تاجىكستاندا يسمايليتتەر اعىمىنىڭ ءدىني ءبىلىم بەرۋ جونىندەگى كەڭەسى (ITREB - Ismaili Tariqahand Religious Education Board) جابىلدى، دەپ حابارلادى وزودي راديوسىنىڭ دەرەككوزدەرى. بيلىك بۇل ۇيىمدى جاپقانىن جوققا شىعارىپ، ونىڭ قىزمەتىنە قاتىستى ماسەلە ءالى قارالىپ جاتىر دەپ مالىمدەدى.

تاۋلى باداحشان اۆتونوميالى وبلىسىنداعى جاماعاتتاردى دامىتۋ جونىندەگى كوميتەتىنىڭ ءبىر قىزمەتكەرى 6 قىركۇيەكتە ازاتتىقتىڭ تاجىك قىزمەتى - وزودي راديوسىنا ايماقتاعى جاماعاتتاردىڭ ءبارى تەكسەرىلگەنىن ايتتى. وتكەن ايدا ءدىن كوميتەتىنىڭ جۇمىس توبى ايماقتا بولعان.

ء"بىز وسى جۇمىس توبىنىڭ قورىتىندىسىن كۇتىپ ءجۇرمىز. يسمايليتتەر تاريقاتىنىڭ ءدىني ءبىلىم جونىندەگى كەڭەسى مەن جاماعاتتاردى دامىتۋ كوميتەتىنىڭ تاعدىرىنا قاتىستى قانداي شەشىم قابىلداناتىنىن بىلمەيمىز", دەيدى اتى-ءجونى اتالعانىن قالاماعان دەرەككوز.

تباو جاماعاتتاردى دامىتۋ جونىندەگى كوميتەتى 2012 جىلى دۋشانبەدە، ەكى جىلدان سوڭ حوروگتا قۇرىلدى. ۇيىم رەسمي تۇردە تىركەلگەن.

بيىل مامىردا حوروگتاعى جاعداي شيەلەنىسىپ كەتكەن سوڭ جەرگىلىكتى جاماعاتحانالارداعى ءدىني ءبىلىم بەرۋ ءىسى توقتادى، دەپ حابارلادى حوروگتىڭ ءۇش تۇرعىنى وزودي راديوسىنا. ولاردىڭ اراسىندا يسمايليتتەر تاريقاتىنىڭ ءدىني ءبىلىم جونىندەگى كەڭەسىنىڭ ءبىر مۇعالىمى دە بار.

بيلىك تاۋلى باداحشانداعى ءدىني ءبىلىم جاعدايى تۋرالى پىكىر بىلدىرۋدەن باس تارتتى.

تباو تاجىكستاننىڭ شىعىسىندا ورنالاسقان ءىرى ايماق. مۇندا 250 مىڭعا جۋىق ادام تۇرادى. تۇرعىنداردىڭ دەنى ءيسمايليزمدى (يسلام دىنىندەگى شيت اعىمىنىڭ ءبىر تارماعى) ۇستانادى.

Abai.kz