اقش  وكىلدەر پالاتاسىنىڭ سپيكەرى نەنسي پەلوسي مىنگەن اقش-تىڭ اسكەري اۋە كۇشتەرىنىڭ ارنايى ۇشاعى تايۋان استانا تايبەيگە كەلىپ قوندى. بۇل اقش رەسمي وكىلدەرىنىڭ تايۋانعا 25 جىلدان كەيىنگى ساپارى.

الەم نازارىنداعى بۇل وقيعا تىكەلەي ەفيردەن كورسەتىلىپ جاتىر. تايۋانعا تابانى تيە سالا نەنسي پەلوسي مالىمدەمە جاسادى.

«كونگرەسس دەلەگاتسياسىنىڭ تايۆانعا كەلۋى – دامۋ ۇستىندەگى تايۆان دەموكراتياسىنا وزگەرمەيتىن قولداۋىن بىلدىرەدى. تايۆان باسشىلىعىمەن كەزدەسۋدە ءبىزدىڭ سەرىكتەس ەلگە قولداۋىمىز، ءبىزدىڭ ورتاق مۇددەمىزدى ىلگەرلەتۋ جانە ءۇندى-تىنىق مۇحيتىنداعى اشىق ءارى ەركىن قوزعالىس تۋرالى بولادى.

الەم اۆتوكراتيا مەن دەموكراتيا الدىندا تاڭداۋدا تۇرعان قازىرگىدەي ساتتە 23 ميلليون حالقى بار تايۆانعا اقش-تىڭ نيەتتەس، تىلەكتەستىگى اۋاداي قاجەت»، – دەدى نەنسي پەلوسي.

Cونداي-اق پەلوسي تۆيتتەرىندە: «تايۆانعا اتتانۋ ارقىلى ءبىز دەموكراتياعا ادالدىعىمىزدى پاش ەتەمىز جانە ءتايۆانننىڭ ەركىندىگى مەن بارلىق دەموكراتيانى قۇرمەتتەۋگە ءتيىسپىز»، – دەپ جازدى.

ال قىتاي – رەسمي پەكين نەنسي پەلوسيدىڭ تايۆانعا ساپارىن «اقش وتپەن ويناپ وتىر» دەپ باعالاپ، قىتايدىڭ حالىق ازاتتىق ارمياسى «قول قۋسىرىپ قاراپ وتىرمايدى» دەدى.

اقش-تىڭ جاپونياداعى اسكەري بازاسىنان 22 ۇشاق ۇشىپ شىعىپ، تايۆانعا بەت العانى حابارلاندى. سونداي-اق قىتايدىڭ اسكەري ۇشاقتارى دا تايۆانعا قاراي ۇشىپ شىققانى ايتىلدى.

قىتاي بيلىگى تايۆاننىڭ دەربەستىگىنەن ءۇزىلدى-كەسىلدە باس تارتادى. سىرتپەن قارىم-قاناستىڭ بارلىعىندا وسى ماسەلەگە باسا ءمان بەرەدى. تايۆاندى ءوزىنىڭ ءبىر پروۆينتسياسى رەتىندە قاراستىرادى جانە ونى باسقا ەلدىڭدە مويىنداۋىن تالاپ ەتەدى. ال بۇعازداعى ەل وزدەرىنىڭ دەربەستىگىن ۇنەمى ايتىپ كەلەدى. بۇنى اقش باستاعان ءبىر قاتار دەموكراتيالى ەلدەردە قولدايدى. وسى سەبەپتى دە قىتاي بيلىگى تايۆان قىتاي بيلىگىن مويىنداماسا بولاشاقتا كۇش قولداناتىنىن ايتىپ كۇش كورسەتۋگە دايىن ەكەندىگىن جاسىرمايدى.

نەنسي پەلوسيدىڭ تايۆانعا ساپارى اقش پەن قىتاي اراسىن قاتتى شيىرىقتىرىپ، شىرقاۋ شەگىنە الىپ كەلدى دەسە دە بولادى. ەكى الىپ دەرجاۆالاردىڭ قارىم-قاتىناسى ءسات ساناپ قالاي وزگەرەتىنىن بۇكىل الەم باقىلاپ وتىر.

دەرەككوزى: اراشا سايتى

Abai.kz