5 шілдеде Нұр-Сұлтан қаласы мамандандырылған ауданаралық тергеу соты "аса ірі көлемде ақша бопсалады" деп күдікке ілінген журналист Махамбет Әбжанды екі айға қамау туралы санкция шығарды. Бұл туралы Азаттыққа сілтеме жасап Abai.kz хабарлайды. 

Сот оның адвокатының журналисті үй қамаққа шығару туралы арызын қанағаттандырмады. Бұл туралы Азаттыққа Әбжанның адвокаты Бауыржан Азанов мәлімдеді.

- Сот тек кешкі тоғызға таяу аяқталды. Оны үйқамаққа шығару туралы өтінішімізді қанағаттандырмады. Тергеу органы оны іске кедергі келтіруі, жасырынуы мүмкін деп санайды, - деді адвокат.

Махамбет Әбжанға қатысты тергеу соты 4 шілде болатыны айтылып, уақыты белгіленгенімен белгісіз себептермен өтпей қалған еді.

39 жастағы журналист әрі блогер Махамбет Әбжанды Сыбайлас жемқорлыққа қарсы іс-қимыл агенттігі 3 шілде таңертең тұтқындаған. Агенттік ол бір кәсіпкерден 50 миллион теңге боспасалады деп хабарлаған. Әбжан қамауға алынардан екі күн бұрын телеграм каналында өзін қаралайтын жалған ақпараттар таралып жатқанын жазған еді.

Бұл - Махамбет Әбжанға қатысты қозғалған бірінші іс емес. Қаңтар оқиғасынан соң оны "көпе-көрінеу жалған ақпарат таратты", "жеке өмірге қол сұқпау және дербес деректі қорғау заңын бұзды" деп айыптап, қылмыстық іс қозғалған. Кейін бұл істер тоқтатылған еді. Ол 2017 жылы "алаяқтық" бабымен да үш жарым жылға сотталған. Әбжан ҚазТАГ агенттігінде, Orda.kz, Ұлыс медиа сайттарында журналист болып жұмыс істеген. Оның Abzhannews деп аталатын телеграм каналы да бар.

Abai.kz