ءال-فارابي اتىنداعى قازۇۋ-دا قىرعىزستاننىڭ بۇرىنعى پرەزيدەنتى اسقار اقاەۆ ءدارىس وتكىزدى. ول سونداي-اق قر ۇلتتىق عىلىم اكادەمياسىنا مۇشە بولىپ قابىلداندى.

دامۋشى ەلدەرگە ساراپتاما ۇسىنعان پروفەسسور اقاەۆ «ەندىگى ەڭ قيىن مىندەت – تەحنولوگيالىق پروگرەستى مودەلدەۋ» دەيدى. عالىمنىڭ ءوزى تسيفرلىق داۋىرگە ارنالعان وندىرىستىك فۋنكتسيانى ىسكە اسىرىپ وتىر.

«بۇل باعدارلامانىڭ اياسىندا كوپ نارسەنىڭ باسى شەشىلدى. پروفەسسور اققاەۆتىڭ لەكتسيالارىندا ول ءوزىنىڭ بولاشاققا دەگەن كوزقاراسىن ءبىلدىرىپ جاتىر. دايەكتى تۇردە، ماتەماتيكادا دالەلدەنگەن، كومپيۋتەردە مودەلدەنگەن قۇبىلىستاردى بايانداپ جاتىر»، – دەدى فيزيكا - ماتەماتيكا عىلىمدارىنىڭ دوكتورى، پروفەسسور ءۋاليحان ابدىبەكوۆ.

ارنايى فورمۋلالار ارقىلى فۋنكتسيالىق قىزمەتتى تۇسىندىرگەن دارىسكەردى تىڭداۋعا وقىتۋشى-پروفەسسورلار مەن اكادەميكتەر، عالىمدار قاتىستى. ولار وسىمەن اتالعان باعىتتاعى ەكىنشى دارىسپەن تانىسىپ وتىر. بۇعان دەيىن كوشباسشىلىق ساباقتىڭ مازمۇنى «ەجەلگى داۋىردەگى دەموگرافيالىق دامۋ كورسەتكىشى مەن ادامزاتتىڭ بولاشاعىنا» ارنالعان.

«ءبىز ءۇشىن، اسىرەسە گۋمانيتارلىق عىلىم وكىلدەرىنە پروفەسسور اقاەۆ ايتقان الەۋمەتتىك ماسەلەلەر وتە ماڭىزدى. بۇل تەك ءبىر ەل ەمەس، جاھان مەملەكەتتەرىنە ورتاق تاقىرىپ. ال وسىنىڭ ءبارىن كوپشىلىككە شەبەر جەتكىزە بىلگەن اسقار مىرزانىڭ بىلىكتىلىگى ءوز الدىنا ءبىر توبە بولىپ تۇر»، – دەدى تاريح عىلىمدارىنىڭ دوكتورى، پروفەسسور جانات قۇنداقباەۆا.

كوپشىلىككە كوشباسشىلىق ءدارىسىن وتكىزگەن اسقار اقايۇلى بۇگىندە لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە قىزمەت اتقارادى.

Abai.kz