جۋرناليست: بولات نازارباەۆ ساپ-ساۋ...
سوڭعى اپتادا اتىشۋلى بولات نازارباەۆتىڭ ءولىم اۋزىندا جاتقانىن حابارلاعان اقپاراتتار جيىلەپ كەتتى.
وسىدان كەيىن جالعاندى جالپاعىنان باسقان بوكەڭنەن انە-مىنە ايىرىلىپ قالارداي كۇي كەشكەنىمىزدى جاسىرىپ قايتەمىز؟
بەلگىلى جۋرناليست يبراش نۇسىپباەۆ بولات نازارباەۆتىڭ دەنساۋلىعىنا قاتىستى اقپاراتتارعا كۇدىكپەن قارايتىنىن اشىپ ايتتى دەپ حابارلايدى Dalanews.kz.
بولات نازارباەۆتىڭ دەنساۋلىعى تۋرالى اقپاراتتاردىڭ كوپتەپ شىعۋىنا قاتىستى ءجۋرناليستىڭ ءوز بولجامى بار.
وسىدان ءبىرشاما ۋاقىت بۇرىن “ساليقالى ۇرپاق” قوعامدىق قورىنىڭ جەتەكشىلەرى تۇڭعىش پرەزيدەنت نۇرسۇلتان نازارباەۆتىڭ ءىنىسى بولات نازارباەۆ ۇزاق ۋاقىت گەرمانيادا ەم قابىلداپ، قيىن كەزەڭدى باستان كەشىپ جاتقانىن حابارلاعان.
قوردىڭ مالىمەتىنشە، وتكەن جىلدىڭ جەلتوقسانىندا بولات نازارباەۆ شەتەلدە ەم الىپ، كەيىن دارىگەرلەردىڭ باقىلاۋىمەن ەلگە جەتكىزىلگەن. سودان بەرى بوكەڭ ءجۇرىپ-تۇرۋدان قالىپ، توسەك تارتىپ جاتسا كەرەك.
“ساليقالى ۇرپاق” قورىنىڭ وكىلدەرى بولات نازارباەۆ ءولىم مەن ءومىردىڭ اراسىندا جاتقاندا ءوزىنىڭ بيزنەس قۇرىلىمدارىن باقىلاماعانىن، دۇنيە-مۇلكىنە اينالاسىنداعىلار باس-كوز بولعانىن مالىمدەپ ۇلگەردى.
الايدا جۋرناليست يبراش نۇسىپباەۆ بولات نازارباەۆتىڭ كوپتەن بەرى توسەك تارتىپ جاتقانىنا سەنبەيدى.
“ساليقالى ۇرپاق” قورىنىڭ مالىمەتىنە سەنسەك، قاڭتار وقيعاسى ورىن الماي تۇرىپ بوكەڭنىڭ دەنساۋلىعى كۇرت ناشارلاپ، جانىمەن قايعى بولىپ كەتكەن.
بۇل رەتتە ارىپتەسىمىز قىرعىزستاننىڭ شەكارا قىزمەتىنىڭ 2022 جىلدىڭ 6 قاڭتارىندا تاڭعى ساعات 05:30 شاماسىندا بوكەڭنىڭ “اق جول” باقىلاۋ-وتكىزۋ پۋنكتىنەن ءوز اياعىمەن ءوتىپ، 7 قاڭتاردا بىشكەك اۋەجايى ارقىلى دۋبايعا ۇشىپ كەتكەنى جايىنداعى مالىمەتتى العا تارتادى.
بولات نازارباەۆتىڭ ءدال سول كۇنى دۋبايدى بەتكە العانىن Flightradar24 سەرۆيسى دە راستايدى.
وسى جايتتاردى ەسەپكە العان جۋرناليست “بولات نازارباەۆ ۇزاق ۋاقىتتان بەرى توسەك تارتىپ، اۋىرىپ جاتتى دەگەنگە سەنۋ قيىن” دەگەن پىكىردە.
ءيا، قاندى قاڭتار كەزىندە بولات نازارباەۆ كولىكپەن قىرعىزعا قاراي قاشقانى جايىندا اقپارات تاراعان ەدى.
وسى رەتتە 2021 جىلدىڭ جەلتوقسانىندا دارىگەرلەر باقىلاۋىمەن ەلگە جەتكىزىلگەن بوكەڭ “2022 جىلدىڭ 6-شى قاڭتارىندا كولىككە وتىرىپ، قىرعىز اسىپ، دۋبايعا ۇشاتىنداي كۇش-جىگەردى قايدان الدى؟” دەگەن زاڭدى سۇراق تۋىندايدى.
بىزدىڭشە، “ساليقالى ۇرپاق” قورىنىڭ تاراتقان اقپاراتىنان گورى قىرعىزستاننىڭ شەكارا قىزمەتى مەن Flightradar24 سەرۆيسىنىڭ مالىمەتى شىندىققا جاناسادى.
وسى رەتتە “ساليقالى ۇرپاق” قورى مەن بولاتتىڭ وتباسىنىڭ نازارباەۆتى ۇزاق ۋاقىتتان بەرى توسەك تارتىپ جاتقان ء“تىرى ولىك” رەتىندە كورسەتۋگە نەلىكتەن ارەكەتتەنىپ جاتقانى كوپشىلىكتى قىزىقتىرارى انىق.
جۋرناليست يبراش نۇسىپباەۆ بولات نازارباەۆتىڭ قورى ءوزىنىڭ قوجايىنى جايىندا شىندىققا جاناسپايتىن اقپاراتتى تاراتىپ، بوكەڭدى قاڭتار وقيعاسىنا قاتىسى جوق، سۋدان تازا، سۇتتەن اق ادام رەتىندە كورسەتۋگە كۇش سالىپ جاتقانىن العا تارتىپتى.
مۇنداي جاعدايدا دىمكاس ادامنىڭ دۇنيە-مۇلكىن تاركىلەۋ دە ادامگەرشىلىككە جاتپايتىنى انىق.
بىراق قاندى قاڭتاردا نازارباەۆتىڭ قولىنان بيلىك سۋسىپ شىعىپ بارا جاتقاندا “جەكە ارمياسى” بار بوكەڭنىڭ تىنىش جاتۋى مۇمكىن بە؟ ارينە مۇمكىن ەمەس! بوكەڭنىڭ سويىلىن سوعىپ جۇرگەن جىگىتتەردىڭ سول كەزدە بارريكادانىڭ قاي جاعىندا بولعانىن كىمنىڭ بولسا دا ءىشى سەزەرى انىق.
قاڭتار وقيعاسى كەزىندە بولات نازارباەۆ ەن جايلايتىن الماتى مەن الماتى وبلىسىندا قانداي قىرعىن بولعانىن بىلەمىز.
جۋرناليست يبراش نۇسىپباەۆ وسى جايتتاردى باسشىلىققا الىپ، بولات نازارباەۆ قاتتى ناۋقاس ادامنىڭ كەيپىنە ەنىپ، مەملەكەتكە وپاسىزدىق جاساۋشىلاردىڭ ساپىنان سىتىلىپ شىعۋدى كوزدەپ وتىرۋى مۇمكىن دەپ توپشىلاپتى.
ايتپاقشى، بوكەڭنىڭ قىزى گۇلميرا بولاتقىزى كۇنى كەشە عانا «ەكسپرەسس ك.» باسىلىمىنىڭ جۋرناليستەرىن ۇيىنە شاقىرىپ، اكەسىنىڭ دەنساۋلىعى جايىندا سۇحبات بەرىپ، بوكەڭدى قاتتى سىرقات ادام رەتىندە كورسەتۋگە تىرىسقان-تۇعىن.
گۇلميرا بولاتقىزى «ەكسپرەسس ك.» باسىلىمىنا بەرگەن سۇحباتىندا اكەسىنىڭ 2015 جىلى بۇيرەكتىڭ سوزىلمالى وبىرىنا شالدىققانىن، يزرايل اۋرۋحاناسىندا ەم الىپ، ءبىر بۇيرەگىن الدىرعان، دونور كومەگىنە جۇگىنگەنىن ايتىپتى.
سول كەزدەن باستاپ كلينيكالىق ءولىم جاعدايىنا تۇسكەن سوڭ، بارلىق بيزنەستەن باس تارتىپ، تەك دەنساۋلىعىن كۇتۋمەن بولعان. قازىر بولات نازارباەۆ سويلەي المايدى.
«وعان سەبەپ: 2021 جىلدان بەرى كومەي وبىرىمەن اۋىرادى» دەيدى گۇلميرا بولاتقىزى. ال بۇعان سىزدەر سەنەسىزدەر مە؟
…
ال Arasha.kz پورتالىنا پىكىر بىلدىرگەن ساراپشى قازىبەك بەيسەباەۆتىڭ ايتۋىنشا بولات نازارباەۆتىڭ اۋىر حالدە جاتقان ۆيدەوسىن ادەيى تاراتىپ جاتىر.
– ناقتىراق ايتسام، حالىقتىڭ اياۋشىلىعىن تۋدىرۋ ارقىلى «بولات نازارباەۆتى كەشىرە سالايىق» دەگەن پىكىر قالىپتاستىرۋدا. ال ءبىز قوعام رەتىندە ونىڭ زاڭسىز ءىس اركەتتەرىنە باعا بەرىلۋىن تالاپ ەتۋىمىز كەرەك. بيلىك «حالىقتى الداي سالامىز» دەپ ابدەن ۇيرەنىپ العان. ال ءبىز ولارعا ناقتى جاۋاپ بەر دەپ تالاپ ەتۋىمىز كەرەك، – دەيدى بەيسەباەۆ.
«بولات نازارباەۆ قانداي جاعدايدا بولسا دا جاۋاپقا تارتىلۋى كەرەك. ماسەلەن قىلمىسكەر ءبىر ادامدى ولتىرگەن بولسا، ءبىز ونى كەشىرمەيمىز عوي. قوعامدا «بولات نازارباەۆ رەيدەرلىك شابۋىل جاسادى» دەگەن ءار ءتۇرلى الىپقاشپا اڭگىمە ايتىلادى. وعان جاۋاپ بەرىلۋ كەرەك.
وكىنىشكە قاراي ءبىزدىڭ بيلىك قىلمىستىق ءىس قوزعامايدى. نە بولماسا بيلىك «بولات نازارباەۆ ءمولدىر بۇلاق سەكىلدى تاپ تازا» دەپ اشىق ايتۋى كەرەك. ولاي ايتپايدى. تەك قانا «جانىنداعى ادامدار قىلمىس جاسادى» دەپ ايتىلادى. قاسىنداعى ادامدار ەشقانداي بۇيرىقسىز ارەكەت ەتتى مە؟ بىزدە وسىنداي تۇسىنىكسىز جاعداي كوپ…»، – دەيدى ساراپشى.
Abai.kz
