قاڭتار وقيعاسى كەزىندە ۇستالعانداردىڭ 71 پايىزى ازاپتالعان. بۇل تۋرالى قازاقستانداعى ادام قۇقىعى مەن زاڭدىلىقتى ساقتاۋ جونىندەگى حالىقارالىق بيۋرو جەتەكشىسى ەۆگەني جوۆتيس ايتتى. حالىقارالىق بيۋرو بۇگىن قاڭتار وقيعاسىنا بايلانىستى ۇستالعان ازاماتتار قۇقىعىنىڭ قالاي بۇزىلعانى تۋرالى ەسەپ جاريالادى.

قاڭتار وقيعاسىنا بايلانىستى، رەسمي دەرەك بويىنشا، ون مىڭنان اسا ادام ۇستالعان. وقيعا كەزىندە كەمىندە 238 ادام قازا تاپتى. ونىڭ التاۋى تەرگەۋدە ازاپتالىپ، كوز جۇمعان.

«ادۆوكاتتاردىڭ باسىم بولىگى ازاپتاۋ وقيعاسى بويىنشا شاعىم تۇسىرگەن. تەكسەرىس جۇرگىزىلگەن. بىراق شاعىمنىڭ 18 پايىزىندا عانا ازاپتالعان ادامعا جابىرلەنۋشى ستاتۋسى بەرىلگەن. ازاماتتاردىڭ 77 پايىزى ءوزىن كىم ازاپتاعانىن بىلەتىنىن ايتسا دا، تەك 18 پايىز ادامدى جابىرلەنۋشى دەپ تاپقان!» — دەيدى جوۆتيس.

قاڭتار كەزىندە ۇستالعان ازاماتتار ۇستىنەن كوبىنە قىلمىستىق كودەكستىڭ جاپپاي تارتىپسىزدىك (52 %), قارۋدى، وق-دارىلەردi, جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ (13 %), ۇرلىق (12 %), بيلىك وكىلىنە كۇش كورسەتۋ (11 %) باپتارىمەن ءىس قوزعالعان.

ەسەپ بويىنشا، ازاماتتاردىڭ 63 پايىزىن ۇستاۋ كەزىندە پوليتسيا كۇش قولدانعان. بىراق مۇنداي جاعدايدىڭ ەشبىرى، قۇقىق قورعاۋشى دەرەگىنشە، ۆيدەوتىركەۋگە جازىلماعان.

قاڭتار وقيعاسىنا بايلانىستى تەرگەلگەن جۇزدەگەن ادام ازاپتاۋعا شاعىنعان. قازىرگە دەيىن قۇقىق قورعاۋ ورگاندارىنىڭ 15 قىزمەتكەرى ازاپتاۋ مەن تەرگەۋدىڭ زاڭسىز ادىستەرىن قولداندى دەپ تەرگەلىپ جاتقانى بەلگىلى. قازاقستاندا ازاپتاۋ بابى بويىنشا ارىزداردىڭ سوتقا جەتۋى، كۇش قولدانعان ادامنىڭ جاۋاپقا تارتىلۋى سيرەك.

قۇقىق قورعاۋشىلار ەسەپ اياسىندا قازاقستان بيلىگىنە بىرنەشە ۇسىنىس ايتادى. ونىڭ اراسىندا پوليتسيا ۆيدەوتىركەۋىنە قاتىستى تالاپتى كۇشەيتۋ، ۇستالعان ازاماتقا قۇقىعىن ءتۇسىندىرۋ تالابىن مۇقيات ساقتاۋ، ادامنىڭ تۋىستارىنا نە باسقا ازاماتتارعا ۇستالعانى تۋرالى حابار بەرۋ قۇقىعىمەن دۇرىس قامتاماسىز ەتۋ، زاڭ كومەگىن الۋ قۇقىعىن مۇقيات قامتاماسىز ەتۋ، ازاپتاۋمەن كۇرەس بويىنشا شۇعىل ءتيىمدى شارا قابىلداۋ سياقتى كەڭەستەر بار.

Abai.kz