رەسەيدىڭ ۋكراينا قالالارىن اتقىلاۋى قىسقا عانا ەففەكت بەردى. رەسەي قوعامى ء"بىز جەڭەمىز" دەگەن سەرپىلىستەن قايتا كۇيبەڭ تىرلىك پەن كۇندەلىكتى ساياسي قىسىمعا اۋىستى. رەسەي حالقىنىڭ ءبىر ساتتىك كوتەرىڭكى كوڭىل كۇيىن موبيليزاتسيانىڭ ەكىنشى تولقىنى سۋ سەپكەندەي باستى. 

رەسەي بيلىگى موبيليزاتسيانىڭ ەكىنشى تولقىنىن جۇرگىزىپ جاتىر. بۇل جولى جاپپاي بارلىق سۋبەكتىدە ەمەس، بىرتىندەپ جاساۋدا. بۇل كرەملدىڭ حالىقتىڭ بيلىككە اشىق قارسىلىعىنان قورقۋى جانە رەسەي بيلىگىنىڭ يميدج جوعالتۋ قاۋپىنەن تۋىنداعان ارەكەت بولسا كەرەك. بۇل جولى موبيليزاتسيا ءبىرىنشى تولقىندا قويىلعان مىندەتتەردى ۋاقىتىلى ورىنداعان ايماقتاردا جالعاسىن تاپتى. ال موبيليزاتسيانىڭ العاشقى تولقىنىندا ساتسىزدىككە ۇشىراپ، ءتيىستى ناتيجە كورسەتە الماعان سۋبەكتى باسشىلارى قىزمەتىنەن الىنۋى مۇمكىن دەگەن اقپارات بار.

ال وسى رەتتە ۋكرايناعا اسكەري كومەك كورسەتۋ بويىنشا قۇرىلعان "رامشتاين" فورماتىندا التىنشى كەزدەسۋ ءوتتى. اقش وداقتاستارىمەن بىرگە رەسەي جاۋلاپ العان اۋماقتى ۋكراينا اسكەرى جىلدام ءارى از شىعىنمەن ازات ەتۋ ءۇشىن، قاجەتتى قارۋدى بەرۋدى جالعاستىراتىنىن مالىمدەدى. بۇل تۋرالى "رامشتاي-6" كەزدەسۋىندە للويد وستين مالىمدەدى. پەنتاگوننىڭ تىزگىنى قولىندا تۇرعان وستين رەسەيگە قارسى كۇرەستە كيەۆتى سوڭىنا دەيىن قولدايتىنىن ناقتىلادى.

وستين ۋكراينا اسكەرى سوڭعى جەتى ايدا تاڭداي قاقتىرار ەرلىك كورسەتىپ، تاباندىلىق تانىتىپ جاتقانىن باسا ايتتى. ول ۋكراين ساربازدارىنىڭ ازات ەتۋ وپەراتسياسىندا شەبەر قيمىلداپ، كاسىبي اسكەر ەكەنىن ۇرىس دالاسىندا كورسەتە بىلگەنىن ايتا كەتتى. اقش قورعانىس مينيسترلىگى ۋكراينا اسكەرى ءوز جەرىن ازات ەتۋدى توقتاتپاي، قارقىنىن ازايتپاۋى ءۇشىن بارىنشا قولداۋدى ارتتىرۋ كەرەكتىگىن دە مالىمدەدى.

اقش گەنەرالى مارك ميللي جۋرناليستەردىڭ سۇراعىنا جاۋاپ بەرۋ بارىسىندا ۋكرايناعا زىمىراندار سوققىسىنان قورعانۋ ءۇشىن زىمىرانعا قارسى جۇيەلەردى جىلدام ارادا جەتكىزۋ باستى ماقسات ەكەنىن اتاپ ءوتتى. ول قازىردىڭ وزىندە باتىس ەلدەرى ۋكرايناعا زىمىران سوققىسىنان قورعانۋ جۇيەلەرىن جەتكىزىپ جاتقانىن ايتادى. ەكى كۇن بۇرىن گەرمانيادان IRIS-T كەشەنى كەلىپ جەتتى. ال جاقىن كۇندەرى NASAMS اكەلىنبەك. رامشتاين فورماتىندا باس قوسقان ەلدەر ۋكرايناعا اۋىر ارتيللەريا، بروندى تەحنيكا مەن اتىس قارۋلارى، سناريادتار مەن زىمىرانداردى ۇزدىكسىز جەتكىزۋگە ۋاعدالاستى.

اسكەري ساراپشىلار رەسەيدىڭ ۋكراينا قالالارىن اتقىلاۋى ۇلكەن قاتەلىك بولعانىن ايتادى. از ۋاقىت قانا ەففەكت بەرگەن سوققىلار، ەندىگى تاڭدا باتىستىڭ كيەۆكە كوپ كولەمدە قارۋ بەرۋگە يتەرمەلەپ وتىر. بۇل زىمىران كەشەنى بويىنشا ۋكراينادان باسىم تۇرعان رەسەيدىڭ ارتىقشىلىق پوزيتسياسىن ازايتا تۇسپەك.

اسحات قاسەنعالي

Abai.kz