ۋكراينالىق ساياساتكەر انتون گەراششەنكو توقاەۆتىڭ قازاقستاندى تۇبەگەيلى دەموكراتيالاندىرۋ تۋرالى شەشىمى كورشىلەس رەسەيلىك ساياساتكەرلەر ءۇشىن «اتوم بومباسى» بولاتىنىن ايتتى.

پرەزيدەنت قاسىم-جومارت توقاەۆ ەلدە كەزەكتەن تىس پرەزيدەنت سايلاۋىن 2022 جىلدىڭ كۇزىندە وتكىزۋدى، ەلدەگى پرەزيدەنتتىك بيلىك جۇيەسىن ايتارلىقتاي وزگەرتۋدى ۇسىندى. قازاقستان پرەزيدەنتى ومىرىندە ءبىر رەت قانا قىزمەت اتقارا الادى. وكىلەتتىك مەرزىمى – 7 جىل. ەگەر ۇسىنىس قابىلدانسا، توقاەۆ مەرزىمىنەن بۇرىن سايلاۋ جاريالاپ، وعان بارۋعا دايىن.

كەلەسى پرەزيدەنتتىك سايلاۋ 2024 جىلى، ال پارلامەنت سايلاۋى 2025 جىلى ءوتۋى ءتيىس. ۇسىنىلعان باستامالار ماقۇلدانسا، كەلەسى پرەزيدەنت بيىل كۇزدە سايلانادى. ال 2023 جىلدىڭ ءبىرىنشى جارتىسىندا پارلامەنتتىك سايلاۋ وتەدى. قازىرگى پرەزيدەنت توقاەۆ بىردەن بىرنەشە رەفورمالىق باستاما كوتەردى.

قاڭتار وقيعاسىنا قاتىسۋشىلارعا راقىمشىلىق جاريالاندى. ايەلدەر ءۇشىن زەينەت جاسى 63-تەن 61-گە دەيىن تومەندەتىلدى. قازاقستان ۇلتتىق قورىنىڭ جىلدىق ينۆەستيتسيالىق كىرىسىنىڭ 50 پايىزىن جىلىنا ءبىر مارتە ءاربىر كامەلەتكە تولماعان ازاماتتىڭ شوتىنا اۋدارىپ ۇسىندى.

ۋكراينا ىشكى ىستەر مينيسترلىگى باسشىسىنىڭ كەڭەسشىسى انتون گەراششەنكو ءوزىنىڭ تەلەگرام ارناسىندا ۇسىنىلعان ساياسي باستامالار مەملەكەتتى دەموكراتيالاندىرۋدىڭ قايتارىمسىز پروتسەسى ەكەنىن جانە كورشىلەس رەسەيلىك ساياساتكەرلەر ءۇشىن «اتوم بومباسىنا» اينالاتىنىن اتاپ ءوتتى.

«توقاەۆ ايتقان يدەيالار رەسەيلىك ساياساتكەرلەر ءۇشىن اتوم بومباسى بولىپ تابىلادى. قازاقستان پرەزيدەنتى پۋتيندىك رەسەيمەن ەمەس، وركەنيەتتى الەممەن بىرگە بولاتىنىن كورسەتتى. قازاقستاندا دەموكراتيالاندىرۋدىڭ قايتىمسىز پروتسەستەرى باستالدى»، - دەدى گەراششەنكو.

كەرىمسال جۇباتقانوۆ

Abai.kz