"نۇرسۇلتان نازارباەۆ قورى" امەريكانىڭ بالتيمور قالاسىندا شوعىرلانعان كوممەرتسيالىق ەمەس ۇيىم Journalism Development ءNetwork'تى سوتقا بەردى. بۇل جونىندە Courthouse News Service سايتى جازدى.

سايتتىڭ جازۋىنشا، شاعىم بەرۋشى جەمقورلىق پەن ۇيىمداسقان قىلمىستى زەرتتەۋ ورتالىعىنىڭ (OCCRP) زەرتتەۋىندە باياندالعان جايتتار اتاپ ايتقاندا، "قور قاراجاتى ماقساتىنا ساي جۇمسالمايدى" دەگەن تۇجىرىم شىندىققا سايكەس كەلمەيدى جانە اتالعان اقپارات قوردىڭ ىسكەرلىك بەدەلىنە نۇقسان كەلتىرەدى دەپ وتىر.

ماسەلە بيىل 19 قاڭتاردا OCCRP جاريالاعان زەرتتەۋ جايلى بولىپ وتىر. وندا نازارباەۆپەن بايلانىستى ءتورت قايىرىمدىلىق قورىنىڭ ( "قازاقستاننىڭ ءبىرىنشى پرەزيدەنتى – ەلباسى" قورى، "نازارباەۆ قورى", "نۇرسۇلتان نازارباەۆ قورى", "دەمەۋ قورى" جانە "ەلباسى") اتى اتالادى. OCCRP نازارباەۆ قورىنا تيەسىلى اكتيۆتەردە كەمى 7,8 ملرد دوللار بارىن انىقتاعان.

Courthousenews.com سايتىندا جاريالانعان قۇجاتقا سايكەس، "نازارباەۆ قورىنىڭ" اتىنان شاعىمدى نيۋ-يوركتە شوعىرلانعان Boies Schiller Flexner زاڭ فيرماسىنىڭ اتقارۋشى ارىپتەسى مەتيۋ ل. شۆارتس 29 شىلدەدە تۇسىرگەن.

شاعىمدا "نازارباەۆ قورىنىڭ" "نازارباەۆ ۋنيۆەرسيتەتى" مەن نازارباەۆ زياتكەرلىك مەكتەپتەرىن قارجىلاي قولداۋ ءۇشىن قۇرىلعانى، ەكس-پرەزيدەنتتىڭ مەنشىك قۇقىعى جوعى، قور اكتيۆتەرىن باسقارىپ وتىرماعاندىعى ايتىلعان.

بۇعان دەيىن زەرتتەۋشىلەر قاعاز جۇزىندە نۇرسۇلتان نازارباەۆقا ەشقانداي اكتيۆتەر تيەسىلى ەمەس، بىراق ول مۇلىكتەردى باقىلاپ، ولاردى ساتۋ نەمەسە بەرۋ تۋرالى شەشىمدەردى قابىلداي الادى دەپ جازعان.

"شاعىمعا ەشقانداي نەگىز جوق. OCCRP ءبىزدىڭ ۆەرسيانى قولدايدى" دەدى Journalism Development Network اتقارۋشى ديرەكتورى دريۋ سالليۆان Courthouse News سايتىنا.

قاڭتار ايىندا ءۇش قايىرىمدىلىق قورىنىڭ وكىلدەرى "نازارباەۆ باقىلاۋىنداعى اكتيۆتەر" تۋرالى جۋرناليستەردىڭ سۇراقتارىنا جاۋاپ بەرمەگەن ەدى. تاعى ءبىر مالىمدەمەلەرىندە اكتيۆتەردەن كىرىس تۇسپەيدى، سەبەبى ۇيىم قازاقستانداعى ءبىلىم مەكەمەلەرىن قارجىلاندىرۋمەن اينالىسادى دەگەن.

Journalism Development Network الەم بويىنشا زەرتتەۋمەن اينالىساتىن ونداعان باق-تىڭ باسىن بىرىكتىرگەن جەمقورلىق پەن ۇيىمداسقان قىلمىستى زەرتتەۋ ورتالىعىنا (OCCRP) جەتەكشىلىك جاسايدى.

اقپارات قۇرالدارىنىڭ جازۋىنشا، Boies Schiller Flexner اقش-تا كىشى دجوردج بۋش پەن البەرت گور اراسىنداعى داۋ سياقتى ءىرى ىستەرمەن اينالىسقان. بۇل زاڭ فيرماسىنىڭ اتقارۋشى سەرىكتەسىنىڭ اتى قازاقستاندىق بتا-نىڭ مۇحتار ابليازوۆقا قارسى تۇسىرگەن شاعىم بويىنشا ىستە دە اتالادى.

Abai.kz