عۇلاما جازۋشى مۇحتار اۋەزوۆ ايتقانداي، ءبىز «شەشەنى سۋداي توگىلگەن، تىڭداۋشىسى بورداي ەگىلگەن» حالىقپىز. بىراق ءدال قازىر قانداي كۇيدەمىز؟ شەشەن سويلەۋ تۇگىلى، انا ءتىلدىڭ تازالىعىن ساقتاپ سويلەۋدىڭ ءوزى مۇڭعا اينالىپ، وعان بەي-جاي قارايتىندار قاتارى قالىڭداپ بارادى.

دەمەك، مۇنداي كەمشىلىكتى جويىپ، جاس ۇرپاقتىڭ ساناسىن قالىپتاستىرۋدى قولعا الۋىمىز ءلازىم. وسى باعىتتا جەمىستى جۇمىس ىستەپ كەلە جاتقان اباي اتىنداعى رممي-ءدىڭ «ءدىلمار» شەشەندىك ونەر ۇيىرمەسى اباي اتىنداعى قازۇپۋ-مەن بىرلەسە وتىرىپ تاعى ءبىر تىڭ جوبانى قولعا الدى.

اتالعان جوعارعى وقۋ ورنىندا ستۋدەنتتەر اراسىندا ءى رەسپۋبليكالىق «ءدىلمار» شەشەندىك ونەر بايقاۋى وتەدى. ەلىمىزدىڭ ءار وڭىرىندەگى 10 جۋىق جوعارعى وقۋ ورنىنان 20 تاياۋ ستۋدەنت قاتىسىپ ءسوز سايىسىنا تۇسەدى.

شەشەندىك سايىس ەكى بولىمنەن تۇرادى.

«الامان» دەپ اتالاتىن 1-ءبولىم ەكى كەزەڭگە بولىنەدى. ءبىرىنشى كەزەڭدە قاتىسۋشىلار جەرەبە ارقىلى تاقىرىپ تاڭداپ جارتى ساعاتتىق جەكپە-جەك تۇرىندەگى شەشەندىك سايىسقا تۇسەدى. وندا كوركەمدىك، جۇيەلىلىك، ناقتىلىق، وي ۇشقىرلىعى، ءتىل تازالىعى، داۋىس مانەرى، ساحنا مادەنيەتىن ساقتاۋى، ت.ب. ساراپقا سالىنادى.

وسى ءبولىمنىڭ ەكىنشى كەزەڭىندە بي-شەشەندەردىڭ ءسوزىن جاتقا ايتۋدان جارىسادى.

وزا شاپقان 10 قاتىسۋشى «جۇزدەن جۇيرىك» دەپ اتالاتىن 2-بولىمگە وتەدى. ول ەكى كەزەڭگە بولىنگەن.

ءبىرىنشى كەزەڭدە جەرەبە ارقىلى تاڭدالعان ءبىر تاقىرىپ اياسىندا سۋىرىپ-سالما ونەرىن كورسەتەدى. ەكىنشى كەزەڭىندە شەشەندىككە قاتىستى لوگيكالىق سۇراقتارعا (استارلاپ سويلەۋ، تۇسپالداپ سويلەۋ، جۇمباقتاپ سويلەۋ، ت.ب.) جاۋاپ بەرەدى.

2 ءبولىم، 4 كەزەڭنىڭ قورىتىندىسى بويىنشا جۇلدەگەرلەر انىقتالادى. باس جۇلدەگە 150 000 تەڭگە،

1-ورىنعا 100 000 تەڭگە،  2-ورىن (ەكەۋ) 70 000 تەڭگە، 3-ورىن (ۇشەۋ) 50 000 تەڭگە قارجىلاي سىياقى بەرىلەدى. بايقاۋ دەمەۋشىسى – «اتامۇرا» كورپوراتسياسى.

بۇعان دەيىن اباي اتىنداعى رممي-دە 3 رەت وقۋشىلار اراسىندا رەسپۋبليكالىق شەشەندىك سايىس وتكەن بولاتىن. بۇل جولعى بايقاۋ سونىڭ جەتىلگەن، دامىعان ءتۇرى. جوبا اۆتورى – جۋرناليست، شەشەندىك ءسوز ونەرى ءپانىنىڭ مۇعالىمى جارقىن سالەنۇلى.

بايقاۋعا بەلگىلى ادەبيەت پەن ونەر قايراتكەرلەرى قازىلىق جاسايدى. رۋحانيات جاناشىرلارى، وقىتۋشىلار مەن ستۋدەنتتەر، باق وكىلدەرى قاتىسادى.

شەشەندىك سايىستى وتكىزۋدىڭ باستى ماقساتى: جاڭا بۋىن، جاس ۇرپاقتى ءتىل تازالىعىن ساقتاۋعا، مەملەكەتتىك ءتىلدى مەيلىنشە جەتىك بىلۋگە ىقپال ەتۋ; شەشەندىك ونەر ارقىلى بىلىمگەرگە ءسوز ونەرىنىڭ ەرەكشەلىگى مەن جۇيەلى ءسوز ساپتاۋ شارتتارىن مەڭگەرتۋ; جۇيەلى سويلەۋ داعدىسى مەن سويلەۋ شەبەرلىگىن شىڭداۋ; ءسوز قۇندىلىعىن باعالاۋعا، ءتاريحي-مادەني جانە ۇلتتىق بولمىسىن تانۋعا، ەتنومادەني تاربيە بەرۋگە، سول ارقىلى ادەبي ءتىل نورماسىنا سايكەس مەملەكەتتىك ءتىلدى قولدانۋدىڭ جاڭا دەڭگەيىن قالىپتاستىرۋ.

بايقاۋ دەمەۋشىسى: «اتامۇرا» كورپوراتسياسى

ورنى مەن ۋاقىتى: قازىبەك بي 28, 38-اۋديتوريا، 12- قازان، ساعات: 09.30

ۇيىمداستىرۋشى: اباي اتىنداعى قازۇپۋ «ءدىلمار» شەشەندىك ۇيىرمەسى، مەدەۋ اۋدانى جاستار رەسۋرستىق ورتالىعى

Abai.kz