قىركۇيەكتىڭ سوڭعى كۇندەرى قازاقستان ارقىلى رەسەيدىڭ 40 مىڭعا جۋىق ازاماتى وزگە ەلدەرگە كەتكەن. نەگىزگى باعىتتارى – قىرعىزستان مەن وزبەكستان.

بەس كۇن ىشىندە رەسەيدىڭ 6 مىڭعا جۋىق ازاماتى قازاقستان اۋەجايلارىنان شەتەلگە ۇشقان. بۇل جونىندە كوشى-قون كوميتەتى توراعاسىنىڭ مىندەتىن اتقارۋشى، پوليتسيا پولكوۆنيگى اسلان اتالىقوۆ بريفينگ كەزىندە ايتتى.

بريفينگ سپيكەرىنىڭ مالىمەتىنشە، قازاقستانعا 21 قىركۇيەككە دەيىن كۇنىنە 9-12 مىڭ ادام كەلگەن، ال 22 قىركۇيەكتەن باستاپ كەلۋشىلەر ەكى ەسە كوبەيگەن. ىشكى ىستەر مينيسترلىگى وكىلىنىڭ سوزىنشە، قازاقستاننان كۇن سايىن 15-17 مىڭ ادام كۇندەلىكتى شارۋالارىمەن رەسەيگە وتەدى.

ىشكى ىستەر مينيسترلىگىنىڭ مالىمەتىنە قاراعاندا، جىل باسىنان بەرى قازاقستانعا 4,3 ميلليون شەتەل ازاماتى كەلگەن. ونىڭ 1,7 ميلليونى (39%) رەسيدەن، 1,5 ميلليونى (34%) وزبەكستاننان; 547 مىڭى قىرعىزستاننان، 200 مىڭنان استامى تاجىكستاننان، 53 مىڭى بەلارۋستان، 68 مىڭى تۇركيادان، 43 مىڭى گەرمانيادان جەتكەندەر. وسى ارالىقتا قازاقستاننان 4,1 ميلليون ادام شەتەلگە كەتكەن. ونىڭ 1,6 ميلليونى رەسەي ازاماتى، 1,3 ميلليونى وزبەكستان ازاماتى، 540 مىڭى قىرعىزستان ازاماتى جانە 196 مىڭى تاجىكستان ازاماتى.

"2019 جىلى، ياعني كوروناۆيرۋس ىندەتى باستالماي تۇرعاندا قازاقستانعا رەسەيدىڭ 2 ميلليون 875 مىڭ ازاماتى كىرگەن. ال بيىل 9 ايدا – 1 ميلليون 600 مىڭ عانا، ياعني الدەقايدا از", - دەيدى اسلان اتالىقوۆ.

ىشكى ىستەر مينيسترلىگىنىڭ مالىمەتىنە قاراعاندا، قىركۇيەك باستالعالى بەرى شەتەلدىڭ 896 ازاماتى قازاقستاندا تۇراقتى تۇرۋدى سۇراعان، ونىڭ 115-ءى رەسەي ازاماتى. پوليتسيا پروفيلاكتيكا ءىس-شاراسىن باستاعان.

Abai.kz