وزبەكستان پرەزيدەنتى شاۆكات ميرزيوەۆ حالقى شەرۋگە شىققان نۇكىس قالاسىنا باردى. ول قاراقالپاقستان جوعارعى كەڭەس دەپۋتاتتارىمەن كەزدەسىپ “جاڭا وزبەكستان مەن جاڭا قاراقالپاقستاندى” قۇرۋعا ۋادە بەردى.

شاۆكات ميرزيوەۆ پارلامەنت دەپۋتاتتارىمەن بىرگە قاراقالپاقستان حالقىنىڭ الدىندا ءسوز سويلەپ، كونستيتۋتسيالىق زاڭ جوباسى جالپىحالىقتىق تالقىلاۋدان وتەتىنىن جانە ودان ءارى جەتىلدىرۋ ءۇشىن زاڭ شىعارۋشى ورگاننىڭ قاراۋىنا بەرىلەتىنىن ايتتى. تەك وسىدان كەيىن عانا جوبا رەسپۋبليكالىق رەفەرەندۋمعا شىعارىلىپ، بۇل ساۋالعا قاتىستى حالىقتىڭ ەركىن داۋىس بەرەتىنىن مالىمدەدى.

«وسىدان سوڭ وزبەكستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزىلەدى»، – دەپ اتاپ ءوتتى ميرزيوەۆ.

ءوز سوزىندە ەل حالقىنىڭ پارىزى – بىرلىك پەن بەيبىتشىلىكتى، تۇراقتىلىقتى ساقتاۋ ەكەنىن ايتتى.

«كونستيتۋتسيالىق رەفورمانىڭ باستى ماقساتى – وسى. ءبىز بىرگە مىندەتتى تۇردە جاڭا وزبەكستان مەن جاڭا قاراقالپاقستاندى قۇرامىز. وسى باعىتتاعى بارلىق رەفورمالار مەن تالقىلاۋلار تەك دەموكراتيالىق جولمەن ىسكە اسۋى كەرەك»، – دەپ قوستى ول.

سونداي-اق وزبەكستان پرەزيدەنتى قاراقالپاقستان رەسپۋبليكاسىنىڭ قۇقىقتىق مارتەبەسى وزگەرىسسىز قالۋى كەرەگىن مالىمدەدى.

Abai.kz