ءماجىلىس دەپۋتاتى قوستانايلىق دارىگەرلەرمەن مەديتسينالىق قىزمەتتىڭ قولجەتىمدىگىن تالقىلادى
ءماجىلىس دەپۋتاتى ەكاتەرينا سمىشلياەۆا «AMANAT» پارتياسى قوستاناي وبلىستىق فيليالى جانىنداعى ءبىلىم بەرۋ جانە دەنساۋلىق ساقتاۋ ماسەلەلەرى جونىندەگى وڭىرلىك قوعامدىق كەڭەستىڭ وتىرىسىنا قاتىستى.
وندا وڭىردەگى دەنساۋلىق ساقتاۋ جانە ءبىلىم بەرۋ سالاسىنداعى وزەكتى ماسەلەلەردى تالقىلادى. جيىندا ءسوز سويلەگەن قوستاناي وبلىستىق دەنساۋلىق ساقتاۋ باسقارماسىنىڭ باسشىسىنىڭ م.ا. دانيار جانداەۆ ايماقتاعى انا مەن بالا دەنساۋلىعىن قورعاۋدىڭ ەرەكشەلىكتەرى تۋرالى ايتتى.
بۇگىنگى كۇنى مەديتسينالىق كومەكتىڭ ۇتقىرلىعى مەن قولجەتىمدىلىگىن قامتاماسىز ەتۋ ماقساتىندا مەديتسينالىق جوعارى وقۋ ورىندارىنىڭ تۇلەكتەرىن جۇمىسقا ورنالاستىرۋ جۇرگىزىلۋدە. وبلىستا 28 دەنساۋلىق ساقتاۋ نىسانىنىڭ قۇرىلىسى جوسپارلانعان. اعىمداعى جىلدىڭ التى ايىندا وڭىردە 5074 ءسابي دۇنيەگە كەلدى. سونداي-اق، جاڭا تۋعان نارەستەدەن 3 جاسقا دەيىنگى جاس ساناتىنداعى بالالار "دەلفين" سابيلەر ءۇيى كمم-دە ساۋىقتىرىلادى، توسەك قورىنىڭ جالپى سانى 75 توسەكتى قۇرايدى، – دەدى.
د. جانداەۆتىڭ ايتۋىنشا، قوستاناي وبلىسىندا بالالار مەديتسيناسى ەرەكشە جاعدايدا دەۋگە بولادى. قازىرگى تاڭدا وبلىستىق بالالار اۋرۋحاناسىنىڭ جوندەۋ جۇمىستارىنا قاتىستى بىرقاتار ماسەلەلەر بار. جالپى وبلىس دەڭگەيىندە بالالارعا مەديتسينالىق كومەك كورسەتۋ دەڭگەيى قاناعاتتانارلىق دەڭگەيدە.
ءوز كەزەگىندە، ءماجىلىس دەپۋتاتى ەكاتەرينا سمىشلياەۆا مەديتسينا سالاسىن تسيفرلاندىرۋ ماسەلەسى نازاردا ەكەنىن جەتكىزدى. دەپۋتات اتاپ وتكەندەي، Damumed اقپاراتتىق جۇيەسى سالا جۇمىسىن جەڭىلدەتۋ ءۇشىن ەنگىزىلگەن بولاتىن. الايدا، جۇمىس بارىسىندا كەرىسىنشە قيىندىقتار تۋدىرعاندىقتان، بىرىڭعاي وپەراتورلىق قىزمەتتى ەنگىزۋ بويىنشا دەپۋتاتتىق ۇسىنىم جاسايتىن ايتتى.
سونىمەن قاتار جيىندا "رەسپۋبليكالىق ەلەكتروندىق دەنساۋلىق ساقتاۋ ورتالىعى" قوستاناي فيليالىنىڭ ديرەكتورى اندرەي سولوۆەۆ 2017 جىلى Damumed مەديتسينالىق اقپاراتتىق جۇيەسى وبلىستىڭ بەس ءىرى ەمحاناسىندا پيلوتتىق ەنگىزۋدەن باستالعانىنا توقتالىپ، ماسەلەنىڭ پروبلەمالىق اسپەكتىلەرى مەن شەشۋ جولدارى تۋرالى ايتتى.
قوستاناي وبلىسىنا جۇمىس ساپارى بارىسىندا ەكاتەرينا سمىشلياەۆا رۋدنىي قالاسىنا، مەڭدىقارا، ۇزىنكول اۋداندارىنا بارىپ، مەكتەپ جانە فەلدشەرلىك اكۋشەرلىك پۋنكتەردىڭ جۇمىسىن باقىلادى.
Abai.kz
