نۇر-سۇلتان قالالىق ءماسليحاتىنىڭ كەزەكتەن تىس سەسسياسى ءوتىپ، ەلورداعا استانا اتاۋىن قايتارۋ ماسەلەسى تالقىلاندى. جيىنعا بارلىعى 31 دەپۋتاتتىڭ 25-ءى قاتىسقان.

سەسسيا قورىتىندىسى بويىنشا دەپۋتاتتار ۇسىنىستى قولداپ، شەشىم قابىلدادى. ەندى قۇجات ۇكىمەت جانىنداعى رەسپۋبليكالىق ونوماستيكا كوميسسياسىنىڭ قاراۋىنا جىبەرىلەدى.

«الەمدىك تاجىريبەدە ەل استانالارىنىڭ بۇرىنعى اتاۋلارىن قايتارعان جاعدايلار بار. قازىر ءبىز جاڭا قازاقستانعا اياق باسىپ جاتقاندا، ەلوردانىڭ جاڭا اتاۋى – بۇل سيمۆوليكالىق مانگە يە بولادى. جەرگىلىكتى تۇرعىن رەتىندە مەن باس قالامىزعا استانا اتاۋىن قايتارۋدى قولدايمىن. ونى تەك قازاقستاندا عانا ەمەس، بارشا الەم بىلەدى. بۇل – تانىمال برەند»، - دەدى ماسليحات دەپۋتاتى اسقار سماعۇلوۆ.

بۇعان دەيىن ءماسليحات حاتشىسى ەرلان كاناليموۆ بۇل پروتسەسس بىرنەشە كەزەڭنەن وتەتىنىن ايتقان بولاتىن.

سونىمەن قاتار، ءماسليحات حاتشىسى ەلوردا اتاۋىن وزگەرتۋگە قاتىستى شىعىندارعا تۇسىنىك بەرگەن ەدى. ونىڭ ايتۋىنشا، تسيفرلىق قۇجات اينالىمىنا كوشىپ جاتقانىمىزعا بايلانىستى شىعىن از بولادى.

Abai.kz