رەسەي ۋكراين ءجۋرناليسى دميتري گوردونعا ىزدەۋ جاريالادى. بۇل جونىندە ريا نوۆوستي اگەنتتىگى رف ءىىم سىلتەمە جاساپ حابارلادى. ىزدەۋ وعان قوزعالعان قىلمىستىق ىسكە بايلانىستى ءجۇرىپ جاتىر، بىراق قانداي باپ بويىنشا قوزعالدى، ول جايىندا ناقتى ايتىلمايدى.

بيىل ناۋرىز ايىندا رەسەيدىڭ تەرگەۋ كوميتەتى گوردونعا قاتىستى ءۇش بىردەي باپ بويىنشا قىلمىستىق ءىس قوزعاعان. ونى سوعىس اشۋعا جاريا تۇردە شاقىردى، رەسەيدىڭ قارۋلى كۇشتەرى جايلى جالعان اقپارات تاراتتى جانە ۇلتىنا قاتىستى جەك كورۋشىلىك تۋعىزدى دەپ ايىپتاپ جاتىر.

رەسەي مەكەمەسى جۋرناليست "ۋكراينا تەلەكانالىنىڭ تىكەلەي ەفيرىندە رەسەيگە قارسى يادرولىق قارۋ قولدانىپ سوعىس اشۋعا شاقىردى" دەيدى.

بۇل ىسكە قاتىستى دميتري گوردوننىڭ ءوزى "رەسەي تارابىنان قوزعالعان ءىس بۇل مەن ءۇشىن ۇلكەن مارتەبە. دەمەك مەن ازاماتتىق جانە ادامزاتتىق مىندەتىمدى ادال ورىنداپ جاتىرمىن" دەپ مالىمدەدى.

دميتري گوردون – ۋكراين ءجۋرناليسى، "دميتري گوردوندا قوناقتا" باعدارلاماسىنىڭ اۆتورى، "گوردون" ينتەرنەت-پورتالىنىڭ رەداكتورى. تانىمال ساياسي، مادەني جانە سپورت وكىلدەرىنەن سۇقبات الادى.

Abai.kz