بيىل ەلىمىزدىڭ بىرقاتار اۋىلىندا اكىمدەردىڭ وكىلەتتىك مەرزىمى اياقتالۋىنا بايلانىستى اۋىل اكىمدەرىن سايلاۋ ناۋقانى ءجۇرىپ جاتىر.

2021 جىلدان بەرى اۋىل باسشىسىن سايلاۋ جاڭا زاڭ جوباسى نەگىزىندە ىسكە اسىرىلا باستادى. اۋىلدىڭ كوشباسشىسىن بۇرىنعىداي جەرگىلىكتى ءماسليحات دەپۋتاتتارى داۋىسقا سالىپ، وزدەرى سايلاماي، حالىققا سايلاۋ قۇقىعىن بەردى.

ەندىگى جەردە جۇرت الدىنا كەلگەن ۇمىتكەرلەردەن ىرىكتەپ، ءوزى قالاعان اكىمىن سايلاپ الاتىن بولدى. اۋىل اكىمدىگىنە كانديداتتاردى ۇسىنۋدىڭ جاڭا ءتارتىبى ەنگىزىلدى. بۇرىن ۇمىتكەرلەردى اۋدان اكىمى عانا ۇسىنعان بولسا، بىلتىردان باستاپ تالاپقا ساي كەلگەن ۇمىتكەر ءوزىن-ءوزى ۇسىنا الادى نەمەسە پارتيا ۇسىنادى. وسىلايشا اۋىل اكىمىن سايلاۋدىڭ بىرقاتار تالاپتارى وزگەرگەن.

كوڭىلگە قونىمدى زاڭ قاعاز جۇزىندە بار، ال ونىڭ ءىس جۇزىندە ورىندالۋى قالاي ءجۇرىپ جاتىر؟ پرەزيدەنت توقاەۆتىڭ ءوزى ايتقان «جاڭا قازاقستان – ادىلەتتى قازاقستان» بولىپ وزگەردى مە، الدە سايلاۋ ناۋقانى ەسكى جۇيەدەگىدەي «بارماق باستى، كوز قىستىمەن» ءوتىپ جاتىر ما؟ ءدال سولاي. اكىم سايلاۋى الەتكى «ەسكى قازاقستاننىڭ» سالىپ كەتكەن سۇرلەۋىمەن ءوتىپ جاتىر. الەۋمەتتىك جەلىلەر مەن باق-تا بۇعان مىسال كوپ. سونىڭ ءبىرى – تاياۋدا قاراعاندى وبلىسىنىڭ اباي اۋدانىنا قارايتىن اقباستاۋ اۋىلىندا وتكەن اۋىل اكىمىن سايلاۋ كەزىندە №435 سايلاۋ ۋچاسكەسىندە ورەسكەل زاڭ بۇزۋشىلىقتار بولعان. ول تۋرالى باسقا-باسقا پارلامەنتتىڭ داۋدەي دالىزدەرىندە ايتىلدى. ءماجىلىس دەپۋتاتى ازات پەرۋاشەۆ ورتالىق سايلاۋ كوميسسياسىنىڭ توراعاسى نۇرلان ابدىروۆكە 12 تارماقتان تۇراتىن زاڭ بۇزۋشىلىقتاردى اشكەرەلەگەن دەپۋتاتتىق حات جولدادى.

ازات پەرۋاشەۆتىڭ ايتۋىنشا، زاڭ بۇزۋشىلىقتار بەينەكامەراعا جازىلعان. تومەندە حاتتىڭ تولىق نۇسقاسىن جاريالادىق.

بىلتىرعى اسىعىپ-اپتىعىپ ءجۇرىپ وتكىزگەن اۋىل اكىمدەرىنىڭ سايلاۋى تۋرالى ايتتىق جوعارىدا. بۇل تاۋەلسىز قازاقستان تاريحىنداعى العاشقى اۋىل اكىمدەرىن سايلاۋ تاجىريبەسى. جالپى بۇل دەموكراتيالىق قۇندىلىعى قالىپتاسقان، ازاماتتىق قوعامى قارىشتاپ دامىعان ەلدەردە بار قۇبىلىس. قازاقستان وعان ەندى قادام باسىپ جاتىر. ەۋروپا ەلدەرىندە پرەزيدەنتتەن باستاپ قالا، اۋىل، اۋدان، ءتىپتى مەكتەپ جانە ۋنيۆەرسيتەت رەكتورلارى مەن ديرەكتورلارىن سايلاپ كەلە جاتقانىنا جارتى عاسىردان استى. ناتيجەسىندە ەۋروپا دامىعان، حالقى باي ەلگە اينالدى. ال بىزدە شە؟ بىزدە جاعداي باياعىشا... «بۇرىنعى جارتاس – سول جارتاس». زاڭ وزگەردى، تەك قاعاز جۇزىندە. ال ءىس جۇزىندە، تۇك تە وزگەرگەن جوق.

Abai.kz