قازاقستان تەرگەۋ سوتى تىركەلمەگەن "دەموكراتيالىق پارتيانىڭ" كوشباسشىسى جانبولات مامايدى قاماۋدا ۇستاۋ مەرزىمىن 12 قازانعا دەيىن ۇزارتتى. بۇل تۋرالى ونىڭ جارى، بەلسەندى ينگا يمانباي حابارلادى.

يمانباي مەن بەلسەندىنىڭ قورعاۋشىلارى مامايدىڭ ۇستىنەن قوزعالعان ىستە كۋاگەرلەرگە قىسىم كورسەتىلىپ، ولاردان  قارسى ايعاق بەرۋدى تالاپ ەتىپ جاتقانىن مالىمدەدى.

34 جاستاعى جانبولات ماماي قاڭتار وقيعاسىندا " جالعان اقپارات تاراتتى", "بيلىك وكىلىن قورلادى" جانە "جاپپاي تارتىپسىزدىك ۇيىمداستىردى" دەپ كۇدىككە ىلىنگەن. بىراق ول بۇعان كەلىسپەيدى. بەلسەندىنىڭ جاقتاستارى قوزعالعان ىستە ساياسي استار بار ەكەنىن ايتادى. ال قۇقىق قورعاۋشىلار ونى ساياسي تۇتقىندار تىزىمىنە قوسىپ وتىر.

ماماي 26 اقپاننان بەرى قاماۋدا وتىر. ونى قاڭتار وقيعاسىنان كەيىن ۇستاپ، جاپپاي تارتىپسىزدىك ۇيىمداستىردى دەپ 15 كۇنگى اكىمشىلىك قاماۋعا العان. كەيىن ونى قىلمىستىق ءىس بويىنشا كۇدىكتى دەپ تانىپ، تەرگەۋ اباقتىسىنا قامادى. قاماۋ مەرزىمى سودان بەرى بىرنەشە مارتە ۇزارتىلدى.

ماۋسىم ايىندا مامايعا قاڭتار وقيعاسى كەزىندە الماتىدا "جاپپاي تارتىپسىزدىك ۇيىمداستىردى" دەگەن ايىپ تاعىلىپ وتىرعانى بەلگىلى بولدى.

Freedom House ۇكىمەتتىك ەمەس ۇيىمى مامايعا جاڭا ايىپ تاعىلعانىنا الاڭداۋشىلىق ءبىلدىردى. وعان دەيىن Amnesty International ءجان Human Rights Watch ۇيىمدارى نۇر-سۇلتاننان مامايدى بوساتۋدى تالاپ ەتكەن.

تامىزدىڭ سوڭىندا قازاقستانعا ءىس-ساپارمەن كەلگەن ەۋروپارلامەنت دەپۋتاتتارى دا جانبولات ماماي مەن وزگە دە بەلسەندىلەردى تەرگەۋدى توقتاتۋعا شاقىردى.

قازاقستان بيلىگى مۇنداي ۇندەۋلەرگە جاريا تۇردە جاۋاپ قاتپادى. نۇر-سۇلتان قازاقستاندا ساياسي تۇتقىن بارىن، ادامداردىڭ ساياسي استارمەن قۋدالاناتىنىن جوققا شىعارادى.

Abai.kz