ەسىم-سويلارى ەلىمىزگە بەلگىلى قالامگەرلەر، زيالى قاۋىم وكىلدەرى مەن مادەنيەت مايتالماندارى قازاقستان رەسپۋبليكاسىنىڭ باس پروكۋرورى بەرىك اسىلوۆ پەن جوعارى سوتتىڭ توراعاسى جاقىپ اسانوۆتىڭ اتىنا ءۇشبۋ حات جولداپ، ەكس-مينيستر ارىستانبەك مۇحامەديۇلىنا اراشا سۇراپتى.

ەكس-مينيستر ارىستانبەك مۇحامەديۇلىنا اراشا سۇراعان حاتتىڭ ءماتىنى Abai.kz پورتالىنىڭ رەداكتسياسىنا دا جولدانىپتى.

حاتقا مەديتسينا عىلىمدارىنىڭ دوكتورى، پروفەسسور، رەسەي مەديتسينا عىلىم اكادەمياسىنىڭ جانە قازاقستان ۇلتتىق عىلىم اكادەمياسىنىڭ اكادەميگى تورەگەلدى شارمانوۆ, قازاقستاننىڭ حالىق جازۋشىسى، «قازاقستاننىڭ ەڭبەك ەرى» مۇحتار شاحانوۆ, كسرو حالىق ءارتىسى بيبىگۇل تولەگەنوۆا، قازاقستاننىڭ حالىق ءارتىسى ءاسانالى ءاشىموۆ باستاعان وزگە دە تانىمال تۇلعالار، «شاپاعات مەدالىنىڭ يەگەرلەرى»، «قۇرمەت وردەنىنىڭ يەگەرلەرى»، كسرو دەنساۋلىق ساقتاۋ سالاسىنىڭ ۇزدىگى داريكو حاسانعاليەۆا, قر ەڭبەك سىڭىرگەن قايراتكەرى حاسەن سماگۋلوۆ,  مۋزىكا زەرتتەۋشىسى، ونەرتانۋشى، قازاقستاننىڭ ەڭبەك سىڭىرگەن قايراتكەرى، پەرنەبەك مومىنوۆ قر ەڭبەك سىڭىرگەن قايراتكەرى، بەلگىلى ءانشى دالەل ءۋاش, قر ەڭبەك سىڭىرگەن قايراتكەرى، پەداگوگيكا عىلىمدارىنىڭ كانديداتى ايا قاليەۆا, قر ەڭبەك سىڭىرگەن قايراتكەرى، قۇرمەت وردەنىنىڭ يەگەرى ءمادينا سادۋاقاسوۆالار قول قويعان ەكەن.

ولار ەكس-مينيستر ارىستانبەك مۇحامەديۇلىنا قاتىستى تەرگەۋ ءىسىنىڭ ءادىل ءوتۋىن تالاپ  ەتكەن. اراشا حاتتا ارىستانبەك مۇحامەديۇلىنىڭ  مادەنيەت پەن ونەر، سپورت سالاسىنا سىڭىرگەن ەڭبەگى مەن ەل الدىنداعى ازاماتتىق ادالدىعى تۋرالى ايتىلعان. سونداي-اق، مينيستر بولعان تۇستا ۇلت رۋحانياتىن دامىتۋ جولىندا قابىلدانعان زاڭدار مەن قولعا العان كوپتەگەن اۋقىمدى جوبالار جانە ەلىمىزدىڭ مادەنيەت پەن سپورت سالاسىندا جەتكەن جەتىستىكتەرىنە توقتالعان.

حاتتان ءۇزىندى:

«ارىستانبەك مۇحامەديۇلىنىڭ باسقا يگى ىستەرىنەن بولەك، ونىڭ تىكەلەي باستاماسىمەن قازاقستان تاريحىندا العاش رەت «كينەماتوگرافيا تۋرالى»،تاريحي، مادەني مۇرالاردى ساقتاۋ تۋرالى» زاڭدار قابىلداندى. ءار جىل سايىن شىلدەنىڭ ءبىرىنشى جەكسەنبىسىندە اتالىپ ءوتىلىپ جاتقان «ۇلتتىق دومبىرا» كۇنى دە - ارىستانبەك مۇحامەديۇلىنىڭ تىكەلەي قولتاڭباسى.   

ۇلتىم، جۇرتىم، ونەرىم دەپ ىشكەن اسىن جەرگە قويعان ازاماتتان ەلدىڭ قارجىسىنا قول سالاتىن ارسىز قىلىق شىقپايتىنىنا قارت جۇرەگىمىز سەنىمدى»، - دەپ جازىلعان اراشا حاتتا.

قر مادەنيەت جانە سپورت ءمينيسترى قىزمەتىنەن الىنعان ارىستانبەك مۇحامەديۇلى قر ۇلتتىق مۇراجايىن باسقىرعان ەدى.

مامىرىدڭ ورتا شەنىندە نۇر-Cۇلتان قالاسى بويىنشا سىبايلاس جەمقورلىققا قارسى قىزمەت مادەنيەت جانە سپورت مينيسترلىگىنىڭ «قازاقستان رەسپۋبليكاسىنىڭ ۇلتتىق مۋزەيى» رمقك لاۋازىمدى تۇلعالارىنا قاتىستى تەرگەۋ جۇرگىزىپ جاتقانىن مالىمدەگەن.

ال 17 مامىردا قازاقستان ۇلتتىق مۋزەيىنىڭ ديرەكتورى ارىستانبەك مۇحامەديۇلى ۇيىندە ءتىنتۋ جۇرگىزىلگەن كەزدە اۋرۋحاناعا جاتقىزىلعانى حابارلاندى.

مامىردىڭ اياعىندا (28 مامىر) نۇر-سۇلتان قالاسى بويىنشا سىبايلاس جەمقورلىققا قارسى ءىس-قيمىل اگەنتتىگى ەكس مينيستر ارىستانبەك مۇحامەديۇلىنىڭ قاماۋعا الىنعانىن مالىمدەدى.

«قر ۇلتتىق مۋزەيىنىڭ لاۋازىمدى تۇلعالارىنا جانە باسقا دا تۇلعالارعا قاتىستى «التىن ادامنىڭ الەم مۋزەيلەرى شەرۋى» حالىقارالىق كورمەسىن وتكىزۋ بويىنشا مەملەكەتتىك ساتىپ الۋ تۋرالى كەلىسىمشارت اياسىندا 146 ميلليون تەڭگە بيۋدجەت قاراجاتىن جىمقىرۋ دەرەگى بويىنشا سوتقا دەيىنگى تەرگەۋ امالدارى جۇرگىزىلىپ جاتىر»، - دەلىنگەن حابارلامادا.

2022 جىلدىڭ 28 مامىرىندا سوت سانكتسياسىمەن ۇلتتىق مۋزەي ديرەكتورى ارىستانبەك مۇحامەديۇلىنا قاتىستى «قاماۋدا ۇستاۋ» بۇلتارتپاۋ شاراسى قولدانىلدى.

2022 جىلدىڭ شىلدەسىندە نۇر-سۇلتاندا بۇرىنعى مادەنيەت ءمينيسترى، قازاقستان ۇلتتىق مۋزەيىنىڭ ديرەكتورى ارىستانبەك مۇحامەديۇلىنىڭ ءىسى بويىنشا تەرگەۋ سوتى باستالدى.

Abai.kz