگەن. قازاقستان پرەزيدەنتى ەلدەگى بايلىقتىڭ جارتىسىن 162 ادام يەلەنىپ وتىر دەپ مالىمدەگەن ەدى.
Abai.kz
