ءماجىلىس توراعاسى ەرلان قوشانوۆ جۋرناليستەرمەن الداعى پرەزيدەنت سايلاۋى تۋرالى ءوز پىكىرىمەن ءبولىستى.

«بيىلعى پرەزيدەنت سايلاۋى 7 جىلدىق مەرزىممەن ءوتۋى كەرەك دەپ ەسەپتەيمىن. بۇل مەنىڭ جەكە پىكىرىم. ونى ارىپتەستەرىم دە قولداپ وتىر»، – دەدى پالاتا سپيكەرى.

ەرلان قوشانوۆتىڭ ايتۋىنشا، پرەزيدەنتتىك باسقارۋ فورماسىنداعى قازاقستان ءۇشىن پرەزيدەنتتىڭ قايتا سايلانۋ قۇقىعىنسىز 7 جىلدىق مەرزىمگە سايلانۋى بۇل وتە قاجەتتى ءارى ماڭىزدى نورما.  ول ەل دامۋىنىڭ ليبەرالدىق باعىتىن كۇشەيتەدى جانە پرەزيدەنت رەفورمالارىنا تولىق سايكەس كەلىپ وتىر. بۇل سۋپەرپرەزيدەنتتىك باسقارۋ فورماسىنان تۇبەگەيلى ارىلۋعا مۇمكىندىك بەرەدى.

بيلىكتىڭ ءجيى اۋىسۋىن قامتاماسىز ەتەتىن نورما ونىڭ مونوپوليالانۋىنا جول بەرمەيدى.

ءماجىلىس توراعاسى 7 جىل قولعا العان رەفورمالاردى ىسكە اسىرۋ ءۇشىن جەتكىلىكتى ۋاقىت دەپ ەسەپتەيدى.

سونىمەن بىرگە پالاتا سپيكەرى ەگەر پرەزيدەنت قازىر 5 جىلعا سايلانسا، سودان كەيىن كونستيتۋتسياعا 7 جىلدىق پرەزيدەنتتىك مەرزىم تۋرالى تۇزەتۋلەر ەنگىزىلسە، وندا سايلانعان پرەزيدەنتكە تاعى دا 7 جىلدىق مەرزىمگە قايتا بارۋ ءۇشىن قۇقىقتىق مۇمكىندىك پايدا بولۋى مۇمكىن ەكەنىن ايتتى.

سوندىقتان وسى قۇقىقتىق قايشىلىقتى جويۋ ءۇشىن دەپۋتاتتار كونستيتۋتسياعا قازىردەن باستاپ وزگەرىستەر ەنگىزۋدى جانە الداعى سايلاۋدى قايتا سايلانۋ قۇقىعىنسىز 7 جىل مەرزىممەن وتكىزۋدى ۇسىنىپ وتىر، – دەدى ە.قوشانوۆ.

Abai.kz