بيىل قازاقستاندا  تۇرمىستىق زورلىق-زومبىلىق تۋرالى 100 مىڭنان استام حابارلاما پوليتسياعا كەلىپ تۇسكەن. بۇل تۋرالى ىشكى ىستەر مينيسترلىگى حابارلادى.

"بەلگىلەنگەن شەكتەۋلەردى بۇزعانى ءۇشىن 7,5 مىڭ "وتباسى تيرانى" اكىمشىلىك جاۋاپقا تارتىلعان. بيىل پوليتسيا ومىرلىك قيىن جاعدايعا تاپ بولعان 7,5 مىڭنان استام ايەلدى كريزيس ورتالىقتارىنا جىبەرگەن. ولاردىڭ 2 مىڭنان استامى باسپاناعا ورنالاستى", - دەلىنگەن حابارلامادا.

مينيستر مارات احمەتجانوۆتىڭ سوزىنشە، حابارلامانىڭ باسىم بولىگى شىمكەنت، استانا، الماتىعا جانە قاراعاندى، پاۆلودار، قوستاناي وبلىستارىنان تۇسكەن. پوليتسيا ولاردىڭ 60%-ى بويىنشا شارا قولدانا الماعان، سەبەبى جابىرلەنۋشىلەر وقيعا ورنىندا ارىز جازۋدان باس تارتقان. ءمينيستردىڭ ايتۋىنشا، سونىڭ سالدارىنان جازادان باس تارتۋ وزبىرلىققا اپارادى.

قازىرگى كۇنى تۇرمىستىق زورلىق-زومبىلىققا قارسى كۇرەستى كۇشەيتۋ بويىنشا مىناداي شارالار ازىرلەنىپ جاتىر:

تۇرمىستىق زورلىق دەرەكتەرىن تىركەۋ بويىنشا ء"وتىنىش بەرۋ سيپاتىنان انىقتاۋ سيپاتىنا" كوشۋ. بۇل پوليتسياعا جابىرلەنۋشىنىڭ ءوتىنىشى بولماسا دا، اكىمشىلىك ءىس-جۇرگىزۋدى باستاۋعا مۇمكىندىك بەرەدى.

تاراپتاردىڭ تاتۋلاسۋىنا تالاپتى كۇشەيتۋ. "دەبوشير" ءبىرىنشى رەت سوتتا عانا تاتۋلاسا الادى، ال قايتالانسا مۇنداي قۇقىق الىنىپ تاستالادى.

وتباسىلىق-تۇرمىستىق سالاداعى قۇقىق بۇزۋشىلىقتار بويىنشا جازانى قاتاڭداتۋ. قايتالانعان قۇقىق بۇزۋشىلىقتار ءۇشىن اكىمشىلىك قاماۋعا الۋدىڭ مەرزىمىن ۇزارتۋ ۇسىنىلادى.

"ەسكەرتۋدى" "قوعامدىق جۇمىستارعا" اۋىستىرۋ ۇسىنىلادى.

ەڭ ءجيى جاسالاتىن قىلمىستار بويىنشا "وتباسىلىق-تۇرمىستىق قاتىناستاعى ادامعا قاتىستى" دەگەن قوسىمشا سارالاۋ بەلگىسىن ەنگىزۋ.

Abai.kz