قازاقستان ۇكىمەتى بيىل كۇزدە وتەتىن كەزەكتەن تىس پرەزيدەنت سايلاۋىنا شامامەن 20 ملرد تەڭگە قارجى بولمەك. بۇل تۋرالى بۇگىن، 8 قىركۇيەكتە ءماجىلىس كۋلۋارىندا قارجى ءمينيسترىنىڭ ورىنباسارى تاتيانا ساۆەلەۆا ايتتى.

"پرەزيدەنت سايلاۋى 2024 جىلعا جوسپارلانعاندىقتان ونىڭ بيۋدجەتى سول جىلعا ەسەپتەلگەن ەدى. بىراق وزگەرىستەر مەن جاڭا تاپسىرمالارعا بايلانىستى قارجى ۇكىمەت رەزەرۆىنەن بولىنەدى. قازىر ورتالىق سايلاۋ كوميسسياسى ەسەپتەپ جاتىر. كەزەكتەن تىس پرەزيدەنت سايلاۋ شىعىنى – شامامەن 20 ملرد تەڭگە" دەدى ساۆەلەۆا جۋرناليستەرگە.

ۆيتسە-ءمينيستردىڭ سوزىنشە، شىعىننىڭ كوبى سايلاۋ كوميسسياسى مۇشەلەرىنىڭ جالاقىسىنا كەتەدى.

"ولاردىڭ ەڭبەگى ەڭ تومەنگى جالاقىمەن ەسەپتەلەدى. 2019 جىلى سايلاۋ وتكىزگەندە تومەنگى جالاقى 42500 تەڭگە بولعان، بيىل - 60 مىڭ تەڭگە. بيىلعى سايلاۋدا 70 مىڭنان اسا ادام جۇمىس ىستەيدى دەپ وتىرمىز" دەدى ول.

ۆيتسە-مينيستر 2023 جىلعا جوسپارلانعان پارلامەنت سايلاۋىنا ەڭ تومەنگى جالاقىنىڭ وسۋىنە بايلانىستى 25 ملرد تەڭگە بولادى دەپ توپشىلايدى. ەلدە كەلەسى جىلى ەڭ تومەنگى جالاقى 70 مىڭ تەڭگەگە ءوسۋى ءتيىس.

قازاقستان پرەزيدەنتى قاسىم-جومارت توقاەۆ 1 قىركۇيەكتەگى حالىققا جولداۋىندا بيىل كۇزدە كەزەكتەن تىس پرەزيدەنت سايلاۋى، ال كەلەسى جىلى پارلامەنت سايلاۋى وتەتىنىن جاريالاعان.

سونداي-اق توقاەۆ پرەزيدەنتتىكتى 7 جىلدان تۇراتىن ءبىر مەرزىممەن شەكتەۋدى ۇسىنىپ، بۇل ۇسىنىستى كۇزدەگى پرەزيدەنت سايلاۋىنان كەيىن پارلامەنتكە جولدايتىنىن مالىمدەدى. بىراق ءبىر توپ دەپۋتات پەن ءماجىلىس توراعاسى ەرلان قوشانوۆ جەتى جىلدىق ءبىر مەرزىمدى كۇزدەگى سايلاۋعا دەيىن ەنگىزۋدى ۇسىنعان. ساراپشىلار توقاەۆتىڭ كەزەكتەن تىس پرەزيدەنت سايلاۋدى جاريالاۋىن "بيلىگىن كۇشەيتۋ امالى" دەيدى.

Abai.kz