بۇگىن ماجىلىستە «قازاقستان رەسپۋبليكاسىنداعى تسيفرلىق اكتيۆتەر تۋرالى» زاڭ جوباسى جانە وعان ىلەسپە بەس زاڭنامالىق اكتىگە ەنگىزىلگەن تۇزەتۋلەر ماقۇلداندى.

ماينەرلەردىڭ قىزمەتىن رەتتەيتىن زاڭ جوباسى مەملەكەت باسشىسىنىڭ تسيفرلىق ماينينگ ءوندىرىسىن قۇقىقتىق رەتتەۋ ماسەلەلەرى بويىنشا تاپسىرمالارىن ورىنداۋ ماقساتىندا ءماجىلىس دەپۋتاتتارىنىڭ باستاماسىمەن ازىرلەنگەن. جۇمىس توبىنىڭ جەتەكشىسى ەكاتەرينا سمىشلياەۆانىڭ ايتۋىنشا، «تسيفرلىق اكتيۆتەر تۋرالى» زاڭ جوباسىن ازىرلەۋ ەكى سەبەپكە بايلانىستى بولدى. بىرىنشىدەن، ەل اۋماعىندا تسيفرلىق ماينينگتى رەتتەۋ قاجەتتىلىگى، ەكىنشىدەن، مەملەكەت باسشىسىنىڭ Digital Bridge فورۋمىندا قازاقستان اۋماعىندا كريپتوۆاليۋتالىق ەكوجۇيەنى دامىتۋ تۋرالى بەرگەن تاپسىرماسى نەگىز بولىپ وتىر.

– ماينەرلەر قازاقستان ەكونوميكاسىنىڭ تولىققاندى قاتىسۋشىلارىنا اينالادى. نەگىزىنەن بۇعان دەيىن ماينينگ جۇمىستارىن رەزيدەنت ەمەس ادامدار بۇلتتى سەرۆيستەردە جۇزەگە اسىرعان. قازاقستان بلوكچەين يندۋسترياسىنىڭ شيكىزات قوسىمشاسى رەتىندە پايدالانىلدى. زاڭ جوبالارى ارقىلى ءبىز ماينەرلەردى قازاقستاندا ليتسەنزيالاۋعا، ياعني، زاڭدى تۇلعالاردى قۇرۋعا جانە تولىققاندى سالىق سالۋ سۋبەكتىلەرىنە اينالۋعا مىندەتتەيمىز»، – دەدى ە.سمىشلياەۆا.

جوبا ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىندە ازىرلەندى. بۇل جۇمىسقا مەملەكەتتىك ورگاندار مەن ساراپشىلار تارتىلدى. جاڭا زاڭ جوباسى سالىق كودەكسى مەن اكىمشىلىك كودەكستى، «رۇقساتتار جانە حابارلامالار تۋرالى» جانە «اقپاراتتاندىرۋ تۋرالى» زاڭداردى، سونداي-اق «استانا» حالىقارالىق قارجى ورتالىعى تۋرالى» كونستيتۋتسيالىق زاڭدى قامتيدى.

زاڭ جوباسىندا قامتاماسىز ەتىلمەگەن تسيفرلىق اكتيۆتەردىڭ اينالىمىن، سونىڭ ىشىندە ولاردى شىعارۋ مەن ايىرباستاۋدى رەتتەۋدىڭ ەرەكشە ءتارتىبىن ەنگىزۋ، سونداي-اق كريپتوۆاليۋتا ايىرباستاۋ كەزەڭىندە ماينينگ كومپانيالارىنىڭ حالىقارالىق قارجى ورتالىعىمەن ءوزارا ءىس-ارەكەت ءتارتىبىن ايقىنداۋ ۇسىنىلدى. بۇدان باسقا، قامتاماسىز ەتىلگەن تسيفرلىق اكتيۆتەردىڭ تۇرلەرى بەكىتىلەدى جانە بۇرىن قازاقستان زاڭناماسىندا بەكىتىلمەگەن قامتاماسىز ەتىلگەن تسيفرلىق اكتيۆتەر اينالىمىنىڭ ءتارتىبى ايقىندالادى.

ال باستى جاڭالىقتاردىڭ ءبىرى – وسى ۋاقىتقا دەيىن سالىق تولەمەگەن  ماينەرلەرگە سالىق سالۋ بولادى. كريپتويندۋسترياعا سالىق سالۋ جۇيەسى بىرنەشە كەزەڭنەن تۇرادى: جابدىقتى اكەلۋ كەزىندەگى قوسىلعان قۇن سالىعى، ليتسەنزيا ءۇشىن تولەم، كيلوۆاتتقا تسيفرلىق مانينگ اقىسى، الىنعان سىياقىدان كورپوراتيۆتىك تابىس سالىعى، پۋلدان تۇسكەن كورپوراتيۆتىك تابىس سالىعى، كريپتابيرجالاردا ايىرباستاۋ اقىسى.

بۇگىن جالپى وتىرىستا زاڭ جوباسى ءبىرىنشى وقىلىمدا ماقۇلدانىپ، ماجىلىستە جۇمىس جالعاسۋدا.

Abai.kz