مينەرال تىڭايتقىشتار وندىرەتىن "قازفوسفات" زاۋىتى باسشىلىعىنا قاتىستى سوتقا دەيىنگى تەرگەۋ امالدارى باستالدى دەپ حابارلادى قارجى مونيتورينگ اگەنتتىگى.

قىلمىستىق ءىستى 13 شىلدەدە جامبىل وبلىسىنىڭ ەكونوميكالىق تەرگەۋلەر دەپارتامەنتى تىركەگەن. "مونوپوليا قىزمەتى" بابى بويىنشا تەرگەۋ ايماقتىق باسەكەنى قورعاۋ جانە دامىتۋ دەپارتامەنتىنىڭ قورىتىندىسى نەگىزىندە باستالعان.

قارجى مونيتورينگ اگەنتتىگىنىڭ حابارلاۋىنشا، "امموفوستى" قىمباتقا ساتۋ ارقىلى "زاڭسىز تابىس تاۋىپ", "مونوپوليا جاعدايىن اسىرا پايدالانۋ" فاكتىسى تىركەلگەن.

پرەزيدەنت قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا تىڭايتقىش زاۋىتى ۇلەستەس كومپانياعا ءونىمىنىڭ ەداۋىر بولىگىن ساتىپ، ءوز كەزەگىندە ول ونى 30 پايىزعا قىمباتتاتىپ ساتقانىن ايتقان.

"قازفوسفات" زاۋىتىن ءماجىلىستىڭ بۇرىنعى سپيكەرى نۇرلان نىعماتۋليننىڭ ۇلى نۇرحان نۇرلانوۆ باسقارادى.

قاڭتار وقيعاسىنان كەيىن ەكس-پرەزيدەنت نۇرسۇلتان نازارباەۆقا جاقىن بىرقاتار جوعارى لاۋازىمدى تۇلعالار قىزمەتىنەن ايىرىلعان. نۇرلان نىعماتۋلين 1 اقپاندا ءماجىلىس سپيكەرى قىزمەتىنەن كەتتى.

بىرنەشە كۇن بۇرىن "قازفوسفات" زاۋىتىندا اپات بولىپ، تاراز قالاسىن كوك ءتۇتىن باسقانى حابارلاندى. تۇرعىندار تىنىس الۋدىڭ قيىنداعانىنا شاعىمداندى. ەكولوگيا مينيسترلىگى باستاپقىدا فتورسۋتەك قالىپتى نورمادان ەكى-ءۇش ەسەگە ارتتى، اممياك، كۇكىرتسۋتەك، كومىرقىشقىل گازىنىڭ ارتىق مولشەرى انىقتالمادى دەپ حابارلاعان. كەيىن لاستاۋشى زاتتاردىڭ ارتىق مولشەرى انىقتالمادى دەپ مالىمدەگەن. جامبىل وبلىسىنىڭ اكىمدىگى "تۇرعىندار دەنساۋلىعىنا قاۋىپ جوعىن" ايتتى. كەيىنگى ءبىر جارىم ايدا كاسىپورىندا ءۇش اپات تىركەلىپ، ەكەۋىندە ادام ءولىمى بولعان.

Abai.kz