بيىل مەكتەپ بىتىرۋشىلەر سانى رەكوردتىق دەڭگەيگە جەتكەن. وسى ايدا رەسپۋبليكا بويىنشا مەكتەپتى 17 مىڭنان استام تۇلەك ءبىتىرىپ شىقتى. ال، 3 ملن 500 مىڭ وقۋشى جازعى دەمالىسقا شىقتى.

بيىلعى سوڭعى قوڭىراۋ ءراسىمى ەرەكشە. سەبەبى، مەكتەپ وقۋشىلارى ەكى جىل بويىنا پاندەمياعا بايلانىستى مەكتەپ ءبىتىرۋ سالتاناتىن ونلاين وتكىزىپ كەلدى. تۇلەكتەر 11 جىل بويى ءبىلىم العان ىستىق ۇيا مەكتەپتەرىمەن قيماي قوشتاسۋدا.  بولاشاققا ۇلكەن ءۇمىت پەن سەنىم ارقالاعان ولارعا الدا مول جاۋاپكەرشىلىك جۇكتەلگەن.

تۇلەكتەردىڭ ءبىتىرۋ سالتاناتىنا ىزۋ-قىزۋ كىرىسكەن مەكتەپتەردىڭ ءبىرى- الماتىداعى لومونوسوۆ اتىنداعى №38 مەكتەپ-گيمنازيا. مۇندا 1880 وقۋشى وقيدى. ونىڭ 77-ءسى مەكتەپ ءبىتىرۋشى تۇلەك. وقۋ جىلى اياقتالماي جاتىپ، ءبىلىم ورداسىنداعى 18 تالاپكەر ستۋدەنت اتانىپ ۇلگەرگەن. شەتەلدىڭ ءتۇرلى ۋنيۆەرسيتەتىنەن جولداما ۇتىپ العان.

«مەن بيوتەحنولوگيا سالاسىنا وقۋعا ءتۇسۋدى جوسپارلاپ وتىرمىن. بولاشاقتا زەرتحانادا جۇمىس ىستەگەم كەلەدى. بۇل ماماندىق مەنىڭ بالا كۇنگى ارمانىم»، – دەدى م. ۆ. لومونوسوۆ اتىنداعى مەكتەپ-گيمنازياسىنىڭ تۇلەگى اينەل دوساليەۆا.

بيىل قالا بويىنشا مەكتەپ بىتىرۋشىلەر سانى 12 مىڭ 355. ونىڭ 613-ءى «التىن بەلگىگە» ۇمىتكەر. الدا ولار ءۇشىن جاۋاپتى ەمتيحان. 11 جىل وقىعان بىلىمدەرىن ۇلتتىق بىرىڭعاي تەستىلەۋدە سىنايدى.

«بيىلعى جىلدىڭ جاقسى جاڭالىقتارىنىڭ ءبىرى – مەكتەپ ءبىتىرۋشى تۇلەكتەرىمىز ەكى رەت ۇبت تاپسىرۋ ارقىلى گرانتقا يە بولا الادى. تۇلەكتەر 16 مامىردان باستاپ رەسۋبليكا بويىنشا ۇبت تاپسىرىپ جاتىر. ول 5 شىلدەگە دەيىن جالعاسادى. وسى ەكى ارالىقتا مەكتەپ ءبىتىرۋشى تۇلەكتىڭ گرانت الۋعا ەكى رەت مۇمكىندىگى بولادى»، – دەدى جەتىسۋ اۋداندىق ءبىلىم ءبولىمىنىڭ باسشىسى سالتانات قۇسايىنوۆا.

ايتا كەتەيىك، بيىل ەلىمىزدىڭ بۇكىل ءبىلىم ورداسىندا جازعى مەكتەپتەر ۇيىمداستىرىلعان. ءبىلىم مينيسترلىگىنىڭ شەشىمىمەن 26 مامىر مەن 17 ماۋسىم ارالىعىندا وقۋشىلار ساباققا ءوز ەركىلەرىمەن كەلە الادى. ماقسات – ءبىلىم ساپاسىن ارتتىرۋ. وسىلايشا، پاندەميا مەن شەكتەۋ شارالارى كەزەڭىندە جىبەرىلگەن بىلىمدەگى ولقىلىقتاردىڭ ورنىن تولتىرۋعا مۇمكىندىك تۋادى.

Abai.kz