دايش (يگيل) رەسۋرستارى كابۋلداعى رەسەي ەلشىلىگىنىڭ جانىندا تەراكت جاساعان جانكەشتىنىڭ سۋرەتىن جاريالادى. وسىلايشا ەكى رەسەيلىك ديپلوماتتىڭ قازاسىنا سەبەپ بولعان جارىلىستى ءوز مويىندارىنا الدى. 

ۇيىم مالىمدەمەسىندە لاڭكەس ەلشىلىك ماڭىندا "رەسەيلىك قىزمەتكەرلەر قاتىسقان جيىندا جانكەشتى بەلبەۋىن جارىپ جىبەرگەن" دەلىنگەن.

قىركۇيەكتىڭ 5-ءى كۇنى كابۋلداعى رەسەي ەلشىلىگىنىڭ كونسۋلدىق بولىمىنە كىرە بەرىسكە جاقىن جەردە لاڭكەس جارىلعىش زاتتى ىسكە قوسقان. سالدارىنان التى ادام، ونىڭ ىشىندە ەكى رەسەيلىك ديپلومات پەن ءتورت ءتالىب قازا تاۋىپ، ون ادام جارالانعان. تاليبان قاۋىپسىزدىك كۇشتەرى ەلشىلىكتىڭ قاۋىپسىزدىگىن قامتاماسىز ەتۋ ءۇشىن بۇدان دا ماڭىزدى شارالار قابىلداۋعا ۋادە بەردى.

كرەمل كابۋلداعى ەلشىلىك قىزمەتكەرلەرىنىڭ ءولىمىن تەراكت دەپ باعالادى.

Abai.kz