قر ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەەۆ بازارعا قانشالىقتى ءجيى باراتىنىن ايتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن بريفينگتە باق وكىلدەرى قوس مينيستردەن بازار-دۇكەندەرگە قانشالىقتى ءجيى باس سۇعاتىنىن سۇرادى.

«ارينە، وتباسىلى ادام بولعاندىقتان ۇيىمىزدە ازىق-تۇلىك قاۋىپسىزدىگىن قامتاماسىز ەتۋىمىز كەرەك. دەمالىس كۇندەرى ۋاقىتىم بولعاندا دۇكەنگە، بازارعا بارامىن. ءار وتباسىنىڭ ءوز اسپازدىق ۇستانىم-قالاۋى بولادى. مىسالى، پالاۋ ءپىسىرۋ ءۇشىن قىمباتىراق ەت الۋ كەرەك بولادى دەگەندەي. ارينە، ازىق-تۇلىكتى ءوزىمىز ساتىپ الامىز جانە باعالاردىڭ شاماسىن بىلەمىز. ازىق-تۇلىك سەبەتىنىڭ باعاسى تۋرالى ايتساق، ءسوزسىز، ول ءوستى. وعان ينفلياتسيا دالەل. ازىق-تۇلىك باعاسى ءوسىپ جاتقانىن كورىپ ءجۇرمىن»،- دەدى باقىت سۇلتانوۆ.

ال ەربول قاراشوكەەۆ وتباسىنا قاجەتتى ازىق-تۇلىكتى بىرگە بارىپ الۋعا قولى تيە بەرمەيتىنىن ايتتى.

«وكىنىشكە قاراي، جۇبايىممەن، جانۇياممەن بىرگە ازىق-تۇلىك ساتىپ الۋعا باراتىن ۋاقىتىم جوق. بىراق ايىنا ءبىر نەمەسە ەكى رەت جەكسەنبى سايىن وتباسىممەن ازىق-تۇلىك ساتىپ الۋعا تىرىسام. جالعىز ايتا كەتەتىن دۇنيە، ءبىز ءاردايىم تەك قازاقستاندا وندىرىلگەن ونىمدەردى عانا الامىز. باعانىڭ ايتارلىقتاي وسكەنى سەزىلەدى. بىراق بىلتىرعا قاراعاندا كارتوپ، ءسابىز سياقتى كوكونىستەردىڭ باعاسى تۇراقتى بولدى. مينيسترلىك قابىلداعان شارالاردىڭ ارقاسىندا بۇل ونىمدەرگە بايلانىستى دۇربەلەڭ بولعان جوق»، -دەدى ۆەدومستۆو باسشىسى.

بۇعان دەيىن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ قانت تاپشىلىعىن رەتتەي الماعان ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەەۆكە سوگىس جاريالاعان ەدى.

Abai.kz