قاراقالپاقستانداعى وقيعاعا بايلانىستى الماتىدا ۇستالعان قاراقالپاق بەلسەندىلەرى قوشقارباي تورەمۇراتوۆ، جانگەلدى جاقسىمبەتوۆ جانە رايسا قۇدايبەرگەنوۆاعا الماتى اۋدانارالىق مامانداندىرىلعان تەرگەۋ سوتى مەن ىلە اۋداندىق سوتى 40 كۇنگە قاماۋ جونىندە بۇلتارتپاۋ شاراسىن بەلگىلەگەن.

بۇل تۋرالى قاراقالپاق دياسپوراسىنىڭ وكىلى، بەلسەندى اقىلبەك مۇراتباي حابارلادى.

"وتكەن سەيسەنبىدە بولعان ۇستاۋلاردان كەيىن ەرتەسىنە جانگەلدى جاقسىمبەتوۆتى قاماۋ مەرزىمى 40 كۇنگە ۇزاردى. ودان كەيىن بەيسەنبىدە قوشقارباي تورەمۇراتوۆتى قاماۋ مەرزىمى 40 قىرىق كۇنگە ۇزاردى. قازىر ولار سي-18 تەرگەۋ يزولياتورىندا وتىر. جۇما كۇنى ىلە اۋدانىندا ۇستالعان رايسا قۇدايبەرگەنوۆانى دا 40 كۇن قاماۋدا ۇستاۋ شاراسىمەن قوناەۆ قالاسىنداعى تەرگەۋ يزولياتورىنا اپارعان", – دەيدى اقىلبەك مۇراتباي.

بەلسەندىنىڭ سوزىنشە، 55 جاستاعى رايسا قۇدايبەرگەنوۆانىڭ 2 دارەجەلى مۇگەدەكتىگى بار. يزولياتوردا جاعدايى ناشارلاپ، جەدەل جاردەم شاقىرىلعان. مۇنى ازاتتىققا بەلسەندىنىڭ قىزى گۇلشات ساتارنيازوۆا دا راستادى. قازىر قۇدايبەرگەنوۆانىڭ دەنساۋلىعى قالاي ەكەنى بەلگىسىز. ادۆوكاتى پىكىر بەرۋدەن باس تارتتى. الماتى وبلىسى پوليتسيا دەپارتامەنتى تۇسىنىكتەمە بەرمەدى.

قاراقالپاق بەلسەندىلەرى 13 قىركۇيەكتەن باستاپ ۇستالا باستادى. كەي اقپاراتقا قاراعاندا، بەلسەندىلەر وزبەكستاندا قىلمىستىق كودەكستىڭ ەكى بابى بويىنشا كۇدىكتى دەپ تانىلىپ، ىزدەۋ جاريالانعان. ولاردىڭ ۇستىنەن "كونستيتۋتسيالىق قۇرىلىسقا نۇقسان كەلتىرۋ" (159-باپ) جانە "قوعام تارتىبىنە قاۋىپ توندىرەتىن ماتەريالدار ازىرلەۋ" (244-1 باپ) باپتارى بويىنشا قىلمىستىق ءىس قوزعالعان.

بۇل جونىندە الماتى قالاسى مەن الماتى وبلىسى پوليتسيا دەپارتامەنتتەرىنەن اقپارات الۋ مۇمكىن بولمادى.

قاراقالپاق دياسپوراسىنىڭ وكىلدەرى ولار قازاندا وتەتىن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (وبسە) ادام قۇقىقتارى جونىندە وتىرىسىنا بايلانىستى تۇتقىندالدى دەپ ەسەپتەيدى.

نورۆەگياعا ساياسي باسپانا ىزدەپ كوشكەن بەلسەندى، "العا، قاراقالپاقستان" ۇيىمىنىڭ جەتەكشىسى امان ساعيدوللانىڭ سوزىنشە، قوشقارباي تورەمۇراتوۆ سوندا بارىپ، قاراقالپاقستاندا شىلدەدە بولعان وقيعا جونىندە ءسوز سويلەمەك بولعان.

Abai.kz