شاحتەرلار ءوز ەڭبەگىنىڭ دۇرىس باعالانبايتىنىن، تومەن جالاقى الاتىنىن، بۇعان قوسا، ەڭبەك جاعدايىنىڭ وتە ناشار ەكەنىن العا تارتتى.
"جالاقىنى كوپتەن بەرى وسىرگەن جوق. بۇل جونىندە كوپتەن بەرى ايتىلىپ ءجۇر. بىلتىر دا ايتىلعان. بۇعان دەيىن ەرەۋىل جەكەلەگەن تسەحتاردا بولعان. ناتيجەسى جوق. جارتى جىل بويى بىزگە جاقسى جالاقى مەن ەڭبەك جاعدايىن ۋادە ەتتى. قازىر بارلىق جۇمىسشى ەرەۋىلدەپ جاتىر. جالاقىنى 50 پايىزعا ءوسىرسىن دەپ وتىرمىز. ەڭبەك جاعدايى وتە ناشار" دەپ باسىلىم شاحتەرلاردىڭ سوزىنەن ءۇزىندى كەلتىرەدى.
قاراعاندى وبلىسى اكىمدىگىنىڭ حابارلاۋىنشا، ارتىنشا كاسىپورىن وكىلدەرى جۇمىسشىلارمەن كەلىسسوز جۇرگىزگەن.
"ۇيىمداستىرۋ ماسەلەلەرى بويىنشا كەلىسىمگە قول جەتكىزىلدى، قالعان ماسەلەلەر 3 تامىزعا دەيىن شەشىلەدى. قازىرگى كەزدە كاسىپورىن جۇمىسشىلارى جۇمىس ورىندارىنا كەتتى، ءوز مىندەتتەرىنە كىرىستى" دەدى اكىمدىك وكىلدەرى.
ءوندىرىس كاسىپورىندارى كوپ شوعىرلانعان قاراعاندى وبلىسىندا ەڭبەك جاعدايىن جاقسارتۋدى تالاپ ەتكەن جۇمىسشىلار ەرەۋىلى ءجيى بولادى. بىلتىر "اباي" شاحتاسىنداعى اپاتتان كەيىن "ارسەلورميتتالتەمىرتاۋ" جۇمىسشىلارى نارازىلىققا شىققان.
Abai.kz
