بۇۇ باس اسسامبلەياسى ۋكراينانىڭ ءتورت وبلىسىنا قاتىستى قاراردى جاسىرىن داۋىسقا سالۋ تۋرالى رەسەيدىڭ ۇسىنىسىن قولدامادى. ۋكرايناداعى رەفەرەندۋمداردى مويىنداماۋ تۋرالى رەزوليۋتسياعا رەسەي، بەلارۋس، سولتۇستىك كورەيا، نيكاراگۋا، سيريا عانا قارسى شىقتى. 35 ەل قالىس قالدى. ونىڭ ىشىندە قازاقستان مەن ورتا ازيانىڭ ءتورت مەملەكەتى بار. باسقا ەلدەردىڭ ءبارى قولدادى.

ايتا كەتەيىك، ۋكراينانىڭ حەرسون، زاپاروجە، دونەتسك پەن لۋگانسك وبلىستارىن رف-عا قوسۋ تۋرالى رەفەرەندۋم 23 قىركۇيەكتە باستالىپ، 27 قىركۇيەك كۇنى اياقتالدى.

ناتيجەسىندە ءوزىن-ءوزى جاريالاعان «دحر» مەن «لحر» سەپاراتيستىك قۇرىلىمدارى مەن حەرسون مەن زاپاروجە وڭىرلەرى رەسەيگە قوسىلدى. رەفەرەندۋمداردى ءبىرىنشى بولىپ سولتۇستىك كورەيا مويىندادى. 30 قىركۇيەكتە پۋتين ۋكراينانىڭ ءتورت وبلىسىن رەسەيگە قوسۋ تۋرالى جارلىققا قول قويدى.

قازاقستان ۋكراينا جەرىندە وتكىزىلگەن رەفەرەندۋمداردى مويىندامايتىنىن بىلدىرگەن بولاتىن.

«لحر» مەن «دحر» دەپ ءوزىن-ءوزى جاريالاعان مەملەكەتتەردىڭ جانە زاپوروجە مەن حەرسون وبلىستارى اسكەري اكىمشىلىكتەرىنىڭ رەسەيگە قوسىلۋ تۋرالى رەفەرەندۋمدار وتكىزۋىنە كەلەتىن بولساق، قازاقستان مەملەكەتتەردىڭ اۋماقتىق تۇتاستىعى، ولاردىڭ ەگەمەندىك تەڭدىگى جانە بەيبىت قاتار ءومىر ءسۇرۋ قاعيداتتارىن نەگىزگە الادى. پرەزيدەنتىمىز بىرنەشە رەت، ونىڭ ىشىندە بۇۇ مىنبەرىنەن جاقىندا عانا سويلەگەن سوزىندە وسى دۇنيەجۇزىلىك امبەباپ ۇيىمنىڭ جارعىسىنا نەگىزدەلگەن حالىقارالىق قۇقىق قاعيداتىن بۇلجىتپاي ساقتاۋدىڭ ماڭىزدىلىعى تۋرالى مالىمدەدى. جارعىدا بۇۇ-عا مۇشە ەلدەردىڭ بەيبىتشىلىك پەن مەملەكەتتەردىڭ اۋماقتىق تۇتاستىعىن ساقتاۋ جاۋاپكەرشىلىگى تۋرالى ايتىلادى»، – دەدى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.

Abai.kz