اقوردا قازاقستاننىڭ بۇرىنعى پرەمەر-ءمينيسترى، ساياسي ديسسيدەنت اكەجان قاجىگەلديننىڭ ەلگە قايتۋىنا قارسى ەمەس. بىراق بۇل پروتسەسس قازاقستانداعى كەزەكتەن تىس پرەزيدەنت سايلاۋى وتكەننەن كەيىن جۇزەگە اسىرىلادى. بۇل تۋرالى DALA INSIDE دەرەككوزى حابارلاعان.

قازىر قاجىگەلدين شەتەلگە زاڭسىز شىعارىلعان قاراجاتتى قايتارۋ بويىنشا بيلىكپەن بىرلەسە جۇمىس اتقارۋدا. اكەجان ماعجانۇلى مەن قازاقستانداعى ساياسي رەجيم اراسىندا ءوزارا تۇسىنىستىك پەن سەنىم ورناعان.

شەتەلدە تۇرىپ جاتقان ەكس-پرەمەر-مينيستر قازاقستانعا قايتۋى ءۇشىن وعان 21 جىل بۇرىن شىعارىلعان سوت شەشىمى كۇشىن جويۋى ءتيىس. مۇنى، جۋرناليستەر، اكەلى-بالالى ماتاەۆتاردىڭ اقتالۋ ستسەناريىمەن ىسكە اسىرۋعا بولادى. ول ءۇشىن قاجىگەلديننىڭ وكىلى رەتىندە قازاقستاننان ادۆوكات شىعىپ، باس پروكۋراتۋراعا ءوتىنىش جىبەرۋى كەرەك.

بىراق بۇل ماسەلەنىڭ انىق-قانىعى پرەزيدەنت سايلاۋىنان كەيىن بەلگىلى بولادى. سەبەبى، بۇل جاڭادان سايلاناتىن ەل باسشىسىنىڭ كوزقاراسىنا تىكەلەي بايلانىستى شارۋا.

بيىل قاڭتار وقيعاسىنان كەيىن اكەجان قاجىگەلدين Abai.kz-كە بەرگەن سۇحباتىندا جاڭا مەملەكەت ءۇشىن قۇرىلعان رەسمي كوميسسيانىڭ قۇرامىندا بولۋعا دايىن ەكەنىن جەتكىزگەن بولاتىن.

«مەن وتىرىك پەن ساتقىندىقتىڭ ءالى جويىلماعان جۇيەسىنىڭ ءبىر بولىگى بولعىم كەلمەيدى. دەگەنمەن، ءوز حالقىممەن بىرگە وتكەن قاندى وقيعانى ەڭسەرۋگە ارقاشان دايىنمىن. جانە حالىق سەنىمىندەگى ۇكىمەتتە نەمەسە نازارباەۆ رەجيمىنىڭ زارداپتارىن ەڭسەرۋ جانە جاڭا مەملەكەت قۇرۋ ءۇشىن ارنايى قۇرىلعان رەسمي كوميسسيادا بولۋعا دايىنمىن.

قازىر ءبىر توپ ماماندارمەن بىرگە قازاق ەلىنىڭ بۇكىل ەكونوميكاسىن ساۋىقتىرۋ جانە جاڭعىرتۋ باعدارلاماسىن دايىندادىق.

وندا ەڭ الدىمەن، ەل بايلىعىن كوپشىلىكتىڭ مۇددەسى ءۇشىن ءادىل ءبولۋدىڭ بۇكىل مەحانيزمىن قايتا قاراۋ جولدارى كورسەتىلدى. سونداي-اق، ەلگە اۋقىمدى ينۆەستيتسيالار تارتۋدىڭ تەتىكتەرى دە قاراستىرىلعان. بۇل ءۇشىن ازاماتتاردىڭ بيلىككە دەگەن سەنىمىن قايتارىپ قانا قويماي، ينۆەستورلاردىڭ ەلگە دەگەن سەنىمىن دە قالپىنا كەلتىرۋ ماڭىزدى.

شەتەلدە جاسىرىلعان نازارباەۆ اۋلەتى مەن ونىڭ سىبايلاستارىنىڭ بايلىعىن سول شەتەلدىكتەر ءبىزدىڭ جەرلەستەرىمىزدەن دە ارتىق بىلەدى. سىبايلاس جەمقورلىققا قارسى ناقتى كۇرەستى قولعا، ۇرلانعان كاپيتالدى ەلگە قايتارۋدى ءوز موينىمىزعا الماساق، رەفورمالاردى شىنىمەن باستالدى دەگەنگە ەشكىم سەنبەيدى. مۇنىڭ ءبارى ءالى دە قابىلداۋعا بولاتىن زاڭ بويىنشا اشىق تۇردە جاسالۋى كەرەك. بۇل جاڭا بيلىك بۇرىنعى بيلىكتىڭ بايلىعىن ءوزارا ءبولىسىپ جاتىر دەگەن وي بولماۋى ءۇشىن دە كەرەك. سوندا عانا حالىق بۇل جۇمىستاردىڭ تەك ۇلت مۇددەسى ءۇشىن جاسالىپ جاتقانىن بىلەدى» ،- دەگەن ەدى ول.

قاجىگەلدين سوت شەشىمى وزگەرىپ، قازاقستانعا كەلگەننىڭ وزىندە ەلگە قونىس اۋدارمايتىنىن، بىراق، بارىپ كەلىپ جۇرۋگە، تۋعان جەرىنە بارىپ قۇران وقىتۋعا، تۋىستارىمەن كەزدەسىپ ەل-جەر ارالاۋعا نيەتى بارىن جەتكىزگەن بولاتىن.

ايجان تەمىرحان

Abai.kz