ماسكەۋ SWIFT جۇيەسىنسىز ەسەپتەسۋ مۇمكىندىگىن قاراستىرۋدى دا ۇسىنىپ وتىر.

2021 جىلدىڭ قورىتىندىسى بويىنشا مۇنداي وپەراتسيالاردىڭ 70 پايىزدان استامى – رۋبل، تورتتەن ءبىرى دوللار مەن ەۋرو، تەك شاعىن بولىگى عانا وزگە ۆاليۋتالاردا جۇرگىزىلگەن.

25-26 تامىزدا قىرعىزستاننىڭ شولپان-اتا قالاسىندا وتەتىن ەۋرازيا ۇكىمەتارالىق كەڭەسىنىڭ وتىرىسىندا ەاەو ەلدەرىنىڭ ۇلتتىق ۆاليۋتالارىن پايدالانۋدى ۇلعايتۋ ماسەلەسى قارالادى. قاۋلى جوباسىن رەسەي ەنگىزەدى.

رەسەي شەتەل ۆاليۋتاسىنان باس تارتىپ، ەاەو اۋماعىندا بىرىڭعاي ۆاليۋتا ەنگىزۋ يدەياسىن العاش رەت قوزعاپ وتىرعان جوق.

بيىل ناۋرىزدا رەسەي ەكونوميكالىق دامۋ ءمينيسترى ماكسيم رەشەتنيكوۆ ەاەو "بىرىڭعاي رۋبل كەڭىستىگىن قالىپتاستىرۋعا كىرىستى" دەپ مالىمدەگەن. سول كەزدە ول ەاەو-عا مۇشە ەلدەر – وعان رەسەيدەن بولەك ارمەنيا، بەلارۋس، قازاقستان، قىرعىزستان كىرەدى – ءۇشىنشى مەملەكەتتەردى قاتىستىرماي "بىرىڭعاي رۋبل كەڭىستىگىنە" بىرتىندەپ كوشۋگە كەلىستى دەپ ايتقان.

رەشەتنيكوۆتىڭ مالىمدەمەسى قازاقستان قوعامىندا رەزونانس تۋعىزىپ، بىرنەشە ساراپشى قازاق ۇكىمەتىنەن تۇسىنىكتەمە تالاپ ەتكەن.

رەشەتنيكوۆ مالىمدەمەسىنەن كەيىن قازاقستان ۇكىمەتى حابارلاما تاراتتى. قازاقستان ۇكىمەتىنىڭ رەسمي مالىمدەمەسىندە "كەلىسسوز كەزىندە قازاقستاندىق ۆاريانت قولداۋ تاپتى. رەسەي مەن بەلارۋستە باج سالىقتارىن ەسەپكە العاندا جانە بولگەندە تاۋاردى جىبەرۋشى ەلدەردەگى باعامى بويىنشا رەسەي ءرۋبلى قولدانىلادى" دەپ جازىلعان. قازاقستان تارابى وداق ىشىندە ءرۋبلدىڭ كەدەندىك تولەم اقشاسى رەتىندە ەنگىزىلۋىن رەسەيگە سالىنعان سانكتسيالارمەن تۇسىندىرەدى. "سانكتسيالارعا بايلانىستى ەاەو ىشىندەگى باج سالىعىن رەسەي مەن بەلارۋسكە دوللارمەن اۋدارۋ مۇمكىن ەمەس" دەيدى قازاقستان ۇكىمەتى.

ەۋرازيا ەكونوميكا وداعىنا (ەاەو) ارمەنيا، بەلارۋس، قازاقستان، قىرعىزستان مەن رەسەي مۇشە. وداق 2014 جىلى "ۇلتتىق ەكونوميكالاردى جان-جاقتى جاڭعىرتۋ، كووپەراتسيالاۋ مەن ولاردىڭ باسەكەگە قابىلەتىن جانە مۇشە مەملەكەتتەر حالقىنىڭ ءومىر ءسۇرۋ دەڭگەيىن ارتتىرۋ ءۇشىن جاعداي جاساۋ ماقساتىندا" قۇرىلعان.

ساراپشىلار بۇل وداققا رەسەيدىڭ ىقپالى كوپ ەكەنىن، رەسەي ەكونوميكاسى قۇلدىراسا، وداقتاعى باسقا ەلدەرگە دە اسەر ەتەتىنىن ايتادى.

قازاقستاندا بەلسەندىلەر مەن ساراپشىلار بيلىكتى رەسەيدىڭ ىقپالى زور وداقتان شىعۋعا ءجيى شاقىرعان. نۇر-سۇلتان ەاەو-نى "ساياسيلاندىرماۋعا" ۇندەگەن.

Abai.kz