شىعىس قازاقستان وبلىسى التاي اۋدانىندا 700 گەكتارعا جايىلعان دالا ءورتىنىڭ بەتى قايتپاي جاتىر. شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك، 2 قىركۇيەك كۇنى تۇسكى ۋاقىتتا التاي اۋدانىندا اشىق الاڭدا ءورت شىقتى.

قازىرگى ۋاقىتتا «زىريان» ورمان شارۋاشىلىعى جانە «بىكوۆ» ورمانشىلىعىنا جايىلعان قىزىل جالىننىڭ جالپى اۋدانى 700 گەكتارعا جەتىپ وتىر.

«ءتىلسىز جاۋ تاۋلى ايماقتا بۇتا مەن ءشوپتى شارپۋدا. سول جەردە قۇتقارۋشىلار، جەرگىلىكتى اتقارۋشى ورگان وكىلدەرى، ورمانشىلار، «قازاۆياورمانقورعاۋ» مەكەمەسىنىڭ قىزمەتكەرلەرى دامىلسىز جۇمىس ىستەۋدە. ەلدى مەكەندەرگە ءتونىپ تۇرعىن قاۋىپ جوق. ءورتتى سوندىرۋگە بارلىعى 320-دان استام ادام مەن 25 تەحنيكا جۇمىلدىرىلدى»، - دەلىنگەن اقپاراتتا.

Abai.kz