رەسەيدىڭ تاۋەلسىز ۋكراينا ەلىنە باسىپ كىرىپ، سوعىس جۇرگىزىپ جاتقانىنا 114 كۇن بولدى. رەسەي اسكەرى ەلدى مەكەندەردى كۇشتەپ باسىپ الۋعا تىرىسۋدا. ۋكراينا قارۋلى كۇشتەرى ولىسپەي بەرىسپەيمىز دەپ, تاباندىلىقپەن مەملەكەتىن قورعاپ جاتىر.

بۇۇ-نىڭ مالىمەتى بويىنشا، سوعىس باستالعان كۇننەن بەرى 4481 بەيبىت ادام قازا بولىپ، 5565 ادام جارالانعان. قازا تاپقاندار ىشىندە 2611 ادام لۋگانسك مەن دونەتسك وبلىستارىنىڭ تۇرعىندارى ەكەن.

ۇلىبريتانيا قورعانىس شتابىنىڭ باسشىسى ەنتوني راداكيننىڭ ايتۋىنشا، رەسەي ۋكرايناداعى سوعىستا ستراتەگيالىق جاعىنان جەڭىلدى. «كورشى ەلگە باسىپ كىرۋ - رەسەيدىڭ ەڭ ۇلكەن قاتەلىگى بولدى»، -دەيدى ول. دەگەنمەن راداكين الداعى اپتادا رەسەيدىڭ تاكتيكالىق جەڭىسكە جەتەتىنىن جوققا شىعارمادى.

«رەسەي الاقانداي اۋماقتى جاۋلاپ الۋ ءۇشىن قارۋلى كۇشتەرىنىڭ تورتەن ءبىرىن قۇربان ەتتى. رەسەي تەحنيكاسى ەسكى، كۇنىنە ەكى، ءۇش نە بەس كيلومەتر عانا العا جىلجيدى. رەسەي جەڭىلىسكە ۇشىرايدى. ۇلىبريتانيا كيەۆتى الداعى ۋاقىتتا دا قارۋ-جاراقپەن قامتاماسىز ەتۋىن توقتاتپايدى»، - دەدى  ۇلىبريتانيا قورعانىس شتابىنىڭ باسشىسى.

كۇنى كەشە گەرمانيا كانتسلەرى ولاف شولتس، فرانتسيا پرەزيدەنتى ەممانۋەل ماكرون، يتاليا پرەمەر-ءمينيسترى ماريو دراگي جانە رۋمىنيا پرەزيدەنتى كلاۋس يوحاننيس كيەۆتىڭ جانىنداعى يرپەن قالاسىنا باردى. ساپار بارىسىندا ولارعا ۋكراينانىڭ قاۋىمداستىقتار مەن اۋماقتاردى دامىتۋ ءمينيسترى الەكسەي چەرنىشەۆ ەرىپ ءجۇردى.

رەسەي اسكەرلەرى يرپەننەن كەتكەننەن كەيىن، وندا 300-گە جۋىق بەيبىت تۇرعىننىڭ ءمايىتى تابىلعان. ۋكراينانىڭ جايىن ءوز كوزىمەن كورگەن رۋمىنيا پرەزيدەنتى كلاۋس يوحاننيس ءوزىنىڭ تۆيتتەر پاراقشاسىندا: «رەسەيدىڭ زاڭسىز اگرەسسياسىن توقتاتۋ كەرەك»، - دەپ جازدى.

گەرمانيا كانتسلەرى ولاف شولتس: «ماسكەۋدى ۋكراينانىڭ اۋماعىن باسىپ الام دەگەن پيعىلىنان اينىتۋ كەرەك»، - دەدى. ول رەسەيگە قارسى سانكتسيالار ماسكەۋ ۋكراينامەن ادىلەتتى كەلىسىمگە كەلگەنشە جالعاساتىنىن ايتتى.

ۋكراينا پرەزيدەنتى ۆلاديمير زەلەنسكي گەرمانيا، فرانتسيا، يتاليا جانە رۋمىنيا ەلدەرى باسشىلارىنىڭ كيەۆكە ساپارىن «تاريحي كۇن» دەپ اتادى. ولارعا ۋكراينانىڭ ەۋروپالىق وداققا كىرۋ تۋرالى ءوتىنىشىن قولداعانى ءۇشىن العىس ايتتى جانە ۋكرايناعا كوبىرەك قارۋ-جاراق بەرۋىن سۇرادى.

ۋكراينانىڭ سىرتقى ىستەر ءمينيسترى دميتري كۋلەبا: «گەرمانيا كانتسلەرى ولاف شولتسكە ەلدىڭ جاعدايى قاتتى اسەر ەتىپ، ول ەۋروپالىق كەڭەستە ۋكراينانىڭ ەۋروپالىق وداققا كىرۋىن قولدايتىنىن ءبىلدىردى»،  -دەدى. كۋلەبا ۋكراينانىڭ ەۋروپالىق وداققا قازىرگى كۇنى تولىق مۇشەلىككە وتە المايتىنىن بىلەدى. بىراق «ەۋروپا ەلدەرىنىڭ ۋكراينا-ەۋروپالىق ەل»، - دەپ مويىنداعانى كەرەك دەيدى مينيستر.

ال، ماسكەۋ جاقتان رەسەيدىڭ سىرتقى ىستەر ءمينيسترى سەرگەي لاۆروۆ BBC-گە سۇحبات بەرىپ، «ءبىز ۋكرايناعا باسىپ كىرگەن جوقپىز»، دەپتى.

لاۆروۆتىڭ ايتۋىنشا، باتىس ۋكراينانى ناتو-عا تارتىپ، قىلمىستىق ىسكە باردى. ال، رەسەي باتىستىڭ بۇل قاتەلىگىن باسقاشا ءتۇسىندىرۋ جولىن تاپپاي، «ارنايى وپەراتسيانى» باستاعان.

«چەرنيگوۆ وبلىسىنىڭ ياگودنوە اۋىلىندا رەسەي اسكەري كۇشتەرى 28 كۇن بويى 360 ادامدى، ونىڭ ىشىندە 74 بالانى جانە 5 مۇگەدەك ادامدى مەكتەپ جەرتولەسىندە ۇستادى. دارەتحانا جوق، سۋ جوق. 10 قاريا قايتىس بولدى. بۇل ناتسيزمگە قارسى كۇرەس پە؟» - دەگەن ءجۋرناليستىڭ سۇراعىنا لاۆروۆ: «حالىقارالىق شەنەۋنىكتەر باتىستىڭ قىسىمىنا ۇشىراعان سوڭ، كوبىنەسە «جالعان» جاڭالىقتاردى تاراتادى»، - دەپ جاۋاپ بەردى.

سوندا رەسەي «سۇتتەن اق، سۋدان تازا ما؟» - دەگەن سۇراققا رەسەيلىك مينيستر: «رەسەي سۇتتەن اق سۋدان تازا ەمەس. رەسەيدىڭ بار بولمىسى وسى. ءبىز ءوزىمىزدىڭ قانداي ەكەنىمىزدى كورسەتۋدەن ۇيالمايمىز»، - دەدى.

ال، دحر-عى ءولىم جازاسىنا كەسىلگەن بريتاندىقتار تۋرالى لاۆروۆ: «ولار – تىڭشىلار، ولاردىڭ تاعدىرىن بانان مەملەكەتىنىڭ سوتى شەشەدى»، - دەدى.

Abai.kz