قازاقستاندا 2027 جىلى حوككەيدەن الەم چەمپيوناتى ءوتۋى مۇمكىن. بۇگىن مەملەكەت باسشىسى حالىقارالىق حوككەي فەدەراتسياسىنىڭ پرەزيدەنتى ليۋك ءتارديفتى قابىلدادى، دەپ حابارلادى اقوردا.

كەزدەسۋدە حوككەي سپورتىن دامىتۋدىڭ جانە كەڭىنەن تانىتۋدىڭ پەرسپەكتيۆالارى، سونداي-اق ەلىمىزدە ءىرى حالىقارالىق تۋرنيرلەر وتكىزۋ ماسەلەسى تالقىلاندى.

قاسىم-جومارت توقاەۆ ليۋك تارديفكە قازاقستان حوككەيىنىڭ جەتىستىكتەرى، وتاندىق سپورتتى دامىتۋ ءۇشىن قابىلدانىپ جاتقان شارالار مەن سپورت ينفراقۇرىلىمىنىڭ مۇمكىندىكتەرى تۋرالى ايتتى.

مەملەكەت باسشىسى ەلىمىزدە حوككەي سپورتىنا قىزىعۋشىلىق ارتىپ كەلە جاتقانىن، بالالار مەن جاسوسپىرىمدەرگە ارنالعان حوككەي مەكتەپتەرى مەن جاستار كوماندالارىنىڭ سانى كوبەيگەنىن اتاپ ءوتتى. بۇگىندە سپورتتىڭ وسى تۇرىمەن 14 مىڭ اسا ادام شۇعىلدانادى.

كەزدەسۋ بارىسىندا سپورت ينفراقۇرىلىمدارىنىڭ مۇمكىندىكتەرىنە ەرەكشە نازار اۋدارىلدى. وسى رەتتە پرەزيدەنت ەلىمىزدىڭ 2027 جىلى الەم چەمپيوناتىن وتكىزۋگە جولداعان ءوتىنىمى 2023 جىلى مامىرداعى داۋىس بەرۋ كەزىندە قولداۋ تاپسا، قازاقستاننىڭ وسى شارانى ۇيىمداستىرۋعا دايىن ەكەنىن ايتتى.

قاسىم-جومارت توقاەۆ حالىقارالىق حوككەي فەدەراتسياسى ءوز تاريحىندا ازيا قۇرلىعىندا ەشقاشان جوعارى دەڭگەيدەگى چەمپيوناتتار وتكىزبەگەنىن اتاپ ءوتتى.

حالىقارالىق حوككەي فەدەراتسياسىنىڭ پرەزيدەنتى كەزدەسۋگە مۇمكىندىك بەرگەنى ءۇشىن مەملەكەت باسشىسىنا العىس ايتىپ، قازاقستاندا حوككەي سپورتىن دامىتۋعا كوڭىل ءبولىنىپ جاتقانىن جوعارى باعالادى. سونداي-اق ەلىمىز حالىقارالىق جارىستاردى وتە جوعارى دەڭگەيدە وتكىزۋگە قاجەت بارلىق ينفراقۇرىلىمعا يە ەكەنىن جەتكىزدى.

Abai.kz