- سوتتالۋشىنىڭ تۇزەلگەنى جايلى دالەل جەتكىلىكسىز، ونى بوساتۋ تۋرالى ءوتىنىش بەرەتىن ۋاقىت بولعان جوق،- دەدى قاۋلىنى وقىعان سۋديا جانبولات شايكومالوۆ.

56 جاستاعى كاسىپكەر بيىل تامىز ايىندا جەزقازعان قالالىق سوتىنا شارتتى جازامەن بوساتۋدى سۇراپ، ءوتىنىش تۇسىرگەن. بىراق ءوتىنىشى قاناعاتتاندىرىلماعان. قالالىق سوتتىڭ بۇل قاۋلىسىمەن كەلىسپەگەن توقماديدىڭ ادۆوكاتتارى وبلىستىق سوتقا شاعىمدانعان.

كاسىپكەردىڭ جاقىندارى مۇنداي شەشىم بولارىن سەزدىك دەيدى.

- بۇل ءىستىڭ مۇحتار ءابليازوۆتى قۋدالاۋمەن بايلانىستى ەكەنى بەلگىلى. سول سەبەپتى مۇراتحان توقماديدى شارتى جازامەن بوساتا الماي وتىر. بۇل ءىس اۋەل باستان زاڭسىز ءوتتى، ونى جاساعاندار ءالى دە بيلىكتە وتىرعاندىقتان بۇل ءىستىڭ اشىلۋىنان قورقادى، - دەدى كاسىپكەردىڭ ايەلى ءجاميلا ايىمبەتوۆا - توقمادي.

جەكە شاعىمى قارالعان سوت پروتسەسىنە توقماديدىڭ ادۆوكاتتارى عانا قاتىستى، ءوزى بولعان جوق. وزگە باقىلاۋشىلار مەن جۋرناليستەر سوتتى ونلاين باقىلادى.

ادۆوكاتتارى 2018 جىلى ون جارىم جىلعا سوتتالعان كاسىپكەردىڭ مەرزىمىنەن بۇرىن بوساپ شىعۋعا زاڭدى نەگىز بار دەپ ەسەپتەيدى.

- تۇرمەدە ءتارتىپ بۇزباعانىن، ەكى ماراپاتىن، مەملەكەتكە ماتەريالدىق قارىزى جوعىن، سوت شىعىندارىن تولەگەنىن، جازا مەرزىمىنىڭ جارتىسىن وتەگەنىن، جۇمىسپەن قامتىلاتىنى جايلى انىقتاماسى، بەس بالاسى مەن قارت انا-اناسى بار ەكەنىن ەسكەرە وتىرىپ شارتتى جازامەن بوساتۋ تۋرالى ءوتىنىشىن قاناعاتتاندىرۋدى سۇرايمىز، - دەدى ادۆوكاتتاردىڭ ءبىرى (اتى-ءجونىن اتاماۋدى ءوتىندى - ازاتتىق)

الايدا پروكۋرور "توقمادي جازا مەرزىمىنىڭ جارتىسىن وتەگەن جوق" دەپ ءوتىنىشتى قاناعاتتاندىرماۋدى سۇرادى.

ادۆوكاتتاردىڭ سوزىنشە، مۇراتحان توقماديدىڭ جازا مەرزىمى ونى ۇستاعان كۇننەن - 2017 جىلدىڭ ماۋسىمىنان باستالادى، ال پروكۋرور توقماديگە ۇكىم شىققان 2018 جىلدىڭ 16 ناۋرىزىنان ەسەپتەگەن بولۋى مۇمكىن.

- سەبەبى جەزقازعان قالالىق سوتىنىڭ 25 تامىزداعى قاۋلىسىندا جازا مەرزىمى 2018 جىلدىڭ 16 ناۋرىزدان باستاپ سانالاتىنى كورسەتىلگەن. 2018 جىلى شىققان سوت ۇكىمىندە جازا مەرزىمى ونىڭ ۇستالعان ۋاقىتى – 2017 جىلدىڭ 12 ماۋسىمىنان باستاپ سانالاتىنى جازىلعان. ءبىز قالالىق سوتتىڭ بۇل قاۋلىسىنا شاعىم جازىپ، كورسەتكەنبىز، - دەيدى ادۆوكاتتاردى ءبىرى.

مۇراتحان توقمادي سوت ۇكىمى بويىنشا بەرىلگەن جازانى ۇلىتاۋ وبلىسىنداعى اك 159/25 تۇزەۋ مەكەمەسىندا وتەپ جاتىر. ول مۇندا 2020 جىلدىڭ قازان ايىندا جەتكىزىلگەن. بۇعان دەيىن الماتىداعى تەرگەۋ يزولياتورىندا ترانزيتتىك كامەرادا بولعان. تۋىستارىنىڭ سوزىنشە، وسى كۇنگە دەيىن ول كامەرادا جالعىز وتىرعان.

مۇراتحان توقمادي "بتا بانك باسشىسى ەرجان تاتىشەۆتى قۋعىنداعى بانكير مۇحتار ءابليازوۆتىڭ تاپسىرىسىمەن ءولتىردى" دەگەن ايىپپەن 2018 جىلى ون جارىم جىلعا سوتتالعان.

ەرجان تاتىشەۆ 2004 جىلى اڭشىلىقتى جۇرگەندە وق ءتيىپ ولگەن. سول كەزدە مۇنى سوت "جازىم" دەپ تانىپ، بانكيردىڭ جانىندا بىرگە بولعان كاسىپكەر مۇراتحان توقماديدى ءبىر جىلعا سوتتاعان ەدى. 2017 جىلى بۇل ءىس قايتا قارالىپ، توقمادي وزىنە تاعىلعان ايىپتى مويىنداعان.

بىراق بيىل ناۋرىزدا كاسىپكەر تاتىشەۆتىڭ ولىمىنە ءابليازوۆتىڭ قاتىسى جوعىن مالىمدەپ، ءىستى قايتا قاراۋدى، ءوزىن اقتاپ، بوساتۋدى سۇراعان. جەزقازعان تۇرمەسىنەن پرەزيدەنت قاسىم-جومارت توقاەۆقا ارناپ جازعان حاتىندا توقمادي تەرگەۋدە ازاپتالىپ، تاعىلعان ايىپتى مويىنداۋعا ءماجبۇر بولعانىن ايتقان.

Abai.kz