بۇگىن، 25 قىركۇيەك كۇنى حالىقارالىق تۇركى اكادەمياسىنىڭ ۇيىمداستىرۋىمەن «ورحوننان ورحان عازيگە دەيىن» دەپ اتالاتىن IV حالىقارالىق ارحەولوگيالىق-مادەني ەكسپەديتسيا جۇمىسىن باستادى. ءتورتىنشى رەت وتكىزىلىپ وتىرعان بيىلعى ەكسپەديتسيا تۇركى الەمىنىڭ 2022 جىلعى مادەني استاناسى – بۋرسا قالاسىنا ۇيىمداستىرىلىپ وتىر.

وسىعان وراي تۇركياعا ساپارمەن كەلگەن تۇركى اكادەمياسى پرەزيدەنتى مىندەتىن اتقارۋشى فۋزۋلي ءماجيدلي ەكسپەديتسيا جۇمىسىنا قاتىسۋشىلارمەن كەزدەسىپ، ماڭىزدى ءىس-شارا تۋرالى كەڭىنەن مالىمەت بەردى.

ف. ءماجيدليدىڭ ايتۋىنشا، بۋرسا قالاسىنىڭ تۇركى الەمى كيەلى جەرلەرىنىڭ ءبىرى رەتىندەگى تاريحي ماڭىزى زور. سول سەبەپتى تۇركى اكادەمياسى IV ءداستۇرلى ارحەولوگيالىق-مادەني ەكسپەديتسياسىن “ورحوننان ورحان عازيگە دەيىن” دەگەن تاقىرىپ اياسىندا وسى وڭىرگە ارناپ وتىر.

“حالىقارالىق تۇركى اكادەمياسى “تۇركى الەمىنىڭ كيەلى جەرلەرى” جوباسى اياسىندا وسىنداي ءداستۇرلى حالىقارالىق ارحەولوگيالىق-مادەني ەكسپەديتسيالار وتكىزىپ كەلەدى. ەكسپەديتسيا تۇركى الەمىنىڭ تاريحى مەن مادەنيەتىندە ماڭىزى زور كيەلى جەرلەردى زەرتتەۋ مەن ناسيحاتتاۋعا جانە تۇركى دۇنيەسىنىڭ وزەكتى ماسەلەلەرىنە ارنالعان عىلىمي ءىس-شارالار وتكىزۋ ارقىلى تۇركولوگيالىق زەرتتەۋلەرگە ۇلەس قوسۋدى ماقسات ەتەدى. وسى ورايدا ءبىزدىڭ العاشقى ساپارىمىز 2015 جىلى شىعىس قازاقستاندا “التىن بەسىك التاي” اتاۋىمەن ۇيىمداستىرىلعان بولاتىن. ەكىنشى ەكسپەديتسيا 2016 جىلى موڭعوليا اۋماعىنا ء“تاڭىرتاۋدان وتۇكەنگە دەيىن” دەگەن اتپەن جالعاسىن تاپتى. ءۇشىنشى ەكسپەديتسيانى 2017 جىلى قازاقستان رەسپۋبليكاسىندا “كەنتايدان ۇلىتاۋعا دەيىن: تاريحي جادىنىڭ جاڭارۋى” تاقىرىبىندا وتكىزدىك. ورحون اڭعارىندا ىرگەسىن بەكەمدەگەن تۇركى مەملەكەتتىلىگى وسمان مەملەكەتىنىڭ قۇرىلۋىمەن شىرقاۋ شىڭىنا جەتتى. سوندىقتان بۋرساعا ۇيىمداستىرىلعان بۇل ەكسپەديتسيانىڭ سيمۆوليكالىق ءمانى زور”، دەپ اتاپ ءوتتى اكادەمياسى پرەزيدەنتى مىندەتىن اتقارۋشى.

باعدارلاما بويىنشا ەكسپەديتسياعا قاتىسۋشىلار اتالعان وڭىردەگى تاريحي ورىنداردى ارالاپ كورەدى. اتاپ ايتقاندا، سەگيۋت ماڭىنداعى ەرتۇعىرىل مازارىنا، يزنيكتەگى قىرعىز كەسەنەسىنە جانە بۋرسا قالاسىنداعى ايگىلى ۇلى جامي مەشىتىنە بارىپ، تاعزىم ەتتى.

سونىمەن قاتار، ەكسپەديتسيا اياسىندا 130 جىلدان بەرگى ەڭ اۋقىمدى تاريحي-ارحەولوگيالىق جاڭالىق سانالاتىن قۇتلىق قاعان كەشەنى مەن جازبا ەسكەرتكىشىنىڭ حالىقارالىق تانىستىرىلىمىن وتكىزۋ جوسپارلانىپ وتىر.

ەكسپەديتسيا جۇمىسىنا ازەربايجان، قازاقستان، قىرعىزستان، وزبەكستان، تۇركيا، ماجارستان، موڭعوليا ەلدەرىنەن جانە رەسەي فەدەراتسياسىنا قاراستى تاتارستان مەن باشقۇرتستان رەسپۋبليكالارىنان زيالى قاۋىم وكىلدەرى، تانىمال عالىمدار قاتىسۋدا.

اكادەميا اتالعان ەكسپەديتسيانى كەلەسى جىلى تۇركى الەمىنىڭ 2023 جىلعى مادەني استاناسى شۋشا قالاسىندا وتكىزۋدى جوسپارلاپ وتىر.

Abai.kz