5 شىلدەدە نۇر-سۇلتان قالاسى مامانداندىرىلعان اۋدانارالىق تەرگەۋ سوتى "اسا ءىرى كولەمدە اقشا بوپسالادى" دەپ كۇدىككە ىلىنگەن جۋرناليست ماحامبەت ءابجاندى ەكى ايعا قاماۋ تۋرالى سانكتسيا شىعاردى. بۇل تۋرالى ازاتتىققا سىلتەمە جاساپ Abai.kz حابارلايدى. 

سوت ونىڭ ادۆوكاتىنىڭ ءجۋرناليستى ءۇي قاماققا شىعارۋ تۋرالى ارىزىن قاناعاتتاندىرمادى. بۇل تۋرالى ازاتتىققا ءابجاننىڭ ادۆوكاتى باۋىرجان ازانوۆ مالىمدەدى.

- سوت تەك كەشكى توعىزعا تاياۋ اياقتالدى. ونى ۇيقاماققا شىعارۋ تۋرالى ءوتىنىشىمىزدى قاناعاتتاندىرمادى. تەرگەۋ ورگانى ونى ىسكە كەدەرگى كەلتىرۋى، جاسىرىنۋى مۇمكىن دەپ سانايدى، - دەدى ادۆوكات.

ماحامبەت ابجانعا قاتىستى تەرگەۋ سوتى 4 شىلدە بولاتىنى ايتىلىپ، ۋاقىتى بەلگىلەنگەنىمەن بەلگىسىز سەبەپتەرمەن وتپەي قالعان ەدى.

39 جاستاعى جۋرناليست ءارى بلوگەر ماحامبەت ءابجاندى سىبايلاس جەمقورلىققا قارسى ءىس-قيمىل اگەنتتىگى 3 شىلدە تاڭەرتەڭ تۇتقىنداعان. اگەنتتىك ول ءبىر كاسىپكەردەن 50 ميلليون تەڭگە بوسپاسالادى دەپ حابارلاعان. ءابجان قاماۋعا الىناردان ەكى كۇن بۇرىن تەلەگرام كانالىندا ءوزىن قارالايتىن جالعان اقپاراتتار تارالىپ جاتقانىن جازعان ەدى.

بۇل - ماحامبەت ابجانعا قاتىستى قوزعالعان ءبىرىنشى ءىس ەمەس. قاڭتار وقيعاسىنان سوڭ ونى "كوپە-كورىنەۋ جالعان اقپارات تاراتتى", "جەكە ومىرگە قول سۇقپاۋ جانە دەربەس دەرەكتى قورعاۋ زاڭىن بۇزدى" دەپ ايىپتاپ، قىلمىستىق ءىس قوزعالعان. كەيىن بۇل ىستەر توقتاتىلعان ەدى. ول 2017 جىلى "الاياقتىق" بابىمەن دا ءۇش جارىم جىلعا سوتتالعان. ءابجان قازتاگ اگەنتتىگىندە، Orda.kz, ۇلىس مەديا سايتتارىندا جۋرناليست بولىپ جۇمىس ىستەگەن. ونىڭ Abzhannews دەپ اتالاتىن تەلەگرام كانالى دا بار.

Abai.kz