رەسەي پرەزيدەنتى ۆلاديمير پۋتين 5 قازاندا زاپوروجە اەس-ىندەگى اتوم ەلەكتر ەنەرگياسىن قولداناتىن نىسانداردى رەسەي مەنشىگىنە وتكىزۋ جونىندەگى جارلىققا قول قويدى.

بۇل اتوم ەلەكتر ستانتسيا - ەۋروپاداعى ەڭ ءىرى التى ەنەرگوبلوكتاردىڭ ءبىرى. ول رەسەي باسىپ العان ۋكراينانىڭ زاپوروجە وبلىسى اۋماعىندا ورنالاسقان.

رەسەي پرەزيدەنتى ۆلاديمير پۋتين سونىمەن بىرگە ورىس كۇشتەرىنىڭ ۋكراينادا جاۋلاپ العان دونەتسك، زاپوروجە، لۋگانسك وبلىستارىن جانە نيكولاەۆ پەن حەرسون وبلىستارىنىڭ ءبىر بولىگىن رەسەي قۇرامىنا قوسۋ تۋرالى كەلىسىمگە قول قويدى. مۇنىمەن قوسا رەسەي قۇرامىنا ءتورت جاڭا سۋبەكتىنى قابىلداۋ تۋرالى كونستيتۋتسيالىق زاڭدارعا قول قويدى.

وسىعان دەيىن فەدەراتسيا كەڭەسى ۋكراينانىڭ بەس ايماعىن رەسەي قۇرامىنا قوسۋدى راتيفيكاتسيالاعان. ۋكراينا اۋماعىن اننەكسيالاۋدى بارلىق پالاتا مۇشەلەرىنىڭ باسىم بولىگى: 170 دەپۋتاتتىڭ 153-ءى قولداعان.

رەسەي اەس ورنالاسقان ەنەرگودار قالاسىن بيىل ناۋرىز ايىندا باقىلاۋىنا العان. قازىر اەس-ءتىڭ ەنەرگوبلوكتارىنىڭ باسىم بولىگى توقتاپ تۇر. بۇل اۋماققا قازىر ءجيى وق اتقىلانادى. ۋكراينا مەن باتىس ەلدەرى ستانتسيادان اسكەردى شىعارۋدى تالاپ ەتەدى. ماگاتە دا وسى تالاپتى بىرنەشە رەت قويعان. بىراق رەسەي باس تارتىپ وتىر.

بىرنەشە كۇن بۇرىن ورىس اسكەرى زاپوروجە اەس-ءىنىڭ باس ديرەكتورى يگور مۋراشوۆتى ۇستاپ الىپ كەتكەن. كەيىن ونى بوساتتى، بىراق رەسەي باقىلاۋىنا العان اۋماقتان تەزارادا شىعۋدى تالاپ ەتتى.

Abai.kz